ເຈົ້າໜ້າທີ່ຈີນກ່າວວ່າ ຄວາມປອດໄພຢູ່ຕາມລຳແມ່ນໍ້າຂອງໄດ້ຄ່ອຍໆດີຂື້ນຊຶ່ງເປັນຜົນ
ຂອງການຮ່ວມມືກັບບັນດາສາມປະເທດເພື່ອນບ້ານຂອງຈີນ ໃນເຂດເອເຊຍອາຄະເນ.
ໜັງສືພີມ China Daily ຂອງຈີນ ສະບັບທີ່ອອກໃນວັນອັງຄານມື້ນີ້ ໄດ້ອ້າງຄໍາເວົ້າຂອງ
ທ່ານ Meng Sutie ຜູ້ອໍານວຍການພະແນກຮັກສາຄວາມປອດໄພ ໃນແຂວງ Yunnan
ທີ່ກ່າວວ່າ ພວກໂຈນຕາມລໍາແມ່ນໍ້າຂອງສາມາດປຸ້ນສະດົມເປັນບາງຄັ້ງບາງຄາວແລະທຳ
ການໂຈມ ຕີແບບຢູ່ໃນເຂດທີ່ໂດດດ່ຽວນັບຕັ້ງແຕ່ໄດ້ເລີ້ມມີການຮ່ວມມືກັນໃນທ້າຍປີທີ່
ຜ່ານມາ.
ທ່ານ Meng ກ່າວວ່າ ຈີນ ລາວ ມຽນມາ ແລະ ໄທ ກໍາລັງປະຕິບັດງານຮ່ວມກັນ ໃນ
ການລາດຕະເວນ ການຄຸ້ມກັນດ້ວຍກຳລັງອາວຸດ ແລະແລກການປ່ຽນຂໍ້ມູນສືບລັບຢູ່
ຕາມລໍາແມ່ນໍ້າຂອງ ບ່ອນທີ່ລູກເຮືອ ຈີນ ໄດ້ຖືກຂ້າຕາຍໃນການໂຈມຕີເມື່ອປີແລ້ວນີ້.
ທ່ານກ່າວອີກວ່າ ບັນດາປະເທດເຫລົ່ານີ້ ຍັງໄດ້ຮ່ວມມືກັນໃນການໂຈມຕີກຸ່ມກຳລັງ
ປະກອບອາວຸດ ແລະກຸ່ມຄ້າຢາເສບຕິດຢູ່ໃນຂົງເຂດສາມຫລ່ຽມຄໍາໃນ ແມ່ນໍ້າຂອງ.
ການຂົນສົ່ງທາງນໍ້າຂອງຈີນໄດ້ຢຸດຕິລົງເປັນເວລາສອງເດືອນຫຼັງຈາກໄດ້ມີການໂຈມຕີ
ໃນເດືອນຕຸລາ ໂດຍພວກສົງໄສວ່າເປັນກຸ່ມຄ້າຢາເສບຕິດນັ້ນ.
ໃນເວລາຕໍ່ມາປະເທດໄທໄດ້ຈັບກຸມທະຫານເກົ້າຄົນ ໃນຖານສົງໄສສັງພວກລູກເຮືອ
ຊາວຈີນ ແລະນອກນັ້ນຍັງສົງໄສວ່າພົວພັນກັບລາຊາຄ້າຢາເສບຕິດຂອງມຽນມານຳ
ດ້ວຍ.
ແມ່ນໍ້າຂອງໄຫລຜ່ານແຂວງຢູນານ ພາກໃຕ້ຂອງຈີນເຂົ້າສູ່ເຂດເອເຊຍອາຄະເນ ຊຶ່ງຖືກ
ໃຊ້ເປັນເສັ້ນທາງການຄ້າຜ່ານຫລາຍປະເທດ ຮວມທັງມຽນມາ ລາວ ກໍາປູເຈຍ ໄທ ແລະ
ຫວຽດນາມ.
