ຈີນ ໄດ້ກ່າວວ່າ ສະຫະລັດ ແມ່ນ “ຜູ້ທຳລາຍສັນຕິພາບ ແລະ ຄວາມໝັ້ນຄົງໃນພາກພື້ນທີ່ໃຫຍ່ທີ່ສຸດ” ໃນໂລກໃນການຕອບໂຕ້ໃນວັນພຸດມື້ນີ້ຕໍ່ລາຍງານຂອງທຳນຽບຂາວທີ່ຖືກເປີດເຜີຍເມື່ອວັນທີ 19 ຕຸລາທີ່ຜ່ານມາ ກ່ຽວກັບ ຂະໜາດຂອງກອງທັບທີ່ກຳລັງຂະຫຍາຍຕົວຂອງ ຈີນ.
ລາຍງານປະຈຳປີດັ່ງກ່າວທີ່ຖືກຮຽກຮ້ອງໂດຍລັດຖະສະພາ ແມ່ນວິທີນຶ່ງທີ່ທຳນຽບຂາວວັດແທກຄວາມສາມາດທາງທະຫານຂອງ ຈີນ, ເຊິ່ງລັດຖະບານ ສະຫະລັດ ເຫັນວ່າເປັນໄພຂົ່ມຂູ່ທີ່ສຳຄັນຂອງເຂົາເຈົ້າໃນພາກພື້ນ ເອເຊຍ-ປາຊີຟິກ ແລະ ເປັນສິ່ງທ້າທາຍດ້ານຄວາມປອດໄພໄລຍະຍາວຕົ້ນຕໍຂອງ ອາເມຣິກາ.
ຖະແຫຼງການຂອງກະຊວງປ້ອງກັນປະເທດຂອງຈີນ ຖືກປະກາດອອກມາເພື່ອຕອບໂຕ້ໃນສິ່ງທີ່ຖືກເອີ້ນວ່າເປັນລາຍງານການຄົ້ນພົບທີ່ບໍ່ຖືກຕ້ອງໂດຍທຳນຽບຫ້າແຈ ແລະ ໄດ້ໃຊ້ມັນເພື່ອຕອບໂຕ້ຕໍ່ການກະທຳເມື່ອບໍ່ດົນມານີ້ຂອງ ສະຫະລັດ ໃນການຊ່ວຍເຫຼືອ ອິສຣາແອລ ແລະ ຢູເຄຣນ, ພ້ອມກັບການສ້າງຖານທັບຂອງເຂົາເຈົ້າໃນທົ່ວໂລກ.
ທ່ານ ຫວູ ຈຽນ, ໂຄສົກຂອງກະຊວງປ້ອງກັນປະເທດ ຈີນ ໄດ້ກ່າວວ່າ “ສະຫະລັດ ໄດ້ສົ່ງລູກປືນທີ່ມີສານຢູເຣນຽມ ແລະ ລະເບີດລູກຫວານຈຳນວນຫຼວງຫຼາຍໄປ ຢູເຄຣນ, ໄດ້ສົ່ງກຸ່ມກຳປັ່ນລົບຂອງເຂົາເຈົ້າໄປທະເລເມດີເທີເຣນຽນ ແລະ ອາວຸດ ແລະ ລູກປືນໄປໃຫ້ ອິສຣາແອລ, ອັນນີ້ບໍທີ່ຜູ້ທີ່ເອີ້ນຕົນເອງວ່າ “ຜູ້ປ້ອງກັນສິດທິມະນຸດ” ນຳເອົາໄປສູ່ຂົງເຂດນັ້ນ?
