ໄອໂຟນລຸ້ນຫຼ້າສຸດຂອງ Apple ເວລານີ້ສາມາດອອກຈຳນ່າຍ
ໄດ້ແລ້ວ ຢູ່ໃນຈີນ ຫຼັງຈາກບໍລິສັດ ທີ່ຕັ້ງຢູ່ໃນສະຫະລັດດັ່ງກ່າວ
ໄດ້ໃຫ້ຄຳໝັ້ນສັນຍາຕໍ່ປັກກິ່ງ ວ່າຕົນຈະບໍ່ນຳເອົາຂໍ້ມູນ ຂອງຜູ້
ຊົມໃຊ້ ໄປໃຫ້ກັບລັດຖະບານປະເທດອື່ນໆ.
ໜ່ວຍງານຄຸ້ມຄອງກົດລະບຽບໂທລະສັບຂອງຈີນ ໄດ້ອະນຸມັດ
ໃຫ້ຂາຍ ໂທລະສັບດັ່ງກ່າວ ໃນວັນອັງຄານມື້ນີ້ ໂດຍກ່າວວ່າ
Apple ໃຫ້ຄຳໝັ້ນສັນຍາວ່າ ຈະປົວແປງຄວາມສ່ຽງ ທີ່ອາດມີ
ຢູ່ໃນໄອໂຟນ 6 ແລະ ໄອໂຟນ 6 Plus ນັ້ນ.
ໜ່ວຍງານດັ່ງກ່າວໄດ້ເວົ້າອີກວ່າ Apple ຍັງໃຫ້ຄຳໝັ້ນສັນຍາ
ວ່າ ຕົນບໍ່ເຄີຍຈັດຕັ້ງ ອັນທີ່ເອີ້ນ “ປະຕູຫຼັງ” ທີ່ຈະອະນຸຍາດໃຫ້ລັດຖະບານອື່ນໆ ເຂົ້າ
ໄປກວດເບິ່ງຂໍ້ມູນຂອງຜູ້ຊົມໃຊ້ໃດໆເລີຍ ແລະ ກ່າວຕໍ່ໄປວ່າ ຕົນ “ຈະບໍ່ເຮັດເຊັ່ນນັ້ນ
ເລີຍ.”
ການໃຫ້ຄຳໝັ້ນສັນຍາດັ່ງກ່າວ ໄດ້ມີຂຶ້ນຫລັງຈາກມີລາຍງານວ່າ ກະຊວງຮັກສາຄວາມ
ປອດໄພພາຍໃນຂອງສະຫະລັດ ສາມາດເຂົ້າໄປກວດ ເບິ່ງເຄື່ອງຄອມພິວເຕີ້ຫຼັກຂອງ
Apple ໄດ້ ດ້ວຍການນຳໃຊ້ໂຄງການສອດແນມລັບຕ່າງໆ.
ຕັ້ງແຕ່ນັ້ນມາ ສື່ມວນຊົນໃນຈີນ ໄດ້ອອກບົດລາຍງານ ກ່າວຫາຜະລິດຕະພັນຕ່າງໆຂອງ
Apple ວ່າເປັນໄພຂົ່ມຂູ່ຕໍ່ຄວາມໝັ້ນຄົງຂອງປະເທດ ທີ່ຢູ່ພາຍໃຕ້ການນຳພາຂອງ
ຄອມມິວນິສ ອັນເປັນຕະຫລາດ ທີ່ໃຫຍ່ທີ່ສຸດໃນໂລກ ສຳຫລັບໂທລະສັບມືຖືສະຫລາດ
ຫຼື smartphone.
ໃນຖະແຫລງຂ່າວສະບັບນຶ່ງ ບໍລິສັດ Apple ໄດ້ສະແດງຄວາມຍິນດີ ນຳການອະນຸມັດ ຂອງຈີນ ໂດຍກ່າວວ່າ ໄອໂຟນລຸ້ນໃໝ່ ແມ່ນພ້ອມທີ່ຈະນຳອອກຈຳນ່າຍ ຢູ່ທັງໃນ 3 ບໍລິສັດລັດວິສາຫະກິດໃຫຍ່ຂອງຈີນ ເລີ້ມຕົ້ນແຕ່ ວັນທີ 7 ຕຸລາເປັນຕົ້ນໄປ.
ວີດີໂອ: ຊາວຈີນໄປລໍຖ້າຊື້ ໄອໂຟນລຸ້ນໃໝ່:
