ທ່ານ Timothy Geithner ລັດຖະມົນຕີການເງິນສະຫະ
ລັດໄດ້ຮຽກຮ້ອງໃຫ້ມີການຕັ້ງອັດຕາການແລກປ່ຽນເງິນຕາຕ່າງປະເທດແບບລອຍໂຕຫຼືປັບປ່ຽນໄດ້ທີ່ກອງປະຊຸມນາໆຊາດຢູໃນເມືອງ Nanjing ຂອງ ຈີນນັ້ນ.
ທ່ານ Geithner ກ່າວຕໍ່ພວກເຈົ້າໜ້າທີ່ລັດຖະບານແລະທະນາຄານແຫ່ງຊາດຕ່າງໆຈາກກຸ່ມ G20 ຫລືພວກ 20 ປະເທດທີ່ຮັ່ງມີແລະຈະເລີນດ້ານອຸດສາຫະກໍາທີ່ສຸດໃນໂລກ ໃນວັນພະຫັດມື້ນີ້ວ່າ ອັດຕາການແລກປ່ຽນທີ່ລອຍໂຕຫລາຍຂຶ້ນແມ່ນສໍາຄັນຫລາຍສໍາລັບການປະຕິຮູບດ້ານເສດຖະກິດຂອງໂລກ.
ທ່ານ Geithner ກ່າວຕື່ມວ່າ ມີບາງປະເທດໄດ້ຄວບຄຸມ
ອັດຕາການແລກປ່ຽນຢ່າງເຄັ່ງຄັດຊຶ່ງເປັນນະໂຍບາຍທີ່
ເພີ່ມທະວີຄວາມສ່ຽງໃນພາວະເງິນເຟີ້ແລະຊຸກຍູ້ໃຫ້ມີລະ
ບົບຄຸ້ມຄອງສິນຄ້າຂອງຕົນ. ໃນຂະນະທີ່ທ່ານ Geithner ບໍ່ໄດ້ບົ່ງຊື່ປະເທດໃດນຶ່ງອອກມາຢ່າງເຈາະຈົງນັ້ນ ສະຫະລັດໄດ້ຕໍາໜິຕິຕຽນຈີນວ່າ ໃນອະດີດຜ່ານມາ ຈີນໄດ້ຄວບຄຸມອັດຕາການແລກປ່ຽນເງິນຂອງຕົນຢ່າງເຂັ້ມງວດ.
ປະທານາທິບໍດີຝຣັ່ງ ທ່ານ Nicholas Zarkozy ຊຶ່ງເວລານີ້ ເປັນປະ ທານວຽນຂອງກຸ່ມ G20 ໄດ້ຮຽກຮ້ອງໃຫ້ມີອັດຕາການເເລກປ່ຽນລອຍໂຕຂຶ້ນເຊ່ນກັນ.
ນອກນັ້ນທ່ານ Zarkozy ຍັງຮຽກຮ້ອງໃຫ້ກຸ່ມ G20 ຈັດຕັ້ງຕາຕະລາງເວລາຂຶ້ນເຊ່ນກັນ ສໍາລັບຮວມເອົາເງິນຢວນຂອງຈີນເຂົ້າໃນຈໍາພວກເງິນຕາຕ່າງປະເທດທີ່ໃຊ້ສໍາລັບກໍານົດຄ່າຂອງຊັບສິນສໍາຮອງຂອງກອງທຶນສາກົນຫລື IMF ນັ້ນ.
