ພວກຫາເລາະຊື້ເຄຶ່ອງຕາມຮ້ານສັບພະສິນຄ້າທັງຫລາຍ
ໃນປັກກິ່ງ ພາກັນແກວ່ງຫົວສະແດງຄວາມບໍ່ພໍໃຈ ເວລາ
ພວກເຈົ້າຂອງຮ້ານຄ້າທັງຫລາຍປັບລາຄາສິນຄ້າຂຶ້ນ. ຢູ່
ທົ່ວປະເທດຈີນໃນເວລານີ້ ສະພາວະເງິນເຟີ້ໄດ້ເຮັດໃຫ້
ລາຄາສິນຄ້າຫລາຍຮ້ອຍຊະນິດຖີບຕົວສູງຂຶ່ນ ນັບຕັ້ງແຕ່
ກະທຽມ ເຄຶ່ອງຖ້ວຍຊາມ ໄປຈົນຮອດອາຫານຈານດ່ວນ ບິກແມ໊ກ ແລະນໍ້າມັນເຊື້ອໄຟ.
ການຖີບຕົວຂຶ້ນ 4.4 ເປີເຊັນຂອງດັດຊະນີລາຄາເຄຶ່ອງ
ອຸບປະໂພກບໍລິໂພກໃນເດືອນຜ່ານມານີ້ ໄດ້ສ້າງຄວາມ
ເດືອດຮ້ອນຢ່າງຮຸນແຮງໃຫ້ແກ່ຜູ້ຊື້ທັງຫລາຍ ເຊັ່ນແມ່
ບ້ານຜູ້ນີ້ ນາງ ຢູ ທີ່ເວົ້າວ່າ ລາຄາເຄຶ່ອງຂອງເຕັມນຶ່ງ
ກະຕ່າ ແມ່ນປາກົດວ່າແພງຂື້ນນັບມື້ ຊຶ່ງໄດ້ກະທົບກະ ເທືອນຕໍ່ຄຸນນະພາບຂອງຊີວິດຄວາມເປັນຢູ່ຂອງນາງ.
ໃນການສະແດງຄວາມເຫັນ ທີ່ສະທ້ອນເຖິງການຕໍາໜິຕິຕຽນຂອງລັດຖະບານຈີນນັ້ນ ນາງຢູ ຖິ້ມໂທດໃສ່ສະຫະລັດ ວ່າເປັນຕົວການຍ້ອນນະໂຍບາຍການເງິນສະຫະລັດ.
ລັດຖະບານປັກກິ່ງກ່າວວ່າ ການເຄຶ່ອນໄຫວຂອງສະຫະລັດເພື່ອທຸ່ມເງິນຈໍານວນ 600 ພັນ ລ້ານໂດລາເຂົ້າໃສ່ ເສດຖະກິດອາເມຣິກັນນັ້ນ ແມ່ນຈະສົ່ງຜົນໃຫ້ເງິນສົດຈໍານວນມະຫາສານ ຫລັ່ງໄຫລເຂົ້າໄປໃນພວກປະເທດທີ່ ເສດຖະກິດກໍາລັງໂຜ່ໂຕຂຶ້ນມາຢູ່ໃນເວລານີ້ ເຊັ່ນ ປະເທດຈີນນັ້ນ ແລະເປັນເຊື້ອໄຟຂັບດັນເງິນເຟີ້.
ທ່ານ ທິມ ຄອນເດິນ ນັກເສດຖະສາດປະຈໍາບໍລິສັດປະກັນໄພ ເອໄອຈີ ກ່າວວ່າ ນາງຢູ ແລະລັດຖະບານຂອງນາງນັ້ນ ເວົ້າຖືກພຽງແຕ່ເຄິ່ງນຶ່ງເທົ່ານັ້ນ ໃນການຖິ້ມໂທດໃສ່ສະຫະ ລັດສໍາລັບສະພາວະເງິນເຟິ້ນີ້.
ທ່ານ ທິມ ເວົ້າວ່າ ລາຄາອາຫານເຟິ້ແມ່ນເປັນປາກົດການດ້ານສະບຽງ ຫລືປະລິມານ ຫລາຍກ່ວາ ຄືເມື່ອປະລິມານມີບໍ່ພໍກັບຄວາມຕ້ອງການ ລາຄາອາຫານກໍຍ່ອມຈະແພງຂຶ້ນ ແລະວ່າ ໃນບໍ່ຊ້າລາຄາອາຫານກໍຈະເຂົ້າສູ່ສະພາບທຸ່ນທ່ຽງເອງ. ທ່ານ ທິມ ກ່າວຕໍ່ໄປວ່າ:
"ເບິ່ງຄືວ່າ ມັກຈະມີບັນຫາເລຶ່ອງສະບຽງອາຫານເກີດຂຶ້ນຢູ່ເລື້ອຍໆ ຍ້ອນຝົນຕົກ
ບໍ່ພຽງພໍແດ່ ຫລືຝົນຕົກຫລາຍເກີນໄປແດ່ ຫລືໄພແຫ້ງແລ້ງຍ້ອນມີແສງຕາເວັນ
ຫລາຍເກີນໄປ ຫລືສິ່ງໃດສິ່ງນຶ່ງ. ແຕ່ການກະທົບກະເທືອນເຫລົ່ານັ້ນ ແມ່ນເປັນ
ເລື້ອງຊົ່ວຄາວເທົ່ານັ້ນ ແລະສະບຽງຫລືປະລິມານອາຫານກໍຈະກັບຄືນມາມີຫລາຍ
ຄືເກົ່າ ແລະລາຄາກໍຈະຕໍ່າລົງ. ຂ້າພະເຈົ້າບໍ່ຄິດວ່າພວກອຸບປະໂພກບໍລິໂພກຊາວ
ຈີນທັງຫລາຍ ຈະໄດ້ເຫັນລາຄາແຮມເບີເກີ ບິກແມກ ແພງຂຶ້ນຮອດນຶ່ງຢວນ
ຕະຫລອດໄປ. ຂ້າພະເຈົ້າ ຄິດວ່າມັນຈະເປັນການປັບລາຄາທີ່ຜິດປົກກະຕິໄປ
ເວລານຶ່ງເວລາດຽວ ແລ້ວລາຄາກໍຈະຄົງຕົວຄືນອີກ."
