ອົງການຂ່າວຊິນຫົວທາງການຈີນກ່າວວ່າ ຕໍາຫລວດໄດທໍາການຈັບກຸມປະຊາຊົນຈໍານວນຫລາຍກວ່າ 12 ພັນຄົນ ແລະຍຶດຢາເສບຕິດຜິດກົດໝາຍໄດ້ 300 ກິໂລ ໃນການປາບປາມການຄ້າຂາຍຢາເສບຕິດໃນທົ່ວປະເທດ ໂດຍຜ່ານທາງຄອມພີວເຕີໃນເວັບໄຊ້ທ໌ສົນທະນາກັນນັ້ນ.
ອົງການຂ່າວຊິນຫົວທາງການຈີນກ່າວວ່າ ພວກເຈົ້າໜ້າທີ່ໄດ້ຮັບຄໍາສັ່ງໃຫ້ຕິດຕາມເບິ່ງກ່ຽວກັບການຄ້າຂາຍຢາເສບຕິດທາງຄອມພີວເຕີນີ້ ຫລັງຈາກມີການພົບເຫັນຫ້ອງເວັບໄຊ້ສົນທະນາກັນທາງຄອມພີວເຕີຫລາຍໆແຫ່ງທີ່ຂາຍຢາເສບຕິດໃນເມືອງ ລານໂຈ ແລະເມືອງຊີອານ ໃນພາກຕາເວັນຕົກຂອງປະເທດ.
ອົງການຂ່າວຊິນຫົວກ່າວວ່າ ພວກລູກຄ້າໃໝ່ສາມາດເຂົ້າໄປເວັບໄຊ້ສົນທະນາກັນນີ້ໄດ້ ຖ້າຫາກເຂົາເຈົ້າຖືກແນະນໍາໂດຍພວກທີ່ໃຊ້ເວັບໄຊ້ທ໌ນີ້ຢູ່ແລ້ວເທົ່ານັ້ນ.
ຕໍາຫລວດໄດ້ເລີ້ມທໍາການຈັບກຸມພວກຜູ້ຕ້ອງສົງໄສໃນຄະດີນີ້ໃນເດືອນກັນຍາຜ່ານມາ.
