ບັນດາຜູ້ນໍາປະເທດທີ່ກໍາລັງພັດທະນາໃຫຍ່ທີ່ສຸດຂອງໂລກ
ກ່າວວ່າ ຄວາມວຸ້ນວາຍທີ່ກໍາລັງແຜ່ລາມໄປໃນທົ່ວລີເບຍ
ແລະໃນປະເທດອື່ນໆໃນພາກຕາເວັນອອກກາງຄວນຈະ
ໄດ້ຮັບການແກ້ໄຂໂດຍບໍ່ໃຊ້ກໍາລັງ.
ພວກຜູ້ນໍາຈາກຈີນ ຣັດເຊຍ ອິນເດຍ Brazil ແລະອາ
ຟຣິກາໃຕ້ຍັງກ່າວຕື່ມ ຫລັງຈາກການພົບປະຂັ້ນສຸດຍອດ
ກັນໃນພາກໃຕ້ຂອງຈີນ ໃນວັນພະຫັດມື້ນີ້ແລ້ວວ່າ ສະ
ພາຄວາມໝັ້ນຄົງສະຫະປະຊາຊາດຄວນຈະຖືກປະຕິຮູບ
ໃໝ່ເພື່ອໃຫ້ພວກປະເທດກໍາລັງພັດທະນາມີສຽງຫລາຍຂຶ້ນ.
4 ປະເທດທີ່ເອີ້ນຊື່ຮວມກັນວ່າ BRIC ນັ້ນ ໄດ້ທໍາການພົບປະກັນເພື່ອປົກປ້ອງຜົນປະໂຫຍດສ່ວນຮວມ ນັບແຕ່ປີ 2009 ເປັນຕົ້ນມາແລະໄດ້ເພີ່ມຊື່ອາຟຣິກາໃຕ້ເຂົ້າຕື່ມໃນປີນີ້ ແລະຊື່ຂອງກຸ່ມດັ່ງກ່າວໄດ້ປຽນມາເປັນ BRICS.
ໃນຖະແຫລງການຮ່ວມສະບັບນຶ່ງຫລັງຈາກການພົບປະກັນແລ້ວທີ່ເມືອງ Sanya ເທິງເກາະ Hainan ຂອງຈີນ ພວກຜູ້ນໍາເຫລົ່ານີ້ກ່າວວ່າ ພວກຕົນມີຄວາມເປັນຫ່ວງຢ່າງເລິກເຊິ່ງກ່ຽວ
ກັບຄວາມວຸ້ນວາຍໃນພາກຕາເວັນອອກກາງ ໃນທະວີບອາຟຣິກາເໜືອແລະເຂດອາຟຣິກາ
ຕາເວັນຕົກນັ້ນ.ພວກຜູ້ນໍາເຫລົ່ານີ້ເວົ້າຕື່ມວ່າ ພວກເຂົາເຈົ້າເຫັນດີນໍາຫລັກການທີ່ວ່າ ການໃຊ້ກໍາລັງນີ້ຄວນຈະຖືກຫລີກລ້ຽງ.
ຖະແຫລງການຮ່ວມສະບັບນີ້ບໍ່ໄດ້ບົ່ງຢ່າງເຈາະຈົງໃສ່ລີເບຍ ບ່ອນທີ່ກໍາລັງຂອງກຸ່ມເນໂຕ້ໄດ້ທໍາການໂຈມຕີທາງອາກາດເພື່ອຈັດຕັ້ງປະຕິບັດຕາມມະຕິເຂດຫ້າມການບິນທີ່ໄດ້ຮັບອະນຸມັດ
ຈາກສະຫະປະຊາຊາດແລະເພື່ອປົກປ້ອງພວກພົນລະເຮືອນຈາກການໂຈມຕີຂອງພວກທະ ຫານນິຍົມທ່ານກາດດາຟີ ຜູ້ນໍາລີເບຍນັ້ນ.
ແຕ່ປະທານາທິບໍດີ Dmitri Medvedev ແຫ່ງຣັດເຊຍ ກ່າວຕໍ່ກອງປະຊຸມນັກຂ່າວວ່າ ພວກຜູ້ນໍາທັງໝົດມີຄວາມເປັນຫ່ວງຢ່າງເລິກເຊິ່ງກ່ຽວກັບການຕາຍຂອງພວກພົນລະເຮືອນໃນລີເບຍ ແລະເຫັນດີວ່າວິກິດການດັ່ງກ່າວຄວນຈະໄດ້ຮັບການແກ້ໄຂໂດຍການດໍາເນີນການທາງການເມືອງແລະການທູດ ແລະບໍ່ແມ່ນດ້ວຍການໃຊ້ກໍາລັງ.
