ການດໍາເນີນຄະດີຄາດຕະກໍາລະດັບສູງ ຂອງນາງ Gu Kailai ພັນລະຍາຂອງ ທ່ານ ໂບ ຊີລາຍ ນັກການເມືອງທີ່ອັບອາຍຂາຍໜ້າຂອງຈີນ ໄດ້ສິ້ນສຸດລົງຫຼັງຈາກໄດ້ດຳເນີນມາພຽງນຶ່ງມື້ ຄືວັນພະຫັດມື້ນີ້.
ເຈົ້າໜ້າທີ່ສານຄົນນຶ່ງ ຂອງເມືອງ Hefei ພາກຕາເວັນອອກຂອງຈີນ ກ່າວວ່າ ຍັງບໍ່ມີການອອກຄຳຕັດສິນໃດໆໃນຄະດີດັ່ງກ່າວນີ້ເທື່ອ ຊຶ່ງທ່ານກ່າວວ່າ ຈໍາເລີຍ ນາງ Gu Kailai ບໍ່ໄດ້ຄັດຄ້ານຕໍ່ຂໍ້ຫາ ພ້ອມທັງມີສຸຂະ ພາບດີ ແລະຈິດໃຈທຸ່ນທ່ຽງ.
ບັນດາໄອຍະການສານກ່າວວ່າ ນາງ Gu ແລະຄົນຮັບໃຊ້ຂອງນາງ ໄດ້ ວາງຢາພິດໃສ່ນາຍ Neil Heywood ນັກທຸລະກິດຊາວອັງກິດໃນເດືອນ ພະຈິກປີກາຍ ທີ່ເມືອງ Chongqing ໃນພາກຕາເວັນຕົກສຽງໃຕ້ຂອງຈີນ ບ່ອນທີ່ສາມີຂອງນາງ ຄືທ່ານໂບ ເປັນຫົວໜ້າພັກຄອມ
ມີວນີສຢູ່ທີ່ນັ້ນ.
ຖ້າຖືກຕັດສິນວ່າກະທໍາຜິດແທ້ ນາງ Gu ອາດຖືກໂທດຂັ້ນປະຫານຊີວິດ ອົງການຂ່າວຊິນຫົວ ເວົ້າວ່າ ເຈົ້າໜ້າທີ່ຕຳຫຼວດສີ່ຄົນ ທີ່ພະຍາຍາມປົກປິດເລຶ່ອງການຄາດຕະກໍານັກທຸລະກິດ Heywood ນັ້ນ ກໍຈະຖືກດໍາເນີນຄະດີເຊັ່ນກັນໃນອາທິດນີ້.
ຄະດີດັ່ງກ່າວນີ້ ນັບວ່າເປັນຄະດີທີ່ຫຼໍ່ແຫຼມທາງການເມືອງຫຼາຍທີ່ສຸດຂອງຈີນ ໃນຄວາມຊົງຈໍາທີ່ບໍ່ດົນນານປານໃດນັ້ນ ແລະກໍເປັນເຫດໃຫ້ທ່ານ ໂບ ຊີລາຍ ສາມີຂອງນາງ Gu ນັ້ນ ໄດ້ຖືກປົດຈາກຕຳແໜ່ງໄປແລ້ວ ຊຶ່ງຄັ້ງນຶ່ງທ່ານເຄີຍຖືກຮັບຮູ້ວ່າ ເປັນດາວຮຸ່ງທີ່ມາແຮງຄົນນຶ່ງ ໃນວົງການການເມືອງຂອງຈີນ.
