ບໍລິສັດຜະລິດລົດຂອງຈີນ ທີ່ທ່ານ Warren Buffet ມີຮຸ້ນສ່ວນນຳນັ້ນ ໄດ້ຖືກປັບໄໝ
ພ້ອມທັງຖືກເຈົ້າໜ້າທີ່ຢຶດຊັບສິນ ແລະຕຶກອາຄານ ຢູ່ໃນພາກເໜືອຂອງຈີນ.
ກະຊວງທີ່ດິນແລະຊັບພະຍາກອນຂອງຈີນ ກ່າວໃນວັນພະຫັດມື້ນີ້ວ່າ ບໍລິສັດ BYD ໄດ້ ຖືກສັ່ງໃຫ້ຈ່າຍຄ່າປັບໃໝ ເປັນເງິນເທົ່າກັບ 442,000 ໂດລາ ແລະຖືກຢຶດເອົາດິນ 45 ເຮັກຕາ ທີ່ໄດ້ມີການອະນຸມັດໃຫ້ເປັນເຂດນຳໃຊ້ ເພື່ອການກະສິກຳນັ້ນ.
ນອກນັ້ນແລ້ວ ບໍລິສັດດັ່ງກ່າວຍັງໄດ້ສູນເສຍຫໍພັກ 7 ຫຼັງ ບ່ອນເຮັດວຽກແລະ ຕຶກອາຄານ ອື່ນໆ ທີ່ໄດ້ປຸກໃສ່ດິນຕອນນີ້ແລ້ວ ບ່ອນທີ່ທາງບໍລິສັດກໍາລັງປຸກໂຮງງານແຫ່ງໃໝ່ໃສ່ ທີ່ຈະ ສາມາດຜະລິດຣົດ 200,000 ຄັນຕໍ່ປີ.
ທ່ານ Buffet ມີຮຸ້ນສ່ວນຢູ່ 10% ໃນບໍລິສັດດັ່ງກ່າວ ຊຶ່ງຈະໃຊ້ເທັກໂນໂລຈີ ໝໍ້ໄຟປະດິດ ຄິດຄົ້ນໃໝ່ ເພື່ອຜະລິດລົດໄຟຟ້າ ທີ່ບໍ່ເຮັດໃຫ້ອາກາດເປື້ອນເປິະນັ້ນ. ທ່ານ Buffet ໄດ້ ໄປເບິ່ງສະຖານທີ່ຫຼາຍໆແຫ່ງຂອງບໍລິສັດ BYD ໃນລະຫວ່າງການເດີນທາງໄປຢ້ຽມຢາມ ຈີນເມື່ອໄວໆມານີ້ ຮ່ວມກັບທ່ານ Bill Gates ເພື່ອນມະຫາເສດຖີພັນລ້ານຂອງທ່ານ.
