ລິ້ງ ສຳຫລັບເຂົ້າຫາ

ວັນເສົາ, ໑໓ ກໍລະກົດ ໒໐໒໔

ຈີນ, ອອສເຕຣເລຍ ບໍລິຈາກຕຶກອາຄານ ແລະສະໜາມບິນ ໃນການແຂ່ງຂັນຍາດແຍ່ງອິດທິພົນຢູ່ພາກພື້ນປາຊີຟິກ


ແຟ້ມຮູບ-ນາຍົກລັດຖະມົນຕີໝູ່ເກາະໂຊໂລມອນ ທ່ານຈາເຣມາຍອາ ມາເນເລ ກ່າວປາໄສໃນຂະນະທີ່ທ່ານພົບປະກັບນາຍົກລັດຖະມົນຕີອອສເຕຣເລຍ ທ່ານແອນໂທນີ ອາລບານີສ ໃນຫໍລັດຖະສະພາແຫ່ງຊາດຂອງອອສເຕຣເລຍ, ສໍາລັບການຢ້ຽມຢາມອອສເຕຣເລຍຄັ້ງທໍາອິດຂອງທ່ານ, ໃນນະຄອນຫຼວງແຄນເບີຣາ, ວັນທີ 26 ມິຖຸນາ 2024.
ແຟ້ມຮູບ-ນາຍົກລັດຖະມົນຕີໝູ່ເກາະໂຊໂລມອນ ທ່ານຈາເຣມາຍອາ ມາເນເລ ກ່າວປາໄສໃນຂະນະທີ່ທ່ານພົບປະກັບນາຍົກລັດຖະມົນຕີອອສເຕຣເລຍ ທ່ານແອນໂທນີ ອາລບານີສ ໃນຫໍລັດຖະສະພາແຫ່ງຊາດຂອງອອສເຕຣເລຍ, ສໍາລັບການຢ້ຽມຢາມອອສເຕຣເລຍຄັ້ງທໍາອິດຂອງທ່ານ, ໃນນະຄອນຫຼວງແຄນເບີຣາ, ວັນທີ 26 ມິຖຸນາ 2024.

ຈີນ ໄດ້ມອບຕຶກອາຄານປະທານາທິບໍດີຫຼັງນຶ່ງ ທີ່ຕັ້ງຢູ່ປະເທດເກາະວານູອາຕູ, ໃນຂະນະທີ່ ອອສເຕຣເລຍ ແລະ ນິວຊີແລນ ໄດ້ຈັດພິທີເປີດສະໜາມບິນ ມູນຄ່າ 55 ລ້ານໂດລາ ຢູ່ໃນໝູ່ເກາະໂຊໂລມອນ ທີ່ຢູ່ໃກ້ຄຽງ, ທ່າມກາງການ ແຂ່ງຂັນກັນເພື່ອຍາດເອົາອິດທິພົນຢູ່ໃນພາກພື້ນໝູ່ເກາະປາຊີຟິກແຫ່ງນີ້, ອີງຕາມລາຍງານຂອງອົງການຂ່າວ Reuters.

ລັດຖະມົນຕີການຕ່າງປະເທດຂອງນິວຊີແລນ ທ່ານວິນສຕັນ ປີເຕີສ໌ (Winston Peters) ໄດ້ໄປໝູ່ເກາະໂຊໂລມອນໃນວັນອັງຄານວານນີ້ ເພື່ອສົ່ງມອບສະ ໜາມບິນມູນ 55 ລ້ານໂດລາ ທີ່ຕັ້ງຢູ່ໃນແຂວງພາກຕາເວັນຕົກ ເຊິ່ງໄດ້ຮັບທຶນ ຈາກ ນິວຊີແລນ ແລະ ອອສເຕຣເລຍ.

ນາຍົກລັດຖະມົນຕີຂອງໝູ່ເກາະໂຊໂລມອນ ທ່ານເຈເຣມາຍອາ ມາເນເລ (Jeremiah Manele), ຍັງໄດ້ເຂົ້າຮ່ວມໃນພິທີດັ່ງກ່າວ, ເຊິ່ງຄາດວ່າຈະ ເດີນທາງໄປປະເທດຈີນໃນໄວໆນີ້ ລຸນຫລັງໄດ້ໄປຢ້ຽມຢາມ ອອສເຕຣເລຍ ໃນອາທິດທີ່ຜ່ານມາ ສໍາລັບການຢ້ຽມຢາມຕ່າງປະເທດຄັ້ງທໍາອິດຂອງທ່ານໃນ ຂະນະທີ່ດໍາລົງຕໍາແໜ່ງ.

ທ່ານ ມາເນເລ ກ່າວຕໍ່ສື່ມວນຊົນລຸນຫຼັງກັບຄືນໄປໝູ່ເກາະໂຊໂລມອນໃນວັນ ເສົາແລ້ວນີ້ວ່າ ໝູ່ເກາະໂຊໂລມອນໄດ້ຮ້ອງຂໍໃຫ້ ອອສເຕຣເລຍ ສະໜອງ ທຶນໃນການຮັບສະໝັກຕຳຫຼວດທ້ອງຖິ່ນ ສໍາລັບທົດສະວັດຕໍ່ໆໄປ, ດັ່ງນັ້ນ ປະເທດຊາດແຫ່ງນີ້ຈຶ່ງສາມາດ “ເບິ່ງແຍງຕົນເອງໄດ້” ເພື່ອຄວາມໝັ້ນຄົງຂອງ ພາຍໃນປະເທດເອງ.

ໝູ່​ເກາະໂຊໂລມອນ ມີ​ຄວາມ​ສຳພັນ​ດ້ານ​ຄວາມ​ປອດ​ໄພ​ກັບ ​ຈີນ ​ແລະ
ອອສເ​ຕຣເ​ລຍ, ​ເຖິງ​ແມ່ນລັດຖະບານ​ຊຸດ​ໃໝ່​ທີ່​ຖືກ​ເລືອກໃນ​ເດືອນ​ເມສາທີ່ ຜ່ານມາ ​ຈະ​ກວດກາ​ຄືນກ່ຽວກັບ​ການຈັດ​ຕັ້ງ​ດ້ານ​ຄວາມ​ປອດ​ໄພ​ຂອງ​ຕົນກໍຕາມ, ທ່ານ ມາເນເລ ກ່າວ​.

ທ່ານ​ຫູ ຊຸນ​ຮວາ, ຮອງ​ປະທານຂອງ​ຄະນະ​ກຳມະການແຫ່ງ​ຊາດຂອງ ກອງປະຊຸມ​ສະພາ​ທີ່ປຶກສາ​ດ້ານການ​ເມືອງຂອງປະຊາຊົນ​ຈີນ ຫຼື CCPPCC, ​ໄດ້​ເຂົ້າ​ຮ່ວມໃນ​ພິທີ​ມອບ​ຮັບ​ສຳນັກງານ​ປະທານ​ປະ​ເທດ, ພ້ອມດ້ວຍ​ອາຄານ​ກະຊວງ​ການ​ເງິນ ​ແລະອາຄານກະຊວງ​ການ​ຕ່າງປະ​ເທດ​ທີ່ສ້າງ​ຂຶ້ນໂດຍ ຈີນ ​ຢູ່​ນະ​ຄອນ​ຫຼວງປອດວີລາ ຂອງ​ ວາ​ນູອາ​ຕູ ໃນວັນຈັນແລ້ວນີ້.

ເຮືອ​ລຳ​ນຶ່ງ​ທີ່​ມອບ​ໃຫ້ກອງ​ກຳ​ລັງ​ຕຳຫຼວດ​ວາ​ນູ​ອາ​ຕູໂດຍ ອອສເຕຣເລຍ, ແມ່ນເພື່ອ​ຊຸກ​ຍູ້​ການ​ເຝົ້າ​ລະ​ວັງ​ທາງ​ທະ​ເລ​ ໄດ້ເດີນທາງໄປຮອດນະຄອນຫຼວງ ປອດວີລາ ໃນ​ອາ​ທິດ​ນີ້, ອີງຕາມການກ່າວໃນຖະແຫຼງການຂອງ​ກຳ​ມາທິ​ການຂັ້ນ​ສູງ​ອອ​ສເ​ຕຣເ​ລຍ.

ຈີນ ​ເປັນ​ເຈົ້າ​ໜີ້​ພາຍ​ນອກທີ່​ໃຫຍ່​ທີ່​ສຸດ​ຂອງໝູ່ເກາະ​ວາ​ນູ​ອາ​ຕູ ລຸນຫຼັງການ​ກໍ່ສ້າງ​ພື້ນ​ຖານ​ໂຄງ​ລ່າງມາ​ເປັນເວລານຶ່ງ​ທົດ​ສະ​ວັດ, ໃນ​ຂະ​ນະ​ທີ່ ​ອອ​ສເ​ຕຣເ​ລຍ ກໍ​ເປັນ​ຜູ້​ໃຫ້​ທຶນ​ຊ່ວຍ​ເຫຼືອທີ່​ໃຫຍ່​ທີ່​ສຸດ​ຂອງ​ປະເທດເກາະແຫ່ງນີ້ເຊັ່ນກັນ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG