ເບິ່ງລາຍງານພາສາລາວ:
ຟັງລາຍງານພາສາລາວໂດຍເຕັມ:
ຍອດຂາຍໃນຕ່າງປະເທດຂອງສີນຄ້າທີ່ຜະລິດຈາກປະເທດຈີນນັ້ນ ໄດ້ເປັນນຶ່ງໃນພວກປັດ
ໃຈທີ່ໃຫຍ່ທີ່ສຸດ ທີ່ຂັບດັນການເຕີບໂຕຢ່າງໄວຂອງເສດຖະກິດຈີນ ແຕ່ວ່າມາບັດນີ້ ມີສະຖິ
ຕິໃໝ່ທີ່ສະແດງໃຫ້ເຫັນວ່າ ການເຕີບໂຕຂອງສິນຄ້າສົ່ງອອກຂອງຈີນອາດໄດ້ເຖິງຈຸດສູງ
ສຸດແລ້ວ. ນັກຍຸທະສາດດ້ານການລົງທຶນ ປູ ຢົງຫາວ ທີ່ບໍລິສັດຄຸ້ມຄອງຄວາມຮັ່ງມີ UBS
ຫລື UBS Wealth Management ກ່າວວ່າ ຄວາມບໍ່ແນ່ນອນກ່ຽວກັບເສດຖະກິດ
ເຮັດໃຫ້ຄວາມຮຽກຮ້ອງຕ້ອງການຂອງຜູ້ອຸບປະໂພກບໍລິໂພກ ລຸດນ້ອຍຖອຍລົງ ຢູ່ໃນທົ່ວ
ໂລກ ຊຶ່ງທ່ານຊີ້ແຈງວ່າ:
“ແນ່ນອນວ່າ ການສົ່ງອອກນັ້ນແມ່ນຂຶ້ນກັບສິ່ງແວດລ້ອມທາງນອກ. ຂ້າພະ
ເຈົ້າຄາດວ່າ ມັນຈະຍັງອ່ອນແອແລະກໍຊັກຊ້າລົງຢູ່ຕໍ່ໄປ. ແຕ່ວ່າ ເວົ້າໃນ
ດ້ານການອຸບປະໂພກພາຍໃນ ຫລືໂຕເລກການຜະລິດ ຫລືເງິນເຟີ້ແລ້ວ
ກໍໜ້າຈະມີການເຄື່ອນໄຫວໄປສູ່ທິດທາງບວກຫລາຍຂຶ້ນ.”
ບັນດານັກເສດຖະສາດກ່າວວ່າ ການຂຶ້ນຄ່າເງີນຢວນ ກໍຄືເງິນຕາຂອງຈີນນັ້ນ ອາດສາມາດ
ຊ່ວຍຊຸກຍູ້ການອຸບປະໂພກບໍລິໂພກຢູ່ພາຍໃນປະເທດ ແຕ່ວ່າມັນກໍສາມາດສ້າງຄວາມເສຍ
ຫາຍໃຫ້ແກ່ການສົ່ງອອກຂອງຈີນ ຄືຈະເຮັດໃຫ້ສິນຄ້າຂອງຈີນມີລາຄາແພງຂື້ນຢູ່ໃນຕ່າງ
ປະເທດ. ທ່ານ ປູ ຢົງຫາວ ກ່າວວ່າ ອັດຕາການຂະຫຍາຍໂຕທີ່ອ່ອນແອຂອງສິນຄ້າສົ່ງ
ອອກ ອາດເປັນການເພິ່ມນໍ້າໜັກໃຫ້ແກ່ຂໍ້ອ້າງຂອງທະນາຄານກາງຫລືທະນາຄານແຫ່ງ
ຊາດຈີນ ເພື່ອຖ່ວງດຶງການຂຶ້ນຄ່າເງີນຢວນ ໄວ້. ທ່ານ ປູ ກ່າວຕໍ່ໄປວ່າ:
“ປີນີ້ ໂຕເລກການສົ່ງອອກ ແມ່ນຈະທ້າທາຍຫລາຍ ຂ້າພະເຈົ້າໝາຍເຖິງ
ທາງຝ່າຍຢູໂຣບໂດຍສະເພາະ. ດ້ວຍເຫດນີ້ແຫລະ ຂ້າພະເຈົ້າຈຶ່ງຄິດວ່າ
ຈີນຄົງຈະບໍ່ຢາກເຕັມໃຈປານໃດ ທີ່ຈະປ່ອຍໃຫ້ເງິນຕາແຂງຄ່າຂຶ້ນ.”
ຢູ່ໃນສະຫະລັດ ກໍາລັງມີການຊຸກຍູ້ໃຫ້ເພິ່ມທະວີການສົ່ງອອກຂຶ້ນ. ໃນວັນພະຫັດແລ້ວນີ້ ສະຫະພັນການຄ້າໃຫຍ່ທີ່ສຸດໃນສະຫະລັດ ໄດ້ຮຽກຮ້ອງໄປຍັງລັດຖະສະພາໃຫ້ເສີມຂະ
ຫຍາຍສັນຍາການຄ້າເສລີ ຮ່ວມກັບພວກຕະຫລາດທີ່ກໍາລັງໂຜ່ໂຕຂຶ້ນມາ ຈາກ ບຣາຊີລ
ໄປຫາ ອິນໂດເນເຊຍ. ທ່ານ ໂທມັສ ດອນນາຮີວ ປະທານສະພາການຄ້າຂອງສະຫະລັດ
ກ່າວວ່າ:
“95 ສ່ວນຮ້ອຍຂອງປະຊາຊົນທີ່ພວກເຮົາຢາກຈະຂາຍເຄື່ອງໃຫ້ນັ້ນ ແມ່ນ
ດໍາ ລົງຊີວິດຢູ່ນອກສະຫະລັດ. ສະນັ້ນ ພວກເຮົາຄວນອອກໄປຫາເຂົາເຈົ້າ
ແລະຊັກຊວນເອົາພວກລູກຄ້າແລະຜູ້ອຸບປະໂພກບໍລິໂພກເຫລົ່ານັ້ນ ໃຫ້
ພາກັນມາຊື້ເຄື່ອງຂອງອາເມຣິກາ ຫລາຍຄົນຂຶ້ນ.”
ການຊຸກຍູ້ດັ່ງກ່າວອາດກໍາລັງໄດ້ຜົນ ເພາະປາກົດວ່າສີນຄ້າສົ່ງອອກຂອງສະຫະລັດໄປ
ຍັງປະເທດຈີນ ໄດ້ຖີບຂຶ້ນສູ່ລະດັບສູງສຸດ ໃນຮອບນຶ່ງປີກວ່າ ແຕ່ວ່າ ຕົວເລກການຄ້າ
ທີ່ມີລາຍງານອອກມາໃນວັນສຸກແລ້ວນີ້ ແມ່ນມີຄວາມໝາຍໄປແນວນຶ່ງອີກ. ກະຊວງ
ການຄ້າຂອງສະຫະລັດກ່າວວ່າ ເຖິງແມ່ນວ່າສິນຄ້ານໍາເຂົ້າຈະລຸດລົງກໍຕາມ ແຕ່ການ
ຂາດດຸນການຄ້າຂອງສະຫະຣັດກໍໄດ້ຂະຫຍາຍອອກ ຫລາຍກວ່າ 10 ເປີເຊັນ ໃນ
ເດືອນພະຈິກ ປີກາຍນີ້ ເນື່ອງຈາກວ່າຊາວອະເມຣິກັນໄດ້ຈ່າຍເງິນຫລາຍຂຶ້ນ ສໍາລັບ
ຊື້ນໍ້າມັນດິບແລະລົດລາ ຍ້ອນລາຄາແພງຂື້ນນັ້ນເອງ.
ເບິ່ງລາຍງານພາສາອັງກິດ:
