ລິ້ງ ສຳຫລັບເຂົ້າຫາ

logo-print

ລັດຖະບານ ຈີນ ໃຫ້ສິດທິພິເສດທາງການຄ້າສຳລັບສິນຄ້າກະສິກຳຂອງ ລາວ ເພີ່ມຂຶ້ນເຖິງ 24 ລາຍການ


ພະນັກງານກຳລັງຂົນເຂົ້າຂຶ້ນລົດບັນທຸກ ຢູ່ໂຮງງານແຫ່ງນຶ່ງໃນ ລາວ.

ລັດຖະບານ ຈີນ ໃຫ້ສິດທິພິເສດທາງການຄ້າສຳລັບສິນຄ້າກະສິກຳຂອງ ລາວ ເພີ່ມຂຶ້ນເຖິງ 24 ລາຍການ ແຕ່ກໍຍັງບໍ່ສາມາດຈັດຕັ້ງປະຕິບັດໄດ້ຈິງ ເພາະວ່າພໍ່ຄ້າ ຈີນ ບໍ່ເຂົ້າມາຮັບຊື້ສິນຄ້າຈາກກະສິກອນ ລາວ.


ທ່ານ ລຽນ ທິແກ້ວ ລັດຖະມົນຕີວ່າການກະຊວງກະສິກຳ ແລະ ປ່າໄມ້ຖະແຫຼງວ່າ ລັດຖະບານ ຈີນ ຕົກລົງໃຫ້ສິດທິພິເສດທາງການຄ້າ ສຳລັບສິນຄ້າກະສິກຳຂອງ ລາວ ເພີ່ມຂຶ້ນອີກ 24 ລາຍການ ເພື່ອເປັນການປະກອບສ່ວນເຂົ້າໃນການພັດທະນາການຜະລິດດ້ານກະສິກຳ ເພື່ອທົດແທນການປູກຝິ່ນໃນແຂວງພາກເໜືອຂອງ ລາວ ໂດຍໃນ 24​ ລາຍການສິນຄ້າກະສິກຳດັ່ງກ່າວໄດ້ມີການຂຶ້ນບັນຊີສິນຄ້າທີ່ອະນຸຍາດໃຫ້ນຳເຂົ້າໄປ ຈີນ ໄດ້ແລ້ວ 16 ລາຍການຈຶ່ງເຊື່ອວ່າທາງການ ຈີນ ຈະຂຶ້ນບັນຊີຢ່າງຄົບຖ້ວນໃນມໍ່ໆນີ້ ອັນຈະເຮັດໃຫ້ ລາວ ໄດ້ຮັບສິດທິພິເສດທາງການຄ້າຈາກ ຈີນ ທັງໝົດໃນ 32 ລາຍການຊຶ່ງໃນນີ້ລວມເຖິງເຂົ້າ 5 ໝື່ນໂຕນ, ງົວ 5 ແສນໂຕ, ກ້ວຍ, ສາລີ ແລະ ຢາງພາລາດ້ວຍ ແຕ່ໃນການຈັດຕັ້ງປະຕິບັດຕົວຈິງກໍຈະຕ້ອງສົ່ງເສີມໃຫ້ນັກທຸລະກິດ ຈີນ ເຂົ້າມາລົງທຶນໃນ ລາວ ເພີ່ມຂຶ້ນດ້ວຍ ດັ່ງທີ່ທ່ານ ລຽນ ຢືນຢັນວ່າ

“ໄດ້ຊຸກຍູ້ ແລະ ອຳນວຍຄວາມສະດວກໃຫ້ແກ່ບັນດາທຸລະກິດ ແລະ ຜູ້ປະກອບການລົງທຶນໃສ່ການຜະລິດພືດ-ສັດບູລິມະສິດທີ່ໄດ້ເຈລະຈາແລ້ວ ເພື່ອບັນລຸເປົ້າໝາຍການສົ່ງອອກເປັນຕົ້ນແມ່ນເຂົ້ານີ້ ໂຄຕ້າ 50,000 ໂຕນ ແລະ ງົວ 5 ແສນໂຕ ແລະ 6 ຊະນິດພືດທີ່ໄດ້ເຈລະຈາແລ້ວຫັ້ນຖືວ່າໄດ້ແລ້ວລວມທັງ 24 ພືດໃນໂຄຕ້າທົດແທນການປູກຝິ່ນນີ້ ຈີນ ເຂົາເຈົ້າອອກ Bar Code ໃຫ້ແລ້ວລະແມ່ນ 16 ພືດ.”

ແຕ່ຢ່າງໃດກໍຕາມ ຊາວກະສິກອນ ລາວ ໄດ້ຮັບຜົນກະທົບຈາກການລະບາດຂອງເຊື້ອໄວຣັສ Covid-19 ຢ່າງໜັກໜ່ວງ ເນື່ອງຈາກບໍ່ສາມາດສົ່ງຜົນຜະລິດກະສິກຳໄປ ຈີນ ໄດ້ຕາມປົກກະຕິເພາະວ່າບັນດາພໍ່ຄ້າ ຈີນ ບໍ່ໄດ້ເດີນທາງມາຮັບຊື້ຜົນຜະລິດກະສິກຳໃນ ລາວ ນັບຈາກເດືອນມັງ ກອນ 2020 ເປັນຕົ້ນມາແລ້ວ ຈຶ່ງເຮັດໃຫ້ກະເສດຕະກອນ ລາວ ບໍ່ມີລາຍໄດ້ຈາກການຂາຍຜົນຜະ ລິດເລີຍ ທັງຍັງປາກົດດ້ວຍວ່າມີຜົນຜະລິດຕົກຄ້າງຢູ່ໃນລາວຈຳນວນຫຼາຍ ໂດຍສະເພາະກ້ວນຫອມນັ້ນຖືກເປັນຜົນຜະລິດທີ່ຕົກຄ້າງຫຼາຍທີ່ສຸດ ດັ່ງທີ່ທ່ານ ອ່ອນແກ້ວ ອຸ່ນອະລຸນ ຫົວໜ້າພະ ແນກແຜນການ ແລະ ການລົງທຶນແຂວງອຸດົມໄຊຢືນຢັນວ່າ

“ຖືວ່າມາຮອດປັດຈຸບັນນີ້ ຢູ່ແຂວງອຸດົມໄຊຂອງພວກເຮົາ ສິນຄ້າຍັງຄ້າງທີ່ບໍ່ໄດ້ຂາຍອອກໄປສູ່ປະເທດ ຈີນ ນີ້ກະມີໝາກຖົ່ວແຂກ 1,000 ກວ່າໂຕນ, ມັນດ້າງ 1,700 ກວ່າໂຕນ, ໝາກກ້ວຍຫອມນີ້ແມ່ນ 115,800 ກວ່າໂຕນ ຕໍ່ມານີ້ແມ່ນໝາກອຶ 3,267 ໂຕນ ແລະ ອ້ອຍນີ້ 1,500 ໂຕນ ຂຶ່ງວ່າສິນຄ້າເຫຼົ່ານີ້ນີ່ຍັງຄ້າງຢູ່ແຂວງອຸດົມໄຊຂອງພວກເຮົາໃນໄລຍະປັດຈຸບັນນີ້ ຊຶ່ງໄດ້ສ້າງຄວາມເສຍຫາຍໃຫ້ແກ່ພີ່ນ້ອງກະສິກອນແຂວງອຸດົມໄຊເຮົາເປັນຈຳນວນຫຼວງຫຼາຍພໍສົມຄວນ.”

ສ່ວນເຈົ້າໜ້າທີ່ຂັ້ນສູງໃນກະຊວງອຸດສາຫະກຳ ແລະ ການຄ້າຍອມຮັບວ່າ ການລະບາດຂອງເຊື້ອໄວຣັສ Covid-19 ຍັງສົ່ງຜົນກະທົບຕໍ່ການສົ່ງອອກຜົນຜະລິດກະສິກຳທີ່ ລາວ ໄດ້ຮັບສິດທິພິເສດທາງການຄ້າຈາກ ຈີນ ອີກດ້ວຍເປັນຕົ້ນແມ່ນຜົນຜະລິດເຂົ້າທີ່ລັດຖະບານ ຈີນ ໄດ້ອະນຸຍາດໃຫ້ຮັບຊື້ຈາກ ລາວ ໃນປະລິມານລວມ 50,000 ໂຕນໃນປີ 2020​ ນີ້ ແຕ່ກໍປາກົດວ່າກະເສດຕະກອນ ລາວ ສາມາດສົ່ງເຂົ້າໄປ ຈີນ ໄດ້ພຽງ 1,350 ໂຕນ ຄິດເປັນ 2.5 ເປີເຊັນເທົ່ານັ້ນຂອງໂຄຕ້າທັງໝົດທີ່ໄດ້ຮັບຈາກ ຈີນ ໃນປີນີ້ ເພາະວ່າເກີດບັນຫາຫຍຸ້ງຍາກໃນການຂົນສົ່ງສິນຄ້າໄປ ຈີນ ເນື່ອງຈາກການລະບາດຂອງໄວຣັສ Covid-19 ດັ່ງກ່າວ.

ແຕ່ຢ່າງໃດກໍຕາມ ເພື່ອຮັບປະກັນວ່າເຂົ້າທີ່ ລາວ ຈະສົ່ງໄປ ຈີນ ໃນໄລຍະຕໍ່ໄປນີ້ເປັນຜົນຜະລິດທີ່ມີຄຸນນະພາບໄດ້ມາດຕະຖານຕາມຕ້ອງການຂອງ ຈີນ ທາງການ ຈີນ ກໍໄດ້ຄັດເລືອກ 5 ບໍລິສັດຮ່ວມທຶນ ຈີນ-ລາວ ເພື່ອຮັບຜິດຊອບການເກັບຊື້ເຂົ້າໃນ ລາວ ເພື່ອສົ່ງໄປ ຈີນ ຕາມໂຄຕ້າທີ່ທາງການ ຈີນ ໄດ້ໃຫ້ແກ່ ລາວ ໃນປະລິມານລວມ 50,000 ໂຕນໃນປີ 2020 ດັ່ງກ່າວ ຫາກແຕ່ວ່າການທີ່ຈະຈັດຕັ້ງປະຕິບັດໄດ້ຈິງນັ້ນ ກໍຕໍ່ເມື່ອທາງການ ລາວ-ຈີນ ສາມາດຄວບຄຸມການລະບາດຂອງ Covid-19 ໄດ້ຢ່າງຄັກແນ່ແລ້ວ.

ຍິ່ງໄປກວ່ານັ້ນ ໄພນໍ້າຖ້ວມໃນປີ 2019 ຍັງເຮັດໃຫ້ຄອງຊົນລະປະທານ ແລະ ອ່າງນໍ້າເສຍຫາຍໄປເຖິງ 76 ແຫ່ງ ທັງຍັງຂາດແຄນເງິນທຶນ ແລະ ແນວພັນເຂົ້າທີ່ເສຍຫາຍໄປຍ້ອນໄພນໍ້າຖ້ວມ ລວມເຖິງແນວພັນສັດ ແລະ ພັນພືດຕ່າງໆອີກດ້ວຍ.

XS
SM
MD
LG