ສື່ມວນຊົນ ຂອງທາງການຈີນ ລາຍງານວ່າ ຜູ້ຊາຍຄົນນຶ່ງ ໄດ້ໃຊ້ຄ້ອນຕີ ເປັນອາວຸດ ໂຈມຕີພວກນັກຮຽນຈຸນຶ່ງ ກ່ອນລາວ ຈະຂ້າໂຕຕາຍ ໃນວັນສຸກມື້ນີ້. ອົງການຂ່າວຊິນຫວາ ລາຍງານວ່າ ຜູ້ຊາຍຄົນນີ້ ໄດ້ບຸກເຂົ້າໄປ ໃນໂຮງຮຽນປະຖົມ SHANGZHUANG ທີ່ເມືອງ WEIFANG ແຂວງ SHANDONG ໃນພາກຕາເວັນອອກ ຂອງຈີນ ແລະເຮັດໃຫ້ ເດັກນ້ອຍ 5 ຄົນ ໄດ້ຮັບບາດເຈັບ. ຫລັງຈາກນັ້ນ ລາວໄດ້ເອົາ ນຳມັນຮວດ ໃສ່ຕົນເອງ ແລ້ວກໍຈູດໄຟເຜົາ ຂະນະທີ່ ລາວພວມກອດ ເດັກນ້ອຍ 2 ຄົນໄວ້. ໂຄສົກ ຂອງເຈົ້າໜ້າທີ່ ປະຈຳເມືອງ ແຈ້ງໃຫ້ ອົງການຂ່າວຊິນຫວາ ຊາບວ່າ ພວກນາຍຄູ ໄດ້ດຶງເອົາ ເດັກນ້ອຍທັງ 2 ອອກມາໄດ້. ເຫດຮ້າຍ ໃນວັນສຸກມື້ນີ້ ແມ່ນການໂຈມຕີ ເທື່ອລ່າສຸດ ທີ່ມີມາ ເປັນລຳດັບ ຕໍ່ພວກເດັກນ້ອຍ ນັກຮຽນຢູ່ຈີນ. ໃນມື້ວານນີ້ ມີເດັກນ້ອຍ 28 ຄົນ ໄດ້ຮັບບາດເຈັບ 5 ຄົນໃນຈຳນວນນັ້ນ ມີອາການສາຫັດ ເວລາຜູ້ຊາຍຄົນນຶ່ງ ທີ່ມີມີດ ເປັນອາວຸດ ໄດ້ບຸກເຂົ້າໄປ ໃນໂຮງຮຽນ ທີ່ແຂວງຈຽງຊູ ໃນພາກຕາເວັນອອກ ຂອງຈີນ.
ມີການໂຈມຕີ ພວກນັກຮຽນ ຢູ່ຈີນອີກ
- ໄພສານ ວໍຣະຈັກ
