ລິ້ງ ສຳຫລັບເຂົ້າຫາ

ວັນພຸດ, ໒໒ ພຶດສະພາ ໒໐໒໔

ຈີນໃຫ້ຄໍາໝັ້ນໝາຍ ທີ່ຈະໃຫ້ການຊ່ອຍເຫລືອ ແກ່ຢູໂຣບ


ຮອງປະທານປະເທດຈີນ ທ່ານ Xi Jinpin (ຊ້າຍ) ກໍາລັງ
ຈັບມືກັບນາຍົກລັດຖະມົນຕີ Ireland ທ່ານ Enda Kenny, ທີ່ນະຄອນຫລວງ Dublin, Ireland, ວັນທີ 20 ກຸມພາ 2012.
ຮອງປະທານປະເທດຈີນ ທ່ານ Xi Jinpin (ຊ້າຍ) ກໍາລັງ ຈັບມືກັບນາຍົກລັດຖະມົນຕີ Ireland ທ່ານ Enda Kenny, ທີ່ນະຄອນຫລວງ Dublin, Ireland, ວັນທີ 20 ກຸມພາ 2012.

ທ່ານ​ຊີ ຈິ້ນ​ຜິ​ງ ຮອງ​ປະທານ​ປະ​ເທດ​ຈີນ ທີ່​ກໍາລັງ​ຢ້ຽມຢາມ​ປະ​ເທດ Ireland ​ເປັນ​ມື້​ທີ​ສອງ​ ​ໄດ້ຖະ​ແຫລ​ງ​ເຖິງ​ຄວາມ​ໝາຍໝັ້ນ​ຂອງ​ຈີນຕໍ່​ ຢູ​ໂຣບ​ ແລະ​ກ່າວ​ຊໍ້າ​ອີກ​ວ່າ ກຸງ​ປັກ​ກິ່ງ​ກໍາລັງ​ພິຈາລະນາທໍາ​ການລົງທຶນ​ຕື່ມ​ອີກ ​ເພື່ອ​ຊ່ອຍ​ເຮັດ​ໃຫ້​ເງິນ​ຢູ​ໂຣທີ່​ພວມ​ປະ​ເຊີນ​ກັບ​ບັນຫານັ້ນ
ມີ​ສະຖຽນ​ລະ​ພາບ.

ໃນ​ການ​ໂອ້​ລົມ​ສົນທະນາ​ກັບ​ນາຍົກລັດຖະມົນຕີ Enda Kenny ​ໃນ ແລງ​ວັນ​ອາທິດ​ວານ​ນີ້ ທ່ານ​ຊີ ກ່າວ​ວ່າ ຈີນ​ສະໜັບສະໜຸນ​ສະຖຽນລະ​ພາບຂອງ​ເງິນ​ຢູ​ໂຣ​ແລະ​ເຂດ​ຢູ​ໂຣ.

ສ່ວນທ່ານ Kenny ກ່າວ​ວ່າ Ireland ມີ​ຄວາມ​ເຕັມ​ໃຈ​ທີ່​ຈະ​ສ້າງສາ​ຍພົວພັນທີ່​ໃກ້ຊິດ​ຂຶ້ນ​ກັບ​ຈີນ ​ແລະ​ຫວັງ​ວ່າ​ຈະ​ມີ​ການ​ຮ່ວມ​ມື​ຫລາຍ​ຂຶ້ນໃນ​ດ້ານ​ການ​ຄ້າ ການ​ລົງທຶນ ການ​ສຶກສາ ການ​ກະ​ເສດ​ແລະ​ການທ່ອງທ່ຽວ.

ໃນ​ວັນ​ອາທິດ​ວານ​ນີ້​ເຊ່ນ​ກັນ ລັດຖະມົນຕີ​ການ​ເງິນ​ຍີ່ປຸ່ນ​ທ່ານ Jun Azumi ກໍ​ໄດ້​ພົບ​ປະ​ກັບ​ທ່ານ Wang Qishan ຮອງ​ນາຍົກລັດຖະມົນຕີ​ຈີນ​ທີ່​ກຸງ​ປັກ​ກິ​ງ ​ເພື່ອ​ໂອ້​ລົມ​ສົນທະນາ​ກັນ​ເລື້ອງ​ການ​ຮ່ວມ​ມື​ດ້ານ​ການ​ເງິນ​ລະຫວ່າງ​ສອງ​ຝ່າຍ ​ແລະ​ເພື່ອ​ປະສານທ່າ​ທີກັນ​ກ່ຽວ​ກັບ​ການ​ຊ່ອຍ​ເຫລືອ​ຕໍ່​ຢູ​ໂຣບ​ ເພື່ອ​ຊ່ອຍ​ແກ້​ໄຂ​ວິ​ກິດ​ການໜີ້​ສິນ​ຂອງຢູ​ໂຣບນັ້ນ.

ພວກ​ເຈົ້າ​ໜ້າ​ທີ່​ທັງ​ສອງ​ໄດ້​ຮັບປາກ​ທີ່​ຈະ​ຕອບ​ສະໜອງ​ຮ່ວມ​ກັນ​ ຕໍ່ຄໍາ​ຮ້ອງ​ຂໍ​ເງິນ​ໃດໆ​ຈາກ​ກອງ​ທຶນ​ສາກົນ​ຫລື IMF ຊຶ່ງ​ກໍາລັງ​ພິຈາລະນາຈະເພີ່ມຂຶ້ນ​ອີກເປັນຫລາຍ​ກວ່າ​ສອງ​ເທົ່າ​ໂຕ​ ​ເງິນ​ທຶນ​ຂອງ​ຕົນ​ສໍາ​ລັບ​ຊ່ອຍ​ເຫລືອ​ປະເທດ​ຕ່າງໆ​ ຮັບ​ມື​ກັບ​ວິ​ກິດ​ການ​ໃນ​ເຂດຢູໂຣ ນັ້ນ.

XS
SM
MD
LG