ສື່ມວນຊົນທີ່ຄວບຄຸມໂດຍລັດຂອງຈີນກ່າວວ່າ ປັກກິ່ງບໍ່ສາມາດຊ່ວຍປົກປ້ອງເກົາຫຼີເໜືອ ຈາກຜົນລັບຕາມມາດ້ານການທູດ ຖ້າຫາກພຽງຢາງຈະທໍາການທົດລອງນີວເຄລຍຄັ້ງທີ່ສາມນັ້ນ.
ຄໍາຕັກເຕືອນດັ່ງກ່າວປະກົດໃຫ້ເຫັນເມື່ອວັນພະຫັດມື້ນີ້ ໃນບົດຄວາມບົດ ນຶ່ງທີ່ລົງໃນໜັງສືພິມ Global Times ຊຶ່ງເປັນໜັງສືພິມທີ່ເປັນເຄືອຂ່າຍ ກັບພັກຄອມມີວນີສຂອງຈີນ. ບົດຄວາມທີ່ວ່ານີ້ໄດ້ໃຫ້ຂໍ້ສັງເກດຂອງການຄາດການທີ່ກໍາລັງເພີ່ມທະວີຂຶ້ນວ່າ ພຽງຢາງ ພວມຕຽມທໍາການທົດລອງນີວເຄລຍໃຕ້ພື້ນດິນ ຊຶ່ງຈະເປັນການທົດລອງຄັ້ງທີ່ສາມນັບແຕ່ປີ 2006 ເປັນຕົ້ນມານັ້ນ.
ລັດຖະບານປັກກິ່ງຄັດຄ້ານການທົດລອງນີວເຄລຍຄັ້ງນີ້ຢ່າງແຂງຂັນ ຊຶ່ງ ບົດຄວາມເວົ້າອີກວ່າ ຖ້າຫາກເກົາຫລີເໜືອຍັງຂືນເດີນໜ້າຕໍ່ໄປໃນເລຶ່ອງ ນີ້ແລ້ວ ຈີນກໍຈະບໍ່ສາມາດຊ່ວຍເຫລືອເກົາຫລີເໜືອໃຫ້ຫລີກລ່ຽງຈາກຜົນກະທົບຫລາຍປະການທາງການທູດນັ້ນໄດ້. ສະພາຄວາມໝັ້ນຄົງອົງການສະຫະປະຊາຊາດກໍໄດ້ເຕືອນເກົາຫຼີເໜືອໄປແລ້ວວ່າ ຕົນຈະຕອບໂຕ້ຢ່າງເໝາະສົມ ຕໍ່ການທ້າທາຍເກາະຜິດຄິດຮ້າຍໃດໆກໍຕາມຕື່ມອີກໂດຍພຽງຢາງນັ້ນ.
ໃນເດືອນນີ້ ເກົາຫລີໃຕ້ໄດ້ນຳອອກເຜີຍແຜ່ຮູບພາບສອດແນມຕ່າງໆຕໍ່ວີໂອເອແລະ ບັນດາອົງການຂ່າວອື່ນໆທີ່ສະແດງໃຫ້ເຫັນກິດຈະກໍາທີ່ເກີດຂຶ້ນໃໝ່ໆ ຢູ່ທີ່ສະຖານ ທີ່ທົດລອງນີວເຄລຍສອງຄັ້ງຜ່ານມາຂອງເກົາຫລີເໜືອ
ຄວາມລະແວງກັນທີ່ວ່າການທົດລອງນີ້ແມ່ນກໍາລັງມີແທ້ໄດ້ເກີດຂຶ້ນຫລັງຈາກຄວາມພະຍາຍາມຍິງຈະຫລວດຂອງເກົາຫລີເໜືອທີ່ລົ້ມແຫລວເມື່ອ ວັນທີ່ 13 ເດືອນເມສານີ້. ການທົດລອງນີວເຄລຍສອງຄັ້ງຜ່ານມາໄດ້ມີ ຂຶ້ນຫຼັງຈາກການທົດລອງຍິງລູກສອນໄຟຂີປະນາວຸດທີ່ລົ້ມແຫລວ ແລະເຫັນວ່າເປັນຄວາມພະຍາຍາມຕື່ມອີກ ເພື່ອທົດແທນການທົດລອງທີ່ລົ້ມແຫລວນັ້ນ.