ໃນປີນີ້ ກ່ອນໜ້ານີ້ ຈີນແມ່ນໄດ້ຮັບຄວາມເດືອດຮ້ອນຈາກໄພນໍ້າຖ້ວມໃນລະດູແລ້ງຢ່າງໜັກ
ໜ່ວງ ແລະອາກາດໜາວທີ່ມາຮອດແຕ່ຫົວທີ ກ່ອນເລີ່ມເຂົ້າສູ່ລະດູໜາວນັ້ນ ກໍໄດ້ສ້າງຜົນ
ກະທົບແກ່ຜົນລະປູກນໍາອີກ.
ແຕ່ເຖິງຢ່າງໃດ ລັດຖະບານຈີນກໍຍັງຄົງມີຄວາມເປັນຫ່ວງໃນເລຶ່ອງລາຄາຖີບຕົວສູງຂຶ້ນນັ້ນຢູ່ ຊຶ່ງເປັນເລຶ່ອງໄວຕໍ່ ຄວາມຮູ້ສຶກດ້ານການເມືອງໃນປະເທດນີ້ ຊຶ່ງລາຍໄດ້ຂອງຄອບຄົວ ໃນ
ສັດສ່ວນທີ່ໃຫຍ່ ແມ່ນໃຊ້ຈ່າຍເພື່ອຊຶ້ອາຫານການກິນນັ້ນ.
ເພື່ອຄວບຄຸມຄ່າໃຊ້ຈ່າຍ ຄະນະລັດຖະບານຈີນໄດ້ອອກປະກາດເມື່ອ ຕອນບ່າຍຂອງວັນພຸດ ອາທິດແລ້ວນີ້ວ່າ ລັດຖະບານຈະຄວບຄຸມລາຄາຈຳພວກອາຫານຫລັກ ພ້ອມກັບໃຫ້ເງິນ ສົງເຄາະດ້ານສະບຽງອາຫານ ສໍາລັບພວກ ຄົນທຸກຈົນ ແລະເພີ່ມສະບຽງນໍ້າມັນເຊື້ອໄຟຂຶ້ນ. ຈີນຫວັງວ່າ ການເຂົ້າແຊກແຊງຂອງລັດຖະບານຄັ້ງນີ້ ຈະຊ່ວຍຮັກສາລາຄາເຄື່ອງອຸບປະ ໂພກບໍລິໂພກ ບໍ່ໃຫ້ຖີບຕົວສູງຂຶ້ນຢ່າງວ່ອງໄວເກີນໄປ.
ສິນຄ້າຈໍາພວກອາຫານປະເພດເມັດ ນໍ້າມັນ ນໍ້າຕານ ແລະຝ້າຍ ແມ່ນເປັນຕະຫລາດທີ່ ລັດຖະບານຢາກໃຫ້ມີຄວາມທຸ່ນທ່ຽງ.
ພວກເຈົ້າໜ້າທີ່ຈີນກ່າວວ່າ ພວກເຂົາເຈົ້າຈະສືບຕໍ່ກວາດລ້າງຜູ້ສົງໃສຂຶ້ນລາຄາສິນຄ້າ ແລະຈະລົງໂທດຜູ້ໃດທີ່ຖືກພົບເຫັນວ່າ ກັກຕຸນສິນຄ້າ ແລະຂຶ້ນລາຄາສິນຄ້າຕ່າງໆຢ່າງບໍ່ ຖືກຕ້ອງຕາມກົດໝາຍ.
ແຕ່ພວກນັກເສດຖະສາດຫລາຍຄົນຄິດວ່າ ລັດຖະບານກໍາລັງປະເຊີນກັບສະຖານະການຫຍຸ້ງຍາກ ແບບໜີເສືອໄປພໍ້ແຂ້ ຄືຖ້າຫາກວ່າລັດຖະບານທໍາການປາບປາມເງິນເຟີ້ຢ່າງຕັ້ງ ໜ້າທີ່ສຸດນັ້ນ ມັນອາດສາມາດທໍາລາຍຄວາມພະຍາຍາມ ທີ່ຈະຍົກລະດັບລາຍໄດ້ໃນເຂດຊົນນະບົດ ແລະປັບປ່ຽນເສດຖະກິດໄປສູ່ ການອຸບປະໂພກບໍລິໂພກພາຍໃນປະເທດຫລາຍ ຂຶ້ນ ແລະໜີຫ່າງຈາກການກາງຕໍ່ອາໃສສິນຄ້າສົ່ງອອກ.
ລາຄາອາຫານທີ່ຖີບຕົວສູງຂຶ້ນຢ່າງໄວວາ ເຄີຍໄດ້ພາໃຫ້ຊາວຈີນຫລາຍຄົນພາກັນເຂົ້າໄປ ປະກອບສ່ວນໃນການເດີນຂະບວນປະທ້ວງທີ່ຈະຕຸລັດ ທຽນອັນເໝິນ ເມື່ອຄັ້ງປີ 1989 ນັ້ນ ຊຶ່ງໄດ້ຍຸຕິລົງດ້ວຍການນອງເລືອດ ເວລາລັດຖະບານສົ່ງທະຫານແລະລົດຖັງ ເຂົ້າໄປ ປາບປາມ.
