ທ່ານ Yang Jiechi ລັດຖະມຸນຕີການຕ່າງປະເທດຈີນ
ໄດ້ສະແດງການຄໍານັບຮັບຕ້ອນຄູ່ຕໍາແໜ່ງ ຈາກ 10
ປະເທດສະມາຊິກຂອງກຸ່ມອາຊ່ຽນ ສູ່ເມືອງຄຸນໝິງ ທີ່
ໄປຮ່ວມກການພົບປະຫາລືກັນ ທີ່ເປັນຂີດໝາຍຄົບຮອບ
20 ປີແຫ່ງການສົນທະນາກັນລະຫວ່າງຈີນກັບກຸ່ມອາຊຽນ
ນັ້ນ.
ອົງການຂ່າວຊິນຫົວຂອງທາງການຈີນອ້າງຄໍາເວົ້າຂອງ
ທ່ານ Yang ທີ່ກ່າວວ່າ ການຢ້ຽມຢາມຄັ້ງນີ້ ຈະເປັນການ
ເນ້ນໜັກເຖິງການເຊື່ອມໂຍງລະຫວ່າງຈີນກັບຂົງເຂດເອເຊຍ
ຕາເວັນອອກສຽງໃຕ້. ພວກລັດຖະມຸນຕີຕ່າງປະເທດອາຊ່ຽນ
ໄດ້ພາກັນເດີນທາງໂດຍທາງບົກໄປຍັງເມືອງຄຸນໝິ່ງຈາກໄທ
ຕາມຖະໜົນທີ່ຈະໄດ້ຮັບການສ້ອມແປງແລະປັບປຸງໃຫ້ດີຂຶ້ນ
ເພື່ອໃຫ້ຄວາມສະດວກແກ່ການຄ້າແລະການພານິດນັ້ນ.
ພວກລັດຖະມຸນຕີເຫລົ່ານີ້ ກໍານົດຈະທໍາການໂອ້ລົມສົນທະ
ນາກັນກ່ຽວກັບບັນຫາຂັດແຍ້ງເລື້ອງການກ່າວອ້າງເອົາກໍາ
ມະສິດໃນໝູ່ເກາະ Spratley ອັນເປັນສາຍເກາະເລັກໆນ້ອຍໆ
ຫາດຊາຍຕື້ນໆ ແລະໂຂດຫິນຕິດຕໍ່ກັນຫລາຍກວ່າ 100 ແຫ່ງ ໃນທະເລຈີນໃຕ້ນັ້ນ.
ພວກລັດຖະມຸນຕີຈາກກຸ່ມອາຊ່ຽນ ໄດ້ໃຊ້ເວລາເດີນທາງມາເປັນເວລາ 3 ມື້ໂດຍທາງເຮືອ
ທາງລົດບັສ ຫລືລົດເມ ລົດໂອໂຕແລະທາງເຮືອບິນ ໄປຍັງເມືອງຄຸນໝິງ ໃນການເດີນທາງ
ທີ່ມີວັດຖຸປະສົງ ເພື່ອເນ້ນຄວາມສໍາຄັນແກ່ແຜນການຕ່າງໆເພື່ອເຊື່ອມໂຍງກັບພວກຕະຫຼາດ
ທີ່ຢູ່ຫ່າງໄກຂອງຂົງເຂດ ໃສ່ກັບອໍານາດເສດຖະກິດທີ່ໃຫຍ່ທີ່ສຸດຂອງເອເຊຍນັ້ນ.
ຈາກໄທ ພວກລັດຖະມຸນຕີໄດ້ພາກັນຂ້າມແມ່ນໍ້າຂອງ ນໍາເຮືອຂ້າມຟາກໄປຫາລາວຫລັງ
ຈາກນັ້ນ ກໍພາກັນເດີນທາງໄປນໍາລົດບັສ ໄປຍັງຊາຍແດນຈີນ. ຈາກຊາຍແດນຈີນ ພວກ
ເຂົາເຈົ້າເດີນທາງໄປນໍາລົດ ແລະເຮືອບິນໄປຍັງຄຸນໝິງ ເມືອງຫລວງຂອງແຂວງຢຸນນານ
ຂອງຈີນນັ້ນ.
