ປະທານປະເທດ ຈີນ ທ່ານ Xi Jinping ໃນວັນພະຫັດມື້ນີ້ໄດ້ປະກາດແຜນການຕັດກຳລັງທະຫານທີ່ໃຫຍ່ທີ່ສຸດລົງ 300,000 ຄົນ. ການປະກາດໄດ້ຖືກເປີດເຜີຍໃນລະຫວ່າງການເດີນຂະບວນ ສວນສະໜາມທີ່ຍິ່ງໃຫຍ່ເພື່ອສະເຫຼີມສະຫຼອງໄຊຊະນະຕໍ່ ຍີ່ປຸ່ນ ໃນສົງຄາມໂລກຄັ້ງທີ ສອງ. ພິທີດັ່ງກ່າວໄດ້ເຮັດບັນດາຜູ້ນຳ
ປະເທດຕາເວັນຕົກຫຼາຍຄົນ ຫຼີກລ່ຽງການເຂົ້າຮ່ວມ ແລະ ບາງຄົນກໍໄດ້ຍົກຄວາມເປັນຫ່ວງອັນໃໝ່ກ່ຽວກັບຄວາມປາຖະໜາຂອງທະຫານ ຈີນ. ນັກຂ່າວ ວີໂອເອ Bill Ide ມີລາຍງານເພີ່ມເຕີມຈາກ ປັກກິ່ງ. ເຊິ່ງ ພຸດທະສອນ ຈະນຳລາຍລະອຽດມະສະເໜີທ່ານ.
ການເດີນສວນສະໜາມຜ່ານຈະຕຸລັດ Tiananmen ແລະ ຕົວເມືອງ ປັກກິ່ງ ແມ່ນການສະແດງທີ່ໃຫຍ່ທີ່ສຸດຂອງທະຫານມະຫາອຳນາດ ຈີນ.
ພ້ອມດ້ວຍທະຫານຜ່ານເສິກ ສົງຄາມໂລກຄັ້ງທີ ສອງ, ເຈົ້າໜ້າທີ່ຂັ້ນສູງ ແລະ ທະຫານຫຼາຍກວ່າ 12,000 ຄົນແນມເບິ່ງ ອາວຸດທີ່ມີກຳລັງແຮງສູງ ລວມທັງຂີປະນາວຸດ ນິວເຄລຍ, ເຮືອບິນທີ່ມີຄວາມທັນສະໄໝ ແລະ ລົດຖັງ ໄດ້ຖືກເປີດໂຕຕໍ່ສາທາລະນະເປັນຄັ້ງທຳອິດ.
ອາວຸດໃໝ່ລວມມີຂີປະນາວຸດຕໍ່ຕ້ານເຮືອຮົບ Donfeng-21D. ສື່ມວນຊົນລັດຖະບານເອີ້ນມັນວ່າ “ພາຫະນະນັກຂ້າ” ຍ້ອນຄວາມສາມາດຂອງມັນທີ່ໄດ້ຖືກລາຍວ່າ ສາມາດແນເປົ້າໃສ່ກຸ່ມໂຈມຕີເຮືອບັນທຸກເຄື່ອງບິນ.
ເຖິງແມ່ນວ່າສະມີການສະແດງເຖິງອາວຸດທີ່ມີປະສິດທິພາບສູງແລ້ວ, ຜູ້ນຳ ຈີນ ກໍໄດ້ກ່າວວ່າພິທີດັ່ງກ່າວແມ່ນການລະນຶກເຖິງປະຫວັດສາດ ແລະ ສົ່ງເສີມສັນຕິພາບຫຼາຍກວ່າ.
ທ່ານ Xi Jinping ກ່າວວ່າ “ຄວາມອັກຄະຕິ ແລະ ການແບ່ງແຍກ, ຄວາມກຽດຊັງ ແລະ ສົງຄາມແມ່ນສາມາດສ້າງພຽງແຕ່ຄວາມຫາຍານະ ແລະ ຄວາມເຈັບປວດ. ການນັບຖືຊຶ່ງກັນແລະກັນ ແລະ ເສີມສ້າງສາຍພົວພັນຕໍ່ກັນແລະກັນໃນເງື່ອນໄຂອັນເທົ່າທຽມກັນ, ການພັດທະນາແບບສັນຕິ, ແລະ ຄວາມຈະເລີນຮຸ່ງເຮືອງຮ່ວມກັນ ແມ່ນວິທີທາງດຽວ (ທີ່ສາມາດເຮັດໄດ້) ໃນໂລກນີ້.”
