ລິ້ງ ສຳຫລັບເຂົ້າຫາ

ວັນເສົາ, ໒໕ ພຶດສະພາ ໒໐໒໔

ຈີນປົດ ທ່ານໂບຊີຫຼາຍ ອອກຈາກ ພັກຄອມມີວນິດ


ທ່ານໂບຊີຫຼາຍ (ຂວາ) ແລະພັນລະຍາຂອງທ່ານ ທ່ານນາງ Gu Kailai ໃນພິທີໄວ້ອາໄລໃຫ້ທ່ານ Bo Yibo ມື້ລາງບິດາຂອງທ່ານ. (11 ເມສາ 2012)
ທ່ານໂບຊີຫຼາຍ (ຂວາ) ແລະພັນລະຍາຂອງທ່ານ ທ່ານນາງ Gu Kailai ໃນພິທີໄວ້ອາໄລໃຫ້ທ່ານ Bo Yibo ມື້ລາງບິດາຂອງທ່ານ. (11 ເມສາ 2012)

ໃນ​ວັນ​ພຸດ​ມື້​ນີ້ ສື່​ມວນ​ຊົນ​ຈີນ​ໄດ້​ກ່າວ​ຍ້ອງຍໍ​ການ​ຕັດສິນ​ໃຈ​ຂອງ​ພັກຄອມ​ມີ​ວນິດທີ່​ປົດ​ທ່ານ Bo Xilai ​ຊຶ່ງ​ເປັນ​ນຶ່ງ​ໃນ​ບັນດາ​ສະມາຊິກຂັ້ນ​ອາວຸ​ໂສ​ຂອງ​ພັກ​ອອກ​ຈາກ​ຕໍາ​ແໜ່​ງສູງ​ສຸດ​ທີ່​ພົວພັນ​ໃນຂ່າວ​ນອງ​ນັນທາ​ງການ​ເມືອງ​ທີ່​ບໍ່​ດີ​ຄັ້ງ​ໃຫຍ່​ທີ່​ສຸດ​ຂອງ​ຈີນ​ທີ່​ຈື່​ຈໍາ​ໄດ້ໃນ​ຫວ່າງ​ບໍ່​ດົນ​ຜ່ານ​ມາ​ນີ້.

ອົງການ​ຂ່າວ​ຊິນ​ຫົວ​ຂອງທາງ​ການ​ຈີນ​ລາຍ​ງານ​ໃຫ້​ຮູ້​ໃນ​ແລງ​ວັນ​ອັງຄານ​ວານ​ນີ້ວ່າ ທ່ານ Bo ​ໄດ້​ຖືກ​ປົດ​ອອກ​ຈາກ​ໜ້າ​ທີ່​ ໃນ​ຄະນະ​ກົມ​ການ​ເມືອງທີ່ມີ​ສະມາຊິກ 25 ທ່ານ ​ແລະ​ຄະນະ​ກໍາມະການ​ສູນ​ກາງ​ພັກ​ທີ່​ມີ​ສະມາຊິກ 300 ທ່ານ​ນັ້ນ ກ່ຽວ​ກັບ​ການລະ​ເມີດ​ກົດ​ລະບຽບ​ວິ​ໄນ​ຂອງ​ພັກຢ່າງ​ຮ້າຍ​ແຮງ​ ຊຶ່ງຢູ່​ໃນ​ຈີນ​ ​ຕາມ​ທໍາ​ມະ​ດາ​ແລ້ວນັ້ນ​ແມ່ນໝາຍ​ເຖິງການ​ສໍ້​ລາດ​ບັງ​ຫຼວງ​ນັ້ນ.

ຂ່າວ​ທີ່​ວ່າ​ນີ້​ມີ​ຂຶ້ນ​ຫຼັງ​ຈາກ​ການ​ປະກາດທີ່​ໜ້າ​ຕື່ນ​ຕົກ​ໃຈ​ທີ່​ວ່າ​ທ່ານນາງ Gu Kailai ພັນ​ລະ​ຍາ​ຂອງ​ທ່ານ Bo Xilai ​ໄດ້​ຖືກ​ຈັບ​ກຸມ​ໃນຖານເປັນ​ຜູ້​ຕ້ອງ​ສົງໄສ​ທີ່​ສໍາຄັນ​ໃນ​ການ​ຄາດ​ຕະກໍາ​ນາຍ Neil Heywood ນັກທຸລະກິດ​ອັງກິດທີ່​ລາຍ​ງານ​ເວົ້າ​ວ່າ ມີ​ສາຍ​ພົວພັນ​ທີ່​ໃກ້ຊິດ​ກັບຄອບຄົວ​ຂອງ​ທ່ານ Bo Xilai ນັ້ນ.

ທ່ານ Bo Xilai ນັກ​ການ​ເມືອງ​ທີ່​ມີ​ພອນ​ສະຫວັນ ​ໄດ້​ມີ​ການ​ພິຈາລະນາ​ກັນ​ວ່າ ​ເປັນ​ບຸກຄົນສໍາຄັນຜູ້​ນຶ່ງ​ສຳ​ຫຼັບ​ຕໍາ​ແໜ່​ງນໍາພາ​ໃນ​ຄະນະ​ກໍາມະການປະຈຳຄະນະ​ກົມການ​ເມືອງສູນ​ກາງ​ພັກ​ທີ່​ມີ​ອໍານາດ​ຫຼາຍ​ທີ່​ສຸດ​ຂອງ​ຈີນ​ເວລາ​ພວກ​ສະມາຊິກ 7 ຄົນ ​ໃນ​ຈໍານວນ 9 ຄົນ​ຂອງ​ຄະນະ​ດັ່ງກ່າວລາ​ອອກ​ຈາກ​ຕໍາ​ແໜ່​ງ​ໃນ​ທ້າຍ​ປີ​ນີ້ ຊຶ່ງ​ເປັນການ​ໂອນ​ອໍານາດ​ທີ່​ມີ​ຂຶ້ນ​ເທື່ອ​ນຶ່ງ​ໃນ​ແຕ່​ລະ​ນຶ່ງ​ທົດ​ສະ​ວັດ​ນັ້ນ.

ທ່ານ Victor Shin ຮອງ​ສາດສະດາຈານ​ສອນ​ວິຊາ​ລັດຖະສາດ​ທີ່ມະຫາວິທະຍາ​ໄລ Northwestern ກ່າວ​ວ່າ ​ຂ່າວ​ນອງ​ນັນທີ່​ບໍ່​ສູ້ເປີດ​ເຜີຍ​ໃຫ້​ປະຊາຊົນ​ຮູ້ ​ໄດ້​ເກີດ​ຂຶ້ນ​ຢູ່​ຫັງ​ສາກ​ຂອງ​ການ​ຊ່ວງຊີງ​ອໍານາດ​ກັນ​ໃນ​ພັກ​ຄອມ​ມີ​ວນິດ​ທີ່​ປົກຄອງ​ປະ​ເທດ​ໃນ​ປັດຈຸບັນ ກ່ອນ​ການ​ໂອນ​ອໍານາດ​ກັນ​ນັ້ນ.

XS
SM
MD
LG