ບັນດາເຈົ້າໜ້າທີ່ຈີນກ່າວວ່າ ເຫດລະເບີດທີີ່ຮ້າຍແຮງເຖິງຕາຍໃນຮ້ານບໍລິການ Internet ຫລື Internet Café ແຫ່ງນຶ່ງ ໃນພາກຕາເວັນຕົກສຽງໃຕ້ຂອງປະເທດນັ້ນ ປາກົດວ່າເກີດຈາກການເກັບມ້ຽນວັດຖຸເຄມີທີ່ບໍ່ຖືກຕ້ອງຕາມກົດໝາຍໃນ ຮ້ານທີ່ຢູ່ຕິດກັນ.
ເຫດລະເບີດໃນວັນເສົາຜ່ານມານີ້ ທີ່ຮ້ານ Internet Café ໃນເມືອງ Kaili ແຂວງ Guizhou ໄດ້ເຮັດໃຫ້ປະຊາຊົນເສຍຊີວິດໄປ 7 ຄົນ ໄດ້ຮັບບາດເຈັບ 37 ຄົນ ແລະສ້າງຄວາມເສຍຫາຍໃຫ້ແກ່ພວກຕຶກອາຄານທີ່ຢູ່ອ້ອມຂ້າງນໍາ.
ອົງການຂ່າວຊິນຫົວຂອງທາງການຈີນ ກ່າວວ່າ ທາງເຈົ້າໜ້າທີ່ໄດ້ກັກໂຕຄົນນຶ່ງໄວ້ ໃນຂໍ້ຫາມີເຄື່ອງເຄມີທີ່ອັນຕະລາຍຢູ່ໃນຄວາມຄອບຄອງຢູ່ໃນຮ້ານແຫ່ງນຶ່ງ ທີ່ຢູ່ຕິດກັນກັບຮ້ານບໍລິການອິນເຕີແນັທນັ້ນ. ເຄື່ອງເຄມີເຫລົ່ານີ້ ແມ່ນຮວມທັງທາດ sodium nitrate ແລະທາດ aluminium chloride. ຍັງບໍ່ເປັນທີ່ຈະແຈ້ງເທື່ອວ່າ ແມ່ນຫຍັງພາໃຫ້ເຄື່ອງເຄມີເຫລົ່ານັ້ນ ເກີດລະເບີດຂຶ້ນ.
