ນາຍົກລັດຖະມຸນຕີ David Cameron ແຫ່ງອັງກິດກໍາລັງຢູ່ໃນປະເທດຈີນ ຊຶ່ງຕິດຕາມໄປ
ດ້ວຍ ພວກລັດຖະມຸນຕີ 4ທ່ານໃນວົງການລັດຖະບານຂອງທ່ານແລະພວກຜູ້ນໍາທຸລະກິດ
ຫລາຍກວ່າ 40 ທ່ານ ໂດຍຕັ້ງຄວາມຫວັງໄວ້ວ່າ ຈະເພີ່ມການຄ້າກັບປະເທດເອເຊຍແຫ່ງ
ນີ້ຂຶ້ນ ເປັນສອງເທົ່າໂຕ ພາຍໃນປີ 2015 ນັ້ນ.
ຄະນະຜູ້ຕາງໜ້າເຫລົ່ານີ້ ຊຶ່ງທໍາການພົບປະຫາລືກັບພວກເຈົ້າໜ້າທີ່ຈີນໃນວັນອັງຄານມື້ນີ້
ແລະວັນພຸດມື້ອື່ນ ກ່ອນຈະເດີນທາງຕໍ່ໄປຍັງເກົາຫລີໃຕ້ ເພື່ອໄປຮ່ວມກອງປະຊຸມສຸດຍອດ
ຂອງກຸ່ມ G20 ນັ້ນ ນັບວ່າເປັນຄະນະຜູ້ແທນກຸ່ມໃຫຍ່ທີ່ສຸດຂອງອັງກິດ ທີ່ບໍ່ເຄີຍມີມາກ່ອນ ທີ່ໄດ້ເດີນທາງໄປຍັງຈີນນັ້ນ
.
ທ່ານ Cameron ກ່າວວ່າ ທ່ານຢາກໃຫ້ຍົກຄວາມສໍາພັນລະຫວ່າງສອງປະເທດຂຶ້ນສູ່ ລະດັບໃໝ່.
ນາຍົກລັດຖະມຸນຕີອັງກິດເປັນຜູ້ນໍາຈາກຝ່າຍຕາເວັນຕົກຄົນທໍາອິດ ທີ່ໄປຢ້ຽມຢາມກຸງປັກ
ກິ່ງ ນັບແຕ່ມີການມອບລາງວັນໂນແບນຂະແໜງສັນຕິພາບໃຫ້ແກ່ທ່ານ Liu Xiaobo ຜູ້
ຄັດຄ້ານລັດຖະບານຈີນ ທີ່ກໍາລັງຖືກຂັງຄຸກຢູ່ໃນເວລານີ້. ທ່ານ Cameron ກ່າວຕື່ມວ່າ
ທ່ານຈະທໍາການໂອ້ລົມສົນທະນາເລື້ອງສິດທິມະນຸດກັບພວກເຈົ້າພາບຂອງທ່ານ ແຕ່ຈະດໍາ
ເນີນໄປດ້ວຍຄວາມເຄົາລົບນັບຖື ແລະຄວາມເຂົ້າອົກເຂົ້າໃຈຊຶ່ງກັນແລະກັນ.
ແຕ່ການກະທໍາເຊັ່ນນີ້ອາດຈະບໍ່ເປັນທີ່ພໍໃຈ ແກ່ພວກນັກເຄື່ອນໄຫວດ້ານສິດທິມະນຸດ ທີ່
ໄດ້ພາກັນຮຽກຮ້ອງໃຫ້ທ່ານທໍາການໂອ້ລົມສົນທະນາກັບຈີນ ດ້ວຍທ່າທີທີ່ແຂງແຮງກ່ຽວກັບ ເລື້ອງນີ້.
