ໃນປີນີ້ລັດຖະບານຈີນໄດ້ຕັ້ງອັດຕາເງິນເຟີ້ໂດຍສະເລ່ຍໄວ້ 3 ເປີເຊັນ ແຕ່ພວກເສດຖະສາດບາງຄົນຄາດວ່າ ອັດຕາເງິນເຟີ້ຈະສູງກວ່ານັ້ນ. ຄືເມື່ອເດືອນຜ່ານມານີ້ ອັດຕາເງິນເຟີ້ໄດ້ຖີບຕົວສູງຂຶ້ນຮອດ 5.1 ເປີເຊັນ ຈາກ 4.4 ເປີເຊັນ ເມື່ອເດືອນຕຸລາ ຄືເດືອນກ່ອນນັ້ນ.
ທ່ານ Shen Jiangguang ນັກເສດຖະສາດຄົນນຶ່ງປະຈໍາບໍລິສັດຫລັກຊັບ Mizuho ໃນຮ່ອງກົງ ຄາດວ່າ ລາຄາເຄຶ່ອງຂອງຈະສືບຕໍ່ຖີບຕົວສູງຂື້ນຢູ່ຕໍ່ໄປ ທ່ານ Shen ເວົ້າວ່າ
“ເບິ່ງຄືວ່າໃນເດືອນພະຈິກທີ່ຜ່ານມານັ້ນ ພວກເຮົາ
ໄດ້ເຫັນອັດຕາເງິນເຟີ້ຖີບຂື້ນ ສູ່ຈຸດສູງສຸດສໍາລັບປີນີ້
ແຕ່ທີ່ຈິງແລ້ວໃນປີໜ້ານີ້ ຄືໃນຊ່ວງເຄິ່ງທໍາອິດຂອງ
ປີ ພວກເຮົາອາດຈະເຫັນອັດຕາເງິນເຟີ້ຍິ່ງຈະສູງຂື້ນ ໄປຫລາຍກວ່ານີ້ອີກ.”
ລາຄາອາຫານໄດ້ຖີບຕົວສູງຂື້ນຫລາຍທີ່ສຸດໃນເດືອນພະຈິກຜ່ານມາ ຊຶ່ງສາເຫດສ່ວນນຶ່ງກໍແມ່ນເປັນຍ້ອນຜົນລະປູກບໍ່ດີ ແລະລາຄາຂົນສົ່ງຜົນລະປູກເຫລົ່ານີ້ ກໍສູງຂຶ້ນ.
ໃນຕອນສິ້ນສຸດກອງປະຊຸມເສດຖະກິດແຫ່ງຊາດສາມວັນ ເມື່ອວັນອາທິດທີ 12 ເດືອນນີ້ ລັດຖະບານຈີນໄດ້ສົ່ງສັນຍານວ່າ ຕົນຈະເອົາບາດກ້າວເພີ່ມ ຂື້ນເພື່ອຜ່ອນເບົາສະພາວະເງິນ
ເຟີ້. ລັດຖະບານຈີນບໍ່ໄດ້ເປີດເຜີຍລາຍລະອຽດກ່ຽວກັບເລື່ອງນີ້ ແຕ່ພວກເຈົ້າໜ້າທີ່ກ່ຽວຂ້ອງ
ອາດຄວບຄຸມລາຄາເຂົ້າປາອາຫານ ເພື່ອຊ່ວຍພວກອຸບປະໂພກບໍລິໂພກ ດັ່ງທີ່ເຄີຍໄດ້ປະຕິ ບັດມາໃນອະດີດ.
ແຕ່ສິ່ງນຶ່ງທີ່ເບິ່ງຄືວ່າ ພວກຮ່າງນະໂຍບາຍມີຄວາມຫຍຸ້ງຍາກຫລາຍກ່ວາໃນການທີ່ຈະແກ້
ໄຂນັ້ນ ກໍຄືຄວາມກົດດັນດ້ານລາຄາທີ່ມາຈາກພາກສ່ວນທະນາຄານ. ໃນຫລາຍໆເດືອນ
ຜ່ານມານີ້ ຈີນໄດ້ພະຍາຍາມທີ່ຈະລົບລ້າງຜົນສະທ້ອນຈາກການປ່ອຍເງິນກູ້ອອກຢ່າງບໍ່ມີ
ການຍັບຍັ້ງ ແລະການລົງທຶນຢ່າງຫລວງຫລາຍ ທີ່ເປັນຜົນສືບເນື່ອງມາຈາກການດໍາເນີນ
ໂຄງການກະຕຸກຊຸກຍູ້ເສດຖະກິດ ມູນຄ່າມະຫາສານຂອງລັດຖະບານ ເມື່ອປີ 2009 ນັ້ນ
ທີ່ໄດ້ຊ່ວຍຜັກດັນລາຄາຊັບສິນ ລາຄາຫຸ້ນ ແລະວັດຖຸດິບຫລັກຕ່າງໆ ໃຫ້ຖີບຕົວສູງຂື້ນ.
ຈີນໄດ້ຕັ້ງເປົ້າໝາຍສໍາລັບເງິນກູ້ຢືມໃໝ່ໄວ້ ຈໍານວນ 7 ພັນ 500 ຕື້ຢວນ ຫລື 1 ພັນ 100 ຕື້ໂດລາສໍາລັບປີນີ້ ຊຶ່ງເປັນຈໍານວນທີ່ຕໍ່າກວ່າ ປີ 2009 ຕັ້ງຫລາຍ ແຕ່ວ່າໃນໄລຍະ 11 ເດືອນທໍາອິດຂອງປີນີ້ ຈໍານວນເງິນກູ້ຢືມທັງໝົດ ແມ່ນເກືອບຈະເທົ່າຕົວເລກເປົ້າໝາຍ ທີ່ວາງໄວ້ນັ້ນແລ້ວ.
ດັ່ງນັ້ນ ລັດຖະບານຈຶ່ງໄດ້ບອກໃຫ້ພວກທະນາຄານທັງຫລາຍເກັບເງິນຝາກ ຂອງພວກເຂົາເຈົ້າໄວ້ໃຫ້ຫລາຍໆຂື້ນ ເພື່ອເອົາໄວ້ເປັນເງິນສໍາຮອງ ແນໃສ່ ເພື່ອຕັດເງິນກູ້ຢືມລົງນັ້ນເອງ.
ທ່ານ Shen ກ່າວວ່າ ເບິ່ງຊົງທະນາຄານກາງຈະເອົາມາດຕາການຫລາຍຢ່າງປົນກັນ ໂຮມ
ທັງການຂື້ນອັດຕາດອກເບ້ຍອີກໃນໄລຍະສອງສາມເດືອນຕໍ່ໜ້ານີ້ ແລະລົດຜ່ອນຈໍານວນເງິນ ກູ້ຢືມລົງ ໃນປີໜ້າ.
ແຕ່ທ່ານ Shen ກ່າວຕື່ມວ່າ ຕາບໃດທີ່ພວກຊາວຈີນທີ່ຢາກທ້ອນຫອມເງິນ ໄດ້ດອກເບ້ຍ
ສໍາລັບເງິນຝາກຂອງເຂົາເຈົ້າ ໜ້ອຍກ່ວາທີ່ເອົາໄປລົງທຶນໃສ່ໃນຈໍາພວກຊັບສິນ ຫລືຫຸ້ນນັ້ນ
ແລ້ວ ສະພາວະເງິນເຟີ້ກໍຈະຍັງຄົງເປັນບັນຫາທ້າທາຍຢູ່ຕໍ່ໄປ. ທ່ານ Shen ເວົ້າວ່າ
“ພວກເຮົາມີອັດຕາເງິນເຟີ້ສູງເຖິງ 5 ເປີເຊັນ ແຕ່ອັດຕາດອກເບ້ຍເງິນຝາກ ມີ
ພຽງແຕ່ 2.5 ເປີເຊັນ ດັ່ງນັ້ນຊ່ອງວ່າງອັນນີ້ ກໍແມ່ນສູງຂື້ນເລື້ອຍໆ. ສະນັ້ນ ຂ້າ
ພະເຈົ້າຈຶ່ງຄິດວ່າ ສິ່ງສໍາຄັນທີ່ສຸດໃນເວລານີ້ ກໍຄືປິດຊ່ອງວ່າງດອກເບ້ຍລົບນັ້ນ
ລົງ ເພື່ອວ່າປະຊາຊົນຈະຮູ້ສຶກແຈບໃຈຫລາຍຂື້ນ ທີ່ຈະເອົາເງິນຂອງພວກເຂົາ
ເຈົ້າໄປ ຝາກທະນາຄານແທນການຈະເອົາເຂົ້າໃສ່ການລົງທຶນດ້ານອື່ນໆ ເຊັ່ນຊື້
ບ້ານ ຊຶ່ງຈິງໆແລ້ວມັນເປັນການຫລໍ່ລ້ຽງຄວາມຮຽກຮ້ອງຕ້ອງການ ແລະກະຕຸ້ນ
ໃຫ້ເກີດສະພາວະເງິນເຟີ້ ຕື່ມຂື້ນໄປອີກ.”
