ເຈົ້າໜ້າທີ່ຂັ້ນສູງສຸດດ້ານກິດຈະການຕ່າງປະເທດຈີນ ໄດ້ເຕືອນຍີ່ປຸ່ນໃຫ້ດໍາເນີນໃນອັນທີ່ ທ່ານເອີ້ນວ່າ ການແກ້ໄຂດ້ານການເມືອງທີ່ສະຫລາດສ່ອງໄສ ເພື່ອປ່ອຍເຮືອຫາປາລໍານຶ່ງພ້ອມດ້ວຍລູກເຮືອ ທີ່ຍີ່ປຸ່ນຍຶດໄປ ໃນສັບປະດາຜ່ານມານີ້.
ທ່ານ Dai Bingguo ສະມາຊິກສະພາປົກຄອງຂອງຈີນໄດ້ຮຽກຕົວທ່ານ Uichiro Niwa ເອກອັກຄະລັດຖະທູດຍີ່ປຸ່ນປະຈໍາປະເທດຈີນ ເຂົ້າພົບໃນຕອນເຊົ້າວັນອາທິດມື້ນີ້ ເພື່ອສົ່ງ ຄໍາເຕືອນດັ່ງກ່າວໃຫ້ຊາບ. ນັບວ່າເປັນຄັ້ງທີ 4 ແລ້ວ ທີ່ທ່ານ Niwa ຖືກຮຽກໂຕມາໃຫ້ຄໍາຊີ້ແຈງ ກ່ຽວກັບການຍຶດເຮືອຫາປາລໍາດັ່ງກ່າວນີ້.
ຖະແຫລງການສະບັບນຶ່ງໃນ website ຂອງກະຊວງການຕ່າງປະເທດຈີນກ່າວວ່າ ທ່ານ Dai ໄດ້ສະແດງຄວາມເປັນຫ່ວງຢ່າງເຄັ່ງຂຶມ ຕະຫລອດທັງທ່າທີທີ່ຈິງຈັງ ແລະຍຸດຕິທໍາ ຂອງລັດຖະບານຈີນກ່ຽວກັບເລື້ອງນີ້.
ທ່າງການຍີ່ປຸ່ນໄດ້ກັກໂຕ ກັບຕັນເຮືອພ້ອມດ້ວຍລູກເຮືອ 14 ຄົນຂອງເຮືອປະມົງລໍານັ້ນຂອງຈີນໄວ້ ຫລັງຈາກເຮືອລໍາດັ່ງກ່າວໄດ້ເກີດຕໍາກັນກັບເຮືອຍາມຝັ່ງຂອງຍີ່ປຸ່ນ 2 ລໍາໃນວັນອັງຄານຜ່ານມາ ໃກ້ໆກັບໝູ່ເກາະໃນເຂດທະເລຈີນຕາເວັນອອກ ຊຶ່ງເປັນເຂດນ່ານນໍ້າ ທີ່ທັງສອງຝ່າຍຕ່າງກໍອ້າງເອົາກໍາມະສິດນັ້ນ.
