ປະທານປະເທດຈີນທ່ານ Hu Jintao ໄດ້ສະເຫຼີມສະຫຼອງວັນຄົບຮອບ 90 ປີໃນການສ້າງ
ຕັ້ງພັກຄອມມູນິສຈີນໃນວັນສຸກມື້ນີ້ໂດຍກ່າວຕໍ່ພວກເຈົ້າໜ້າທີ່ແລະສະມາຊິກຂອງພັກຈຳນວນ
ຫຼາຍພັນຄົນວ່າ ພັກຄອມມູນິສຕ້ອງຮັບປະກັນໃນການເຕີບໂຕຂອງເສດຖະກິດຂະນະທີ່ຄວບ
ຄຸມສະຖຽນລະພາບຂອງພົນລະເມືອງ.
ໃນຄຳປາໄສທາງໂທລະພາບເປັນເວລາ 1 ຊົ່ວໂມງເຄິ່ງຢູ່ຫໍສາລາປະຊາຊົນທີ່ນະຄອນຫຼວງ
ປັກກິ່ງນັ້ນທ່ານ Hu ໄດ້ລະບຸວ່າການສໍ້ລາດບັງຫຼວງແມ່ນຈະແຈ້ງແລະເປັນໄພອັນຕະລາຍ
ໃນປັດຈຸບັນຕໍ່ຄວາມຖືກຕ້ອງຊອບທຳ ໃນການປົກຄອງຂອງພັກຄອມມູນິສ. ທ່ານເຕືອນວ່າ
ການສໍ້ລາດບັງຫຼວງ ຈະເຮັດໃຫ້ພັກສູນເສຍການສະໜັບສະໜຸນແລະຄວາມໄວ້ເນື້ອເຊື່ອໃຈ
ຂອງປະຊາຊົນ.
ຜູ້ນຳຂອງຈີນ ຍັງກ່າວຕື່ມວ່າ ພັກໄດ້ຖອດຖອນບົດຮຽນ ຈາກຄວາມຜິດພາດແລະຈັດແຈງ
ຫາທາງແກ້ໄຂ. ທ່ານບໍ່ໄດ້ເວົ້າເຖິງນະໂຍບາຍຕ່າງໆຂອງພັກໃນໄລຍະສອງສາມທົດສະວັດ
ທຳອິດຢ່າງເປັນການສະເພາະທີ່ເປັນເຫດໃຫ້ປະຊາຊົນຈຳນວນຫຼາຍລ້ານຄົນລົ້ມຕາຍໄປນັ້ນ.
