ສື່ມວນຊົນແຫ່ງລັດຂອງຈີນ ກ່າວວ່າ ພວກພະນັກງານ 24 ຄົນ
ໄດ້ເສຍຊີວິດໃນໄຟໄໝ້ຢູ່ບໍ່ຖ່ານຫິນແຫ່ງນຶ່ງໃນພາກຕາເວັນ
ອອກສຽງເໜືອຂອງປະເທດ.
ອົງການຂ່າວຊິນຫົວ ຂອງທາງການຈີນ ກ່າວວ່າ ໄຟໄໝ້ໃນບໍ່
ຖ່ານຫິນ ໃນແຂວງ Liaoning ຍັງເຮັດໃຫ້ພວກພະນັກງານ
ໃນບໍ່ອີກ 52 ຄົນໄດ້ຮັບບາດເຈັບເຊັ່ນກັນ.
ອຸບັດເຫດດັ່ງກ່າວ ໄດ້ເກີດຂຶ້ນໃນບໍ່ຖ່ານຫີນແຫ່ງນຶ່ງຂອງບໍລິສັດ
ລັດວິສາຫະກິດ Fuxin Coal Company ເປັນເຈົ້າຂອງ ແລະ
ເປັນອຸບັດເຫດຄັ້ງຫຼ້າສຸດໃນບໍ່ຖ່ານຫິນທີ່ມີຜູ້ຄົນເສຍຊີວິດໃນຈີນ.
ໂຕເລກຂອງລັດຖະບານສະແດງໃຫ້ເຫັນວ່າ ມີອຸບັດເຫດທີ່ພົວພັນກັບບໍ່ ຖ່ານຫິນ 589 ຄັ້ງ ເກີດຂຶ້ນໃນຈີນໃນປີແລ້ວນີ້ ເຮັດໃຫ້ຜູ້ຄົນຈຳນວນຫລາຍກວ່າ 1 ພັນຄົນເສຍຊີວິດ ຫຼືຫາຍສາບສູນໄປ ຊຶ່ງນີ້ເປັນຈຳນວນ 23 ເປີເຊັນ ຫລຸດຈາກປີກ່ອນ ແຕ່ບັນດານັດວິເຄາະເຫດການກ່າວວ່າ ໂຕເລກແທ້ໆນັ້ນ ເບິ່ງຄືວ່າສູງກວ່ານັ້ນຕັ້ງຫລາຍ ເນື່ອງຈາກວ່າ ອຸບັດເຫດຫຼາຍຄັ້ງ ບໍ່ໄດ້ລາຍງານໃຫ້ຜູ້ຄົນຊາບ.
ບັນດາເຈົ້າໜ້າທີ່ໄດ້ດຳເນີນງານມາ ເພື່ອຈັດຕັ້ງປະຕິບັດມາດຕະຖານດ້ານຄວາມປອດໄພທີ່ເຄັ່ງຄັດຂຶ້ນ ແລະອັດພວກບໍ່ຖ່ານຫິນທີ່ນ້ອຍໆລົງ ຊຶ່ງພວກບໍ່ຖ່ານຫິນເຫຼົ່ານີ້ ມັກຈະບໍ່ມີກົດລະບຽບບັງຄັບນັ້ນ.
ຈີນເປັນປະເທດທີ່ໃຊ້ຖ່ານຫີນຫລາຍທີ່ສຸດໃນໂລກ.
