ກະຊວງການຕ່າງປະເທດສະຫະລັດໄດ້ຖິ້ມໂທດໃສ່ເຈົ້າໜ້າທີ່ຂັ້ນສູງຂອງຈີນທ່ານນຶ່ງ ວ່າເປັນຄົນສັ່ງໃຫ້ທໍາການໂຈມຕີທາງຄອມພີວເຕີ ຕໍ່ກົນໄກຊອກຫາຂໍ້ມູນທາງຄອມພີວເຕີຍັກໃຫຍ່ Google ໃນປີແລ້ວນີ້.
ໂທລະເລກລັບສະບັບນຶ່ງທີ່ສົ່ງຈາກສະຖານທູດສະຫະລັດທີ່ກຸງປັກກກິ່ງໃນເດືອນພຶດສະພາປີແລ້ວນີ້ ອ້າງຄໍາເວົ້າຂອງແຫລ່ງຂ່າວທີ່ເຊື່ອຖືໄດ້ແຫລ່ງນຶ່ງວ່າ ທ່ານ Li Changchun ເຈົ້າໜ້າທີ່ຂັ້ນອາວຸໂສຝ່າຍໂຄສະນາຊວນເຊື່ອຂອງຈີນ ໄດ້ສັ່ງໃຫ້ທໍາການໂຈມຕີດັ່ງກ່າວ ເວລາທ່ານຊອກຫາຊື່ຂອງທ່ານເອງ ແລະໄດ້ພົບຄວາມເຫັນ ທີ່ຕໍາໜິຕິຕຽນທ່ານເອງ.
ການໂຈມຕີທາງຄອມພິວເຕີ້ ແລະການທວງໃຫ້ກົນໄກຊອກຫາຂໍ້ມູນ Google ກວດກາເນື້ອໄນຂອງຄວາມເຫັນຫລືບົດຂຽນຕ່າງໆ ທີ່ຕົນເອົາອອກທາງອິນເຕີເນັທນັ້ນ ບັງຄັບໃຫ້ Google ຕ້ອງອັດການດໍາເນີນງານຂອງຕົນລົງໃນຈີນ ແຜ່ນດິນໃຫຍ່ ແລະຍົກຍ້າຍກິດຈະການໄປຕັ້ງຢູ່ໃນຮອງກົງ.
