ບັນດາຜູ້ນໍາຈີນ ຍີ່ປຸ່ນ ແລະເກົາຫຼີໃຕ້ກ່າວວ່າ ພວກຕົນຈະບໍ່ໂຍະຍານຕໍ່ການເກາະຜິດໃດໆຕື່ມອີກຈາກເກົາຫຼີເໜືອ ທ່າມກາງທີ່ມີຄວາມຢ້ານກົວກັນວ່າ ກຸງພຽງຢາງກໍາລັງກະກຽມທໍາການທົດລອງອາວຸດນີວເຄລຍ ຄັ້ງໃໝ່ນັ້ນ.
ປະທານາທິບໍດີ Lee Myong-bak ແຫ່ງເກົາຫຼີໃຕ້ ໄດ້ຖະແຫຼງດັ່ງກ່າວໃນວັນອາທິດມື້ນີ້ ຫຼັງຈາກທໍາການພົບປະຢູ່ທີ່ກຸງປັກກິ່ງກັບນາຍົກ ລັດຖະມົນຕີຈີນ ທ່ານເຫວິ້ນເຈຍບາວ ແລະນາຍົກລັດຖະມົນຕີຍີ່ປຸ່ນທ່ານ Yoshihiko Noda.
ການຍິງຈະຫຼວດທີ່ປະສົບກັບຄວາມລົ້ມແຫຼວໃນເດືອນແລ້ວນີ້ຂອງເກົາຫຼີເໜືອ ພາໃຫ້ມີການລົງໂທດຈາກສະພາຄວາມໝັ້ນຄົງສະຫະປະຊາຊາດ ແລະໄດ້ຮັບການປະນາມໂດຍທັນທີ ຈາກສະຫະລັດແລະພວກພັນທະມິດ ທີ່ມອງເຫັນການຍິງຈະຫຼວດນັ້ນວ່າ ເປັນການປອມແປງຍິງທົດລອງລູກສອນໄຟຂີປະນາວຸດ ທີ່ຖືກຫ້າມພາຍໃຕ້ມະຕິຂອງສະຫະປະຊາຊາດນັ້ນ.
ບັນດາຜູ້ນໍາ 3 ປະເທດໄດ້ຕັດສິນໃຈໃນວັນອາທິດມື້ນີ້ ທີ່ຈະເລີ່ມທໍາການເຈລະຈາການຄ້າເສລີກັນກ່ອນທ້າຍປີນີ້. ນອກນັ້ນ ພວກຜູ້ນໍາທັງສາມຍັງໄດ້ລົງນາມໃນຂໍ້ຕົກລົງກ່ຽວກັບການລົງທຶນສະບັບນຶ່ງ.
ຈີນ ຍີ່ປຸ່ນ ແລະເກົາຫຼີໃຕ້ເປັນ 3 ປະເທດ ທີ່ມີການເສດຖະກິດໃຫຍ່ທີ່ສຸດໃນເອເຊຍຕາເວັນອອກ.