ກົມສະຖິຕິຂອງຈີນເວົ້າວ່າ ລາຄາອາຫານທີ່ແພງຂຶ້ນກ່ວາເກົ່າ ໄດ້ຂັບດັນໃຫ້ໄພເງິນເຟີ້ຖີບຕົວສູງຂຶ້ນສູ່ລະດັບສູງສຸດ ໃນຮອບຫລາຍກວ່າ 2 ປີ.
ຫ້ອງການດັ່ງກ່າວເວົ້າອີກວ່າ ອັດຕາໄພເງິນເຟີ້ຂອງຈີນໃນເດືອນພະຈິກຜ່ານມານີ້ ແມ່ນ 5.1% ຊຶ່ງໄດ້ເພີ້ມຂຶ້ນຈາກອັດຕາ 4.4% ຂອງເດືອນກ່ອນ ຄືເດືອນຕຸລາ.
ໄດ້ມີການເປີດເຜີຍຂໍ້ມູນສະຖິຕິນີ້ອອກມາ ໃນຂະນະທີ່ພວກເຈົ້າໜ້າທີ່ວາງນະໂຍບາຍທາງເສດຖະກິດຂອງຈີນ ກຳລັງປະຊຸມກັນຢູ່ນະຄອນປັກກິ່ງ ເພື່ອສົນທະນາຫາລືກັນ ຊອກຫາວິທີທີ່ດີທີ່ສຸດ ເພື່ອແກ້ໄຂບັນຫາການຖີບຕົວສູງຂຶ້ນຂອງລາຄາສິນຄ້າຕ່າງໆ ນັ້ນ.
ລາຄາຜັກບາງປະເພດ ລວມທັງລາຄາຂີງແລະຜັກທຽມ ໃນເດືອນພະຈິກຜ່ານມານີ້ ໄດ້
ເພີ້ມຂຶ້ນຫລາຍກວ່າ 60% ເມື່ອທຽບໃສ່ລາຄາຂອງປີກາຍນີ້. ທາງລັດຖະບານເວົ້າວ່າ
ສະພາບທັງໝົດນີ້ ແມ່ນເປັນຍ້ອນສະພາບດິນຟ້າອາກາດບໍ່ດີ ທີ່ເພີ້ມທະວີຂຶ້ນ ແລະ
ການຂຶ້ນລາຄາຢາຂ້າແມງໄມ້, ຄ່າແຮງງານ ແລະ ຄ່າຂົນສົ່ງ.
ໃນວັນສຸກຫາກໍຜ່ານມານີ້ ທາງທະນາຄານກາງຈີນ ກໍໄດ້ອອກຄໍາສັ່ງໃຫ້ທະນາຄານ ຕ່າງໆ ຮັກສາເງິນສໍາລອງໄວ້ຫລາຍຂຶ້ນ ເພື່ອເປັນວິທີນຶ່ງ ໃນການຈຳກັດເງິນກູ້ ບໍ່ ໃຫ້ເພີ້ມຂຶ້ນ, ຊຶ່ງການອອກຄໍາສັ່ງນີ້ແມ່ນເປັນຄັ້ງທີ 6 ແລ້ວ ໃນປີນີ້.
ກ່ອນໜ້ານີ້ ໃນການດຳເນີນຄວາມພະຍາຍາມອີກອັນນຶ່ງ ເພື່ອຈຳກັດຈຳນວນເງິນທີ່ມີໝູນວຽນຢູ່ໃນປະເທດນັ້ນ ຈີນໄດ້ຂຶ້ນອັດຕາດອກເບ້ຍໃນເດືອນຕຸລາ ຊຶ່ງເປັນຄັ້ງທຳອິດ
ໃນຮອບເກືອບ 3 ປີ ຜ່ານມາ ແລະພວກນັກເສດຖະສາດກໍຄາດວ່າ ຈະມີການຂຶ້ນ
ດອກເບ້ຍອີກຄັ້ງນຶ່ງຢູ່ ໃນໄວໆນີ້.
