ຈີນກ່າວວ່າ ຕົນວາງແຜນການທີ່ເລີ່ມທົບທວນເບິ່ງຄວາມ
ພະຍາຍາມຕ່າງໆ ຂອງພວກບໍລິສັດຕ່າງປະເທດ ເພື່ອເຂົ້າ
ຄວບຄຸມຜົນປະໂຫຍດຂອງຈີນນັ້ນ ເພື່ອເບິ່ງວ່າມັນເປັນ ໄພຕໍ່ຄວາມໝັ້ນຄົງຂອງຈີນຫລືບໍ່.
ລັດຖະບານຈີນກ່າວເມື່ອວັນເສົາວານນີ້ວ່າ ໃນເດືອນມີນາ
ຄືເດືອນໜ້ານີ້ ຕົນຈະຈັດຕັ້ງອົງການທົບທວນການລົງທຶນ
ລະດັບລັດຂຶ້ນ ເພື່ອພິຈາລະນາຂໍ້ສະເໜີຕ່າງໆຂອງບໍລິສັດ
ຕ່າງປະເທດຢ່າງລະອຽດຖີ່ຖ້ວນ ທີ່ຈະເຂົ້າຮ່ວມກັບ ຫລື
ວ່າຊື້ເອົາ ພວກບໍລິສັດໃຫຍ່ໆຂອງຈີນນັ້ນ ເພື່ອເບິ່ງວ່າ
ສົມຄວນຈະຂັດຂວາງຫລືບໍ່. ລັດຖະບານຈີນກ່າວວ່າ
ພວກເຈົ້າໜ້າທີ່ ທີ່ທໍາການທົບທວນນັ້ນ ແມ່ນມີຄວາມ
ຮັບຜິດຊອບທີ່ຈະປົກປ້ອງຄວາມລັບຕ່າງໆຂອງລັດ
ແລະຄວາມລັບທາງທຸລະກິດ ເພື່ອຄຸ້ມຄອງຄວາມໝັ້ນ ຄົງຂອງຊາດເອົາໄວ້.
ເມື່ອປີຜ່ານມານີ້ ຈີນ ຊຶ່ງເປັນປະເທດທີ່ມີເສດຖະກິດໃຫຍ່ອັນດັບສອງຂອງໂລກນັ້ນ ໄດ້ດຶງດູດເອົາການລົງທຶນໂດຍກົງ ຈາກຕ່າງປະເທດ ເປັນມູນຄ່າ ຫລາຍກວ່າ 105 ພັນລ້ານໂດລາ. ແຕ່ການທົບທວນຄັ້ງໃໝ່ນີ້ ອາດເຮັດ ໃຫ້ການເຂົ້າສູ່ຕະຫລາດຈີນ ຂອງພວກນັກລົງທຶນຕ່າງປະເທດນັ້ນມີຄວາມລໍາບາກຫລາຍຂື້ນ.
