ວໍຊິງຕັນ ແລະ ໂຕກຽວ ກໍາລັງກະກຽມເພື່ອເປີດເຜີຍແຜນການປັບປ່ຽນໂຄງສ້າງກອງບັນຊາການທະຫານຂອງສະຫະລັດໃນປະເທດຍີ່ປຸ່ນ ໃນອັນທີ່ຈະເປັນການຍົກລະດັບທີ່ໃຫຍ່ທີ່ສຸດດ້ານຄວາມໝັ້ນຄົງ ໃຫ້ແກ່ພັນທະມິດຂອງພວກເຂົາເຈົ້າ ໃນຮອບຫຼາຍທົດສະວັດ.
ຈີນ ໄດ້ອອກມາສະແດງການຄັດຄ້ານແຜນການດັ່ງກ່າວແລ້ວ, ໂດຍກ່າວວ່າ ພວກເຂົາບໍ່ຢາກເປັນເປົ້າໝາຍຂອງແຜນການປ້ອງກັນປະເທດທີ່ ວໍຊິງຕັນ ແລະ ໂຕກຽວ ຄາດໝາຍທີ່ຈະປະກາດໃນກອງປະຊຸມສຸດຍອດໃນເດືອນເມສານີ້.
ທ່ານຫລຸຍ ພັງຢູ (Liu Pengyu) ໂຄສົກສະຖານທູດຈີນປະຈຳນະຄອນຫຼວງວໍຊິງຕັນກ່າວຕໍ່ VOA ໃນວັນອັງຄານແລ້ວນີ້ວ່າ “ຈີນເຊື່ອໝັ້ນສະເໝີ ວ່າການຮ່ວມມືທາງທະຫານລະຫວ່າງປະເທດຕ່າງໆ ຄວນສ້າງເງື່ອນໄຂໃຫ້ແກ່ສັນຕິພາບ ແລະສະຖຽນລະພາບຢູ່ໃນພາກພື້ນ, ແທນທີ່ຈະແນເປົ້າໝາຍໃສ່ຝ່າຍທີສາມ ຫຼືທຳລາຍຜົນປະໂຫຍດຂອງຝ່າຍທີສາມ.”
ໂຄສົກກະຊວງການຕ່າງປະເທດສະຫະລັດ ໄດ້ສົ່ງອີເມລຕອບໂຕ້ກັບໄປຍັງ VOA ພະແນກພາສາເກົາຫຼີ ໃນມື້ວັນພຸດແລ້ວນີ້. ໂຄສົກກະຊວງດັ່ງກ່າວນັ້ນ ເວົ້າວ່າ “ພັນທະມິດລະຫວ່າງສະຫະລັດ ແລະ ຍີ່ປຸ່ນ ໄດ້ຮັບໃຊ້ຕໍ່ພື້ນຖານຂອງສັນຕິພາບ, ພື້ນຖານຂອງຄວາມໝັ້ນຄົງ, ແລະ ພື້ນຖານຂອງຄວາມຈະເລີນຮຸ່ງເຮືອງຢູ່ໃນຂົງເຂດອິນໂດ-ປາຊີຟິກ ແລະໃນທົ່ວໂລກ ມາເປັນເວລາຫຼາຍກວ່າ 7 ທົດສະວັດແລ້ວ, ແລະບໍ່ເຄີຍແຂງກະດ້າງໄປກວ່ານັ້ນ.”
ທີ່ປຶກສາດ້ານຄວາມໝັ້ນຄົງແຫ່ງຊາດຂອງທຳນຽບຂາວ ທ່ານເຈັກ ຊູລລິວາລ ແລະຄູ່ຮ່ວມຕໍາແໜ່ງຈາກຍີ່ປຸ່ນຂອງທ່ານ ຄືທ່ານ ອາກິບະ ຕາເກໂອະ (Akiba Takeo), ພົບປະກັນຢູ່ທີ່ທຳນຽບຂາວ ໃນວັນອັງຄານແລ້ວນີ້ ເພື່ອປຶກສາຫາລືກ່ຽວກັບ “ບາດກ້າວຕໍ່ໄປ ສໍາລັບຄວາມສຳເລັດໃນການສົ່ງມອບກະແຈສຳຄັນ” ທີ່ປະທານາທິບໍດີສະຫະລັດ ທ່ານໂຈ ໄບເດັນ ແລະ ນາຍົກລັດຖະມົນຕີຍີ່ປຸ່ນ ທ່ານຟູມິໂອະ ກິຊິດະ ຈະປະກາດເມື່ອເວລາພົບປະກັນ ໃນວັນທີ 10 ເມສາ ຢູ່ທີ່ນະຄອນຫຼວງວໍຊິງຕັນ.
ຟໍຣັມສະແດງຄວາມຄິດເຫັນ