ອິງຕາມຄາດຄະເນຂອງທ່ານ
Shen, ທະນາຄານປະຊາຊົນຈີນ
ຫລື the People’s Bank of
China ກໍຄືທະນາຄານແຫ່ງ
ຊາດຈີນນັ້ນ ໄດ້ຂື້ນອັດຕາດອກ
ເບ້ຍສໍາຄັນໆນຶ່ງສ່ວນສີ່ຂອງນຶ່ງ
ເປີເຊັນ ໃນອາທິດແລ້ວນີ້ ໃນ
ຄວາມພະຍາຍາມເພື່ອຈະຕັດ
ການກູ້ຢືມລົງແລະຄວບຄຸມເງິນ
ເຟີ້ ຊຶ່ງນັບວ່າເປັນຄັ້ງທີ່ສອງໃນ
ໄລຍະຫລາຍເດືອນຜ່ານມາ ທີ່
ທາງທະນາຄານກາງໄດ້ຂື້ນດອກ ເບ້ຍ.
ທະນາຄານກາງກ່າວໃນມື້ວັນ
ເສົານັ້ນວ່າ ຕົນຈະຂຶ້ນອັດຕາ
ດອກເບ້ຍສໍາລັບເງິນກູ້ໄລຍະສັ້ນ
ນຶ່ງປີ ແລະອັດຕາດອກເບ້ຍເງິນຝາກຂຶ້ນນຶ່ງສ່ວນສີ່ຂອງນຶ່ງເປີເຊັນ ເປັນ 5.81 ເປີເຊັນ
ສໍາລັບເງິນກູ້ຢືມນຶ່ງປີ ແລະເປັນ 2.75 ເປີເຊັນ ສໍາລັບເງິນຝາກ.
ທ່ານ Stephen Roach ອະດີດຫົວໜ້າກິດຈະການໃນເອເຊຍຂອງທະນາຄານການລົງທຶນ
Morgan Stanley ແລະເປັນອາຈານສອນຄົນນຶ່ງ ທີ່ມະຫາວິທະຍາໄລ Yale ໃນສະຫະ
ລັດ ກ່າວວ່າ ສະພາວະເງິນເຟີ້ກໍາລັງຂັດຂວາງຖ່ວງດຶງພວກເຈົ້າໜ້າທີ່ຈີນ ບໍ່ໃຫ້ທໍາການຫັນ
ປ່ຽນຈາກການເປັນເສດຖະກິດທີ່ອິງໃສ່ການສົ່ງອອກ ໄປເປັນເສດຖະກິດທີ່ກາງຕໍ່ນໍາການ
ອຸບປະໂພກບໍລິໂພກນັ້ນ. ທ່ານ Roach ເວົ້າວ່າ
“ຍິ່ງພວກວາງນະໂຍບາຍລໍຖ້າດົນໄປເທົ່າໃດ ໃນການທີ່ຈະແກ້ໄຂບັນຫາສະພາ
ວະເງິນເຟີ້ນັ້ນ ມັກກໍຈະມີຄວາມຍາກລໍາບາກຫລາຍຂຶ້ນເທົ່ານັ້ນ ທີ່ຈະຈັດການແກ້
ຂກັບບັນຫາດ້ານໂຄງສ້າງນັ້ນ. ຄໍາແນະນໍາຂອງຂ້າພະເຈົ້າໃນເວລານີ້ ກໍຄືໃຫ້
ຮີບລົງມືດໍາເນີນການ ຢ່າງໄວແລະຢ່າງຕັ້ງໜ້າ ເພື່ອແຫ້ໄຂສະພາວະເງິນເຟີ້ໃຫ້
ໄດ້ ເສຍກ່ອນ ເພື່ອວ່າພວກທ່ານຈະສາມາດດໍາເນີນການຫັນປ່ຽນທີ່ສໍາຄັນທີ່ສຸດ
ໃນຈີນ ຊຶ່ງກໍຄືການກະຕຸ້ນການອຸບປະໂພກບໍລິໂພກຂອງເອກະຊົນນັ້ນ.”
ການເຮັດໃຫ້ເສດຖະກິດຈີນມີຄວາມສົມດູນຄືນອີກນັ້ນ ແມ່ນມີຜົນສະທ້ອນລະຍະຍາວ ໃນ
ການເຮັດໃຫ້ການໄດ້ກໍາໄລການຄ້າຂອງຈີນຫລຸດນ້ອຍລົງ ກັບພວກພາຄີການຄ້າ ເຊັ່ນ
ສະຫະລັດນັ້ນ ແລະໃນທີ່ສຸດແລ້ວ ກໍແມ່ນຈະ ຊ່ວຍເຮັດໃຫ້ເສດຖະກິດໂລກ ເກີດຄວາມສົມ ດູນຄືນໃໝ່ນັ້ນເອງ.
ສະພາວະເງິນເຟີ້ ບໍ່ແມ່ນແຕ່ເປັນຕົວການທີ່ກໍ່ໃຫ້ເກີດຄວາມສ່ຽງຕ່າງໆດ້ານເສດຖະກິດເທົ່າ
ນັ້ນ ແຕ່ຍັງພາໃຫ້ເກີດຄວາມສ່ຽງທາງການເມືອງໄດ້ເຊ່ນກັນຢູ່ໃນປະເທດຈີນນັ້ນ. ການຖີບ
ຕົວສູງຂື້ນຢ່າງໄວ ໃນລາຄາສິນຄ້າຫລັກຕ່າງໆ ເຊັ່ນອາຫານແລະບ້ານເຮືອນນັ້ນ ອາດພ
ໃຫ້ມີການປະທ້ວງຈາກປະຊາຊົນໄດ້. ບັນດານັກຊ່ຽວຊານການເມືອງຂອງຈີນກ່າວວ່າ ພັກ
ຄອມມີວນີສທີ່ປົກຄອງປະເທດຢູ່ໃນເວລານີ້ ແມ່ນຕັ້ງໜ້າຢ່າງຈິງຈັງເພື່ອເຮັດໃຫ້ແນ່ໃຈວ່າ ເລຶ່ອງນີ້ມັນຈະບໍ່ເກີດຂື້ນໄດ້.
ແຕ່ການປະຕິບັດການແບບໜັກໜ່ວງຫລາຍເກີນໄປ ໃນການຕໍ່ສູ້ກັບສະພາວະເງິນເຟີ້ນັ້ນ
ກໍອາດສາມາດເຮັດໃຫ້ການເຕີບໂຕທາງເສດຖະກິດຊັກຊ້າ ລົງໄດ້ຢ່າງໃຫຍ່ ພ້ອມກັບພາ
ໃຫ້ເກີດອັດຕາການຫວ່າງງານທີ່ສູງຂື້ນ ບວກກັບບັນຫາທາງການເມືອງ ຕາມມາ.
ພ້ອມກັບການທີ່ລັດຖະບານໄດ້ຮັດເຄ່ງຈໍານວນເງິນກູ້ຢືມນັ້ນ ກໍຄາດກັນວ່າເສດຖະກິດຂອງ
ຈີນຈະຊັກຊ້າລົງໃນປີ 2011 ນີ້ ແລະນັ້ນກໍແມ່ນຈະສົ່ງຜົນກະທົບເຊັ່ນດຽວກັນຕໍ່ພວກເສດ
ຖະກິດທັງຫລາຍທີ່ທໍາການຄ້າຂາຍກັບຈີນ. ເມື່ອວັນຈັນຜ່ານມານີ້ ຜູ້ວ່າທະນາຄານກາງ
ຂອງເກົາຫລີໃຕ້ກ່າວວ່າ ທ່ານກໍກໍາລັງສິ້ງຊອມເບິ່ງສະພາວະເງິນເຟີ້ຂອງຈີນຢູ່ໃນເວລານີ້
ແລະຜົນກະທົບທີ່ອາດຈະເກີດຂື້ນ ໃນປະເທດຂອງທ່ານ.
