ລາຍງານຂ່າວສະບັບນຶ່ງໃນວັນພະຫັດມື້ນີ້ກ່າວວ່າ ບັນດາຜູ້ຊ່ອຍວຽກຂອງທ່ານ Bo Xilai ນັກການເມືອງຈີນທີ່ໄດ້ຖືກປົດອອກຈາກຕໍາແໜ່ງຢ່າງອັບອາຍຂາຍໜ້າໄປນັ້ນ ໄດ້ຖືກພົບເຫັນໃນປີຜ່ານມາວ່າ ໄດ້ລັກຟັງສາຍທີ່ໂທລະສັບໄປຫາຄະນະນໍາພາລະດັບສູງສຸດແຫ່ງຊາດ ຮວມທັງປະທານປະເທດ ຫູຈິນເຖົານໍາ.
ໜັງສືພິມ New York Times ກ່າວວ່າ ເຄື່ອງດັກຟັງທີ່ທັນສະໄໝ ໄດ້ຖືກໃຊ້ສໍາລັບການລັກຟັງໂທລະສັບລະຫວ່າງທ່ານຫູຈິນເຖົາ ແລະ ເຈົ້າໜ້າທີ່ປາບການສໍ້ລາດບັງຫຼວງຂັ້ນອາວຸໂສທ່ານນຶ່ງ ຊຶ່ງກໍາລັງທໍາການຢ້ຽມຢາມເມືອງ Chongqing ຊຶ່ງເປັນເມືອງຂະໜາດໃຫຍ່ ໃນພາກຕາເວັນຕັກຂອງຈີນ ຊຶ່ງເວລານັ້ນແມ່ນຢູ່ພາຍໃຕ້ການປົກຄອງ ຂອງທ່ານ Bo Xilai.
ທ່ານ Bo ຖືກໄລ່ອອກຈາກຫົວໜ້າພັກຄອມມີວນິດປະຈໍາເມືອງດັ່ງກ່າວແລະຕໍ່ມາໄດ້ຖືກປົດອອກຈາກຕໍາແໜ່ງໃນພັກທັງໝົດຍ້ອນຂ່າວນອງນັນທີ່ສ້າງຄວາມສົນໃຈໃຫ້ແກ່ປະຊາຊົນຊາວຈີນ. ການຕົກຈາກ ຕໍາແໜ່ງຂອງທ່ານສ່ວນໃຫຍ່ແມ່ນສືບເນື່ອງມາຈາກຂໍ້ກ່າວຫາຕ່າງໆ ທີ່ວ່າ ພັນລະຍາຂອງທ່ານ Bo ໄດ້ຖືກຊັດທອດໃສ່ວ່າເປັນຜູ້ສັງຫານ ນັກທຸລະກິດອັງກິດຄົນນຶ່ງ ແຕ່ໜັງສືພິມ New York Times ອ້າງຄໍາເວົ້າຂອງບັນດາເຈົ້າໜ້າທີ່ວ່າ ການລັກຟັງໂທລະສັບນີ້ກໍເປັນປັດໄຈນຶ່ງເຊ່ນກັນ.
ເບິ່ງວີດີໂອ ທ່ານໂບ ຊີຫຼາຍ ຍັງສືບຕໍ່ ໄດ້ຮັບຄວາມນິຍົມຈາກປະຊາຊົນ
ໃນຫົວເມືອງ ທີ່ຄັ້ງນຶ່ງທ່ານເຄີຍປົກຄອງ: