ລິ້ງ ສຳຫລັບເຂົ້າຫາ

logo-print

ຈີນ​ລາຍ​ງານ​ວ່າ ມີ​ຄົນ​ຕິດເຊື້ອ ​ໄວ​ຣັ​ສໂຄວິດ -19 ລາຍ​ໃໝ່ ພຽງ 8 ຄົນ ເທົ່າ​ນັ້ນ ໃນ​ມື້ນີ້​


ພະ​ນັກ​ງານ​ແພດ​ພ​ວມ​ຍ່າງ​ອອກ​ຈາກຕູບ​ຜ້າ​ເຕັ້ນ​ທີ່​ກາງ​ໄວ້ເພື່ອ​ດຳ​ເນີນການກວດ​ຫາ​ໄວ​ຣັ​ສ ໂຄ​ໂຣ​ນາ ແນ​ໃສ່ຊ່ວຍ​ຫລຸດ​ຜ່ອນ​ການ​ອັ່ງອໍ​ຂອງ​ຄົນຢູ່​ໃນ​​ໂຮງ​ໝໍ Brescia ທາງ​ພາກ​ເໜືອ​ຂອງ​ອີ​ຕາ​ລີ, ວັນ​ທີ 12 ມີ​ນາ, 2020.

ຈີ​ນລາຍ​ງານ​ວ່າ ມີ​ຄົນຕິດ​ເຊື້ອ​ໄວ​ຣັ​ສໂຄວິດ-19 ລາຍ​ໃໝ່ 8 ຄົນ​ ໃນ​ວັນ​ສຸກມື້ນີ້.

ມັນ​ເປັນ​ສິ່ງ​ທີ່ປ່ຽນ​ແປງດີ​ຂຶ້ນຢ່າງ​ໜ້າ​ເຫລືອ​ເຊື່ອ ສຳ​ລັບ​ຈີນບ່ອນ​ທີ່​ມີ​ການຕິດ​ເຊື້ອ​ໄວ​ຣັ​ສດັ່ງ​ກ່າວ​ລາຍໃໝ່​ ຫລາຍ​ພັນ​ຄົນ​ໃນ​ແຕ່​ລະ​ມື້.

ເຊື້ອ​ໄວ​ຣັ​ສນີ້ ​ທຳ​ອິດ​ໄດ້​ປາ​ກົດ​ຂຶ້ນ​ຢູ່​ໃນ​ເມືອງວູ​ຫານຂອງ​ຈີນ​ໃນ​ປີ​ກາຍນີ້.

ເຖິງ​ແມ່ນ​ວ່າ ການ​ເພີ້ມ​ຂຶ້ນ​ຂອງ​ຈຳ​ນວນ​ຄົນຕິດ​ເຊື້ອ​ໄວ​ຣັ​ສນີ້ ຈະ​ມີ​ຕົວ​ເລກ​ທີ່ບໍ່​ຮອດ​ສິບ​ກໍ​ຕາມ ແຕ່​ວ່າເຊື້ອ​ໄວ​ຣັ​ສດັ່ງ​ກ່າວ​ຍັງ​ມີການ​ແຜ່​ກະ​ຈາຍ​ອອກໄປ ຢູ່ໃນ​ປະ​ເທດ​ເອ​ເຊຍແຫ່ງນັ້ນ​ຢູ່. ຍັງ​ມີຄົນ​ຈີນ​ຫລາຍ​ພັນ​ຄົນທີ່​ຍັງຕິດ​ເຊື້ອ​ໄວ​ຣັ​ສທີ່ໄດ້​ແຜ່​ຜາຍໄປ​ທົ່ວ​ໂລກນີ້​ຢູ່.

ອົງ​ການຂ່າວ​ຂອງ​ທາງ​ການຈີນລາຍ​ງານ​ວ່າ ປ​ະ​ທານ​ປະ​ເທດ​ສີຈິ້ນ​ຜິງ​ຂອງຈີນ ລົມ​ກັບ​ເລ​ຂະ​ທິ​ການ​ໃຫຍ່ ​ອົງ​ການ​ສະ​ຫະ​ປະ​ຊາ​ຊາດ ແອນ​ໂທ​ນີ ກູແເຕ​ເຣສ (Antonio Guterres) ຜ່ານ​ທາງ​ໂທ​ລະ​ສັບ​ໃນ​ວັນ​ພະ​ຫັດ​ວານນີ້ວ່າ ຈີນ “ຈະ​ດຳ​ເນີນຄວາມ​ພະ​ຍາ​ຍາມ​ຂອງ​ຕົນ​ໃນ​ການ​ປ້ອງ​ກັນ ແລະ​ຄວບ​ຄຸມການຕິດ​ເຊື້ອ​ໄວ​ຣັ​ສດັ່ງ​ກ່າວຢ່າງບໍ່​ລົດລະ, ໜັກ​ແໜ້ນ ແລະຢ່າງພິ​ຖີ​ພິ​ຖັນ.”

ພ້ອມ​ກັນ​ນັ້ນ, ອົງ​ການ​ຂ່າວ​ຊິນ​ຫົວ​ຍັງ​ລາຍ​ງານ​ອີກວ່າ ປະ​ທານ​ປະ​ເທດ​ຈີນເວົ້າ​ວ່າ ຈີນພ້ອມ​ແລ້ວ ​ທີ່​ຈະ​ແບ່ງ​ປັນປະ​ສົບ​ການຂອງ​ຕົນ​ ໃນ​ການແກ້​ໄຂບັນ​ຫາ ແລະ​ດຳ​ເນີນ​ການ​ຄົ້ນ​ຄວ້າແລະ​ພັດ​ທະ​ນາ​ຢາ​ປົວ ແລະ​ຢາວັກ​ຊິນປ້ອງ​ກັນ​ໄວ​ຣັ​ສ ນີ້​ຮ່ວມ​ກັບ​ປະ​ເທດ​ອື່ນ.

ມີ​ກໍ​ລະ​ນີ​ຄົນ​ຕິດ​ເຊື້ອ​ໄວ​ຣັ​ສໂຄ​ໂຣ​ນາ ຫລາຍກວ່າ 134,000 ລາຍ ຢູ່​ໃນ 127 ປະ​ເທດ ແລະ​ດິນ​ແດນຕ່າງໆ, ຊຶ່ງ​ເປັນ​ຈຳ​ນວນ​ທີ່​ນ້ອຍໆ ເມື່ອ​ທຽບ​ກັບ​ພົນ​ລະ​ເມືອງ 7 ຕື້​ຄົນຂອງ​ໂລກ.

ແຕ່​ວ່າ ການ​ລະ​ບາດ​ໃນ​ລະ​ດັບ​ໂລກ​ອັນ​ນີ້ໄດ້​ເຮັດ​ໃຫ້​ຊີ​ວິດຂອງ​ເກືອບ​ໝົດ​ທຸກ​ຄົນ ທັງ​ຜູ້​ຊາຍ, ແມ່​ຍິງ ແລະ​ເດັກ​ນ້ອຍ​ ສັບ​ສົນ​ວຸ້ນ​ວາຍໄປ​ໝົດ.

ທ່ານ​ນາງ ແນນ​ຊີ ເພີ​ໂລ​ຊີ, ປະ​ທານ​ສະ​ພາ​ຕ່ຳ ໃນ​ວັນ​ພະ​ຫັດ​ວານນີ້ ໄດ້​ໂຜ່​ຕົວ​ອອກ​ມາ​ຈາກ​ການປະ​ຊຸມ ​ກັບ​ບັນດາ​ສະ​ມາ​ຊິກ​ລັດ​ຖະ​ສະ​ພາ​ກ່ຽວ​ກັບນິ​ຕິ​ກຳ​ໃນ​ການ​ຮັບ​ມື​ກັບເຊື້ອ​ໄວ​ຣັ​ສໂຄ​ໂຣ​ນາ. ທ່ານ​ນາງ​ເວົ້າ​ວ່າ ທ່ານ​ນາງ​ຫວັງ​ວ່າ ບັນ​ດາ​ນັກ​ການ​ເມືອງ​ທັງ​ຫລາຍຈະ​ມີການ​ປະ​ກາດ​ໃນ​ວັນ​ສຸກມື້ນີ້ ກ່ຽວ​ກັບ​ມາດ​ຕະ​ການ​ທີ່​ພວກ​ເພິ່ນເຫັນ​ພ້ອມ​ນຳ​ກັນ ທີ່​ຈະ​ຊ່ວຍ​ຄົນ​ອາ​ເມ​ຣິ​ກັນ​ທັງ​ຫລາຍ​ແກ້​ໄຂ​ສະ​ພາບ​ວຸ້ນ​ວາຍ​ທີ່​ເກີດ​ມາ​ຈາກ​ໄວ​ຣັ​ສນີ້ຢູ່​ໃນ​ຊີ​ວິດ​ປະ​ຈຳ​ວັນ​ຂອງ​ເຂົາ​ເຈົ້າໄດ້.

ມີ​ຄົນສ່ວນໜ້ອຍຢູ່​ໃນ​ສະ​ຫະ​ລັດ​ທີ່​ສາ​ມາດ​ຫລີກ​ລ້ຽງ​ຈາກ​ຜົນ​ກະ​ທົບ​ ຍ້ອນການ ລະ​ບາດ​ຂອງເຊື້ອໄວຣັສໂຄໂຣນາໄດ້​ແບບ​ໃດ​ແບບ​ນຶ່ງ ລວມ​ທັງທ່ານ​ປະ​ທາ​ນາ​ທິ​ບໍ​ດີ.

ອ່ານ​ຂ່າວນີ້​ເພີ້ມ​ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG