ທ່ານ ຫູຈິນເຖົາ ປະທານປະເທດຈີນ ກໍາລັງຢູ່ໃນອອສເຕຣຍເພື່ອທໍາການຢ້ຽມຢາມຢ່າງເປັນທາງການ ຖ້າມກາງຮ່ອງຮອຍຕ່າງໆທີ່ວ່າກຸງປັກກິງພວມຊອກຫາການຍິນຍອມຄັ້ງສໍາຄັນ ເພື່ອເປັນການແລກປ່ຽນກັບການທີ່ຈີນໄປລົງທຶນໃນກອງທຶນຊ່ອຍກູ້ໜີ້ສິນໃນຢູໂຣບນັ້ນ.
ທ່ານຫູຈິນເຖົາເດີນທາງໄປຮອດກຸງວຽນໃນແລງວັນອາທິດວານນີ້ ແລະໄດ້ທໍາການພົບປະກັນຮອບທໍາອິດກັບປະທານາທິບໍດີ Heinz Fischer ໃນວັນຈັນມື້ນີ້. ອົງການຂ່າວຊິນຫົວຂອງທາງການຈີນກ່າວວ່າ ຜູ້ນໍາຈີນຈະລົງນາມໃນຂໍ້ຕົກລົງ 7 ສະບັບກ່ຽວກັບການຄ້າແລະເລື້ອງອື່ນໆ.
ການຢ້ຽມຢາມດັ່ງກ່າວມີຂຶ້ນກ່ອນກອງປະຊຸມທີ່ສໍາຄັນທີ່ຈະມີຂຶ້ນໃນວັນພະຫັດນີ້ທ່ີເມືອງ Cannes ປະເທດຝຣັ່ງ ຂອງກຸ່ມ G-20 ຂອງພວກປະເທດທີ່ພັດທະນາແລ້ວ ແລະທີ່ກໍາລັງໂຜ່ໂຕຂຶ້ນມາມີອໍານາດທາງເສດຖະກິດ ຊຶ່ງໃນກອງປະຊຸມດັ່ງກ່າວນີ້ ຄາດວ່າຈີນຈະປະເຊີນກັບການກົດດັນໃຫ້ໄປລົງທຶນຈໍານວນຫລາຍເຖິງ 100 ຕື້ໂດລາໄດ້ໃນກອງທຶນຊ່ອຍກູ້ໜີ້ສິນໃນຢູໂຣບທີ່ຈັດຕັ້ງຂຶ້ນມາໃນສັບປະດາຜ່ານມານີ້.
ບົດວິຈານບົດນຶ່ງໃນວັນຈັນມື້ນີ້ໃນໜັງສືພິມ China Daily ກ່າວວ່າເພື່ອເປັນການແລກປ່ຽນກັນນັ້ນ ຢູໂຣບຄວນຈະຮັບຮູ້ຈີນວ່າ ເປັນເສດຖະກິດຕະຫຼາດຫລືເສລີ ທີ່ກໍາລັງປັບປຸງສະຖານະພາບຂອງຕົນພາຍໃຕ້ກົດລະບຽບການຄ້າສາກົນ ແລະຄວນລົດຜ່ອນຂໍ້ຈໍາກັດຮັດແຄບຕ່າງໆກ່ຽວກັບການສົ່ງສິນຄ້າປະເພດເທັກໂນໂລຈີຊັ້ນສູງຂອງຕົນໄປຍັງຈີນນັ້ນ.
