ຈີນ ແລະເກົາຫຼີໃຕ້ ໄດ້ຮຽກຮ້ອງ ໃຫ້ຍີ່ປຸ່ນ ໄຕ່ຕອງຄືນເບິ່ງ
ປະຫວັດ ສາດການຮຸກຮານຂອງຕົນ ມື້ນຶ່ງ ຫລັງຈາກທີ່ໂຕກຽວ
ໄດ້ຢືນຢັນວ່າ ນາຍົກລັດຖະມົນຕີ Shinzo Abe ໄດ້ສົ່ງສານ
ສ່ວນຕົວໄປຍັງພິທີໃຫ້ກຽດ ແກ່ຊາວຍີ່ປຸນທີ່ເປັນອາຊະຍາກອນ
ສົງຄາມ ໃນສະໄໝສົງຄາມໂລກຄັ້ງທີສອງ.
ສານຂອງທ່ານ ນາຍົກລັດຖະມົນຕີ Abe ໄດ້ຖືກອ່ານຢູ່ໃນ
ພິທີເມື່ອເດືອນເມສາຜ່ານມາ ທີ່ໄດ້ຈັດຂຶ້ນຢູ່ວັດແຫ່ງນຶ່ງທາງ
ພາກຕາເວັນຕົກຂອງຍີ່ປຸ່ນເພື່ອເປັນກຽດແກ່ພວກທີ່ໄດ້ຖືກ
ຕັດສິນວ່າມີຄວາມຜິດແລະ ສົງໄສວ່າໄດ້ກໍ່ອາຊະຍາກຳ
ສົງຄາມຫຼາຍຮ້ອຍຄົນ. ຢູ່ໃນສານດັ່ງກ່າວ ທ່ານ Abe ໄດ້
ສະແດງຄວາມເສົ້າສະລົດໃຈ ຕໍ່ການເສຍຊີວິດ ຂອງພວກຜູ້ນຳໃນປາງສົງຄາມ ທີ່ທ່ານ
ກ່າວວ່າ “ໄດ້ສະຫຼະວິນຍານເຂົາເຈົ້າ ເພື່ອເປັນພື້ນຖານຂອງປະເທດ.”
ຫົວໜ້າກອງເລຂາປະຈຳຄະນະລັດຖະບານຍີ່ປຸ່ນ ທ່ານ Yoshihide Suga ໄດ້ຮັບຮູ້
ໃນວັນພຸດວານນີ້ ວ່າ ທ່ານ Abe ໄດ້ສົ່ງສານສ່ວນຕົວແທ້ ແຕ່ທ່ານກ່າວວ່າ ການກະທຳ
ດັ່ງກ່າວ ແມ່ນໃນນາມທີ່ ທ່ານ Abe ເປັນຫົວໜ້າພັກລັດຖະບານ ທີ່ປົກຄອງປະເທດຍີ່ປຸ່ນ ແລະບໍ່ແມ່ນໃນນາມນາຍົກລັດຖະມົນຕີ.
ໃນວັນພະຫັດມື້ນີ້ ໂຄສົກກະຊວງການຕ່າງປະເທດຈີນ ທ່ານ Qin Gang ໄດ້ຮຽກຮ້ອງ
ໃຫ້ຍີ່ປຸ່ນ “ແຍກໂຕອອກຢ່າງຈະແຈ້ງຈາກລັດທິທະຫານ” ເພື່ອຈະໄດ້ຊ່ວຍຕອບ
ສະໜອງຕໍ່ພື້ນຖານການພົວພັນຕ່າງໆ ທີ່ດີຂຶ້ນ ກັບບັນດາປະເທດເພື່ອນບ້ານຂອງຕົນ
ໃນເອເຊຍ.
ໂຄສົກກະຊວງການຕ່າງປະເທດເກົາຫຼີໃຕ້ ທ່ານ Noh Kwang-il ໄດ້ກ່າວວ່າ ເກົາຫຼີໃຕ້
ແມ່ນມີ “ຄວາມກັງວົນຢ່າງເລິກເຊິ່ງ” ກ່ຽວກັບທ່າທີຂອງທ່ານ Abe ນັ້ນ.
ບັນດາຜູ້ນຳຂັ້ນສູງຂອງຈີນ ແລະ ເກົາຫຼີໃຕ້ ໄດ້ປະຕິເສດ ທີ່ຈະພົບປະກັບນາຍົກລັດຖະມົນຕີ Abe ນັບຕັ້ງແຕ່ທ່ານໄດ້ໄປຢ້ຽມຢາມສານບັນພະຊົນ Yasukuni Shrine ທີ່ໃຫ້ກຽດແກ່
ອາຊະຍາກອນສົງຄາມ ລະດັບນຶ່ງ ຈຳນວນ 14 ຄົນ ທີ່ຍັງເປັນບັນຫາ ໂຕ້ຖຽງກັນນັ້ນ.
