ຈີນກ່າວວ່າ ພາກສ່ວນການຜະລິດຂອງຕົນຍັງສືບຕໍ່
ຂະຫຍາຍໂຕຂຶ້ນຢູ່ຕໍ່ມາ ໃນເດືອນພະຈິກຜ່ານມານີ້
ເຖິງແມ່ນມີຄວາມກົດດັນຈາກລາຄາສິນຄ້າທີ່ສູງຂຶ້ນນັບມື້
ກໍຕາມ.
ໃນວັນພຸດມື້ນີ້ ອົງການນຶ່ງທີ່ເປັນສາຂາຂອງລັດແຈ້ງໃຫ້
ຊາບວ່າ ມີການເພີ່ມຂຶ້ນ ເຄິ່ງນຶ່ງຂອງ 1 ເປີເຊັນ ໃນ
ໂຕເລກດັດຊະນີຜູ້ຈັດການຝ່າຍຊື້ ຫລື PMI ຂອງຕົນ
ຊຶ່ງວັດແທກດັດຊະນີຊີ້ບອກຈໍານວນນຶ່ງ ຮວມທັງການ
ຜະລິດ ການສັ່ງຊື້ສິນຄ້າໃໝ່ແລະການຂົນສົ່ງສິນຄ້າໃໝ່
ນັ້ນ. ດັດຊະນີ PMI ສໍາລັບເດືອນພະຈິກຜ່ານມານີ້ ແມ່ນຢູ່ໃນອັດຕາ 55.2 ເປີເຊັນ.
ອັດຕາທີ່ສູງເກີນ 50 ເປີເຊັນຂຶ້ນໄປແມ່ນສະແດງວ່າການຜະລິດໄດ້ຂະຫຍາຍໂຕຂຶ້ນ.
ໂຕເລກດັດຊະນີຊິ້ບອກອີກອັນນຶ່ງຕ່າງຫາກທີ່ພິຈາລະນາຂໍ້ມູນອື່ນໆເພິ່ມຕື່ມ ກໍໄດ້ເພີ່ມຂຶ້ນສູ່
ລະດັບສູງສຸດໃນຮອບ 8 ເດືອນຜ່ານມາ ໂດຍມີອັດຕາຢູ່ 55.3 ເປີເຊັນ. ດັດຊະນີທີ່ວ່ານີ້
ແມ່ນເຮັດຂຶ້ນມາໂດຍສາຂາໃນປະເທດຈີນ ຂອງບໍລິສັດ HSBC ຂອງອັງກິດ ຊຶ່ງເປັນ
ບໍລິສັດບໍລິການ ທາງການເງິນໃນທົ່ວໂລກ.
ທັງສອງລາຍງານນີ້ກ່າວວ່າ ການຂະຫຍາຍໂຕຂອງພາກສ່ວນການຜະລິດຂອງຈີນໄດ້
ມີຂຶ້ນ ເຖິງແມ່ນລາຄາສໍາລັບອຸບປະກອນການຜະລິດເຄື່ອງອາໄຫລ່ແລະວັດຖຸດິບ ທີ່ໃຊ້
ໃນໂຮງຈັກໂຮງງານແພງຂຶ້ນນັບມື້ ກໍຕາມ.