ປະທານປະເທດ Xi ໄດ້ສັນຍາທີ່ຈະຫຼຸດຈຳນວນຂອງທະຫານກອງທັບທະຫານບົດ 2 ລ້ານຄົນຂອງ ຈີນ, ເປັນການເຄື່ອນໄຫວທີ່ບັນດານັກວິເຄາະເຫັນວ່າ ເປັນສ່ວນໜຶ່ງຂອງການເຮັດໃຫ້ມີຄວາມທັນສະໄໝທີ່ກຳລັງດຳເນີນຢູ່ຂອງທະຫານ. ທ່ານກໍຍັງໃຫ້ຄຳສັນຍາວ່າຈະບໍ່ເຮັດຊ້ຳຮອຍຄວາມຜິດໃນເມື່ອກ່ອນ.
ທ່ານ Xi ກ່າວວ່າ “ປະຊາຊົນ ຈີນ ແມ່ນຮັກໃນຄວາມສັນຕິຕະຫຼອດມາ. ບໍ່ແມ່ນວ່າພວກເຮົາຈະມາຮອດໄກຊ່ຳໃດ, ຈີນ ຈະບໍ່ສະແຫວງຫາຄວາມເປັນເຈົ້າໂລກ, ບໍ່ມີວັນທີ່ຈະພະຍາຍາມຂະຕົວອອກໄປໄກຕື່ມອີກ, ແລະ ຈະບໍ່ມີວັນສ້າງຄວາມທຸກທໍລະມານທີ່ພວກເຮົາເຄີຍຮູ້ສຶກຕໍ່ຜູ້ທີ່ເປັນຊາດອື່ນອີກ.”
ບັນດາປະເທດຢູ່ໃນພາກພື້ນທີ່ໄດ້ຖືກລັອກໃນຄວາມຂັດແຍ້ງເຂດແດນກັບ ຈີນ ອາດຈະຕີຄວາມໝາຍຕ່າງຈາກພິທີຂອງວັນພະຫັດວານນີ້ກໍໄດ້.
ຜູ້ເຂົ້າຮ່ວມງານຂອງ ປັກກິ່ງ ຈາກຕ່າງປະເທດກໍຍັງໄດ້ສະແດງການພິຈາລະນາເຊັ່ນກັນ. ປະທານາທິບໍດີ ຊູດານ ທ່ານ Omar Hassan al-Bashir, ຜູ້ທີ່ຖືກນຳຈັບສຳລັບການ
ກໍ່ອາຊະຍາກຳສົງຄາມໂດຍສານອາຍາສາກົນ, ກໍໄດ້ເຂົ້າຮ່ວມໃນພິທີ. ສ່ວນຜູ້ນຳຕາເວັນຕົກຄົນອື່ນໆແມ່ນໄດ້ພາກັນຢູ່ຫ່າງອອກໄກ.
ປະຊາຊົນ ຈີນ ບາງຄົນໄດ້ຕັ້ງຄຳຖາມຕໍ່ຄວາມຕ້ອງການ ສຳລັບການສະແດງທີ່ຟຸມເຟືອຍໃນເວລາທີ່ເສດຖະກິດຂອງ ຈີນ ກຳລັງຂະຫຍາຍຕົວຊ້າ ແລະ ໄດ້ກົດດັນລັດຖະບານໃຫ້ເປີດເຜີຍມູນຄ່າຂອງພິທີທີ່ເປັນພາລະຂອງປະຊາຊົນຜູ້ເສຍພາສີ. ປັກກິ່ງ ແມ່ນເບິ່ງຄືວ່າຈະບໍ່ເປີດເຜີຍຄ່າໃຊ້ຈ່າຍໃນເວລາໄວໆນີ້ແຕ່ຢ່າງໃດ.
