ຈີນກ່າວວ່າ ຕົນໄດ້ຍົກເລີກ ການຫ້າມ ທີ່ມີມາເປັນເວລາ 20 ປີ ບໍ່ໃຫ້ຊາວຕ່າງປະເທດ ທີ່ຕິດເຊື້ອ HIV ແລະເປັນເອດສ໌ ເດີນທາງເຂົ້າປະເທດ ບໍ່ເທົ່າໃດມື້ ກ່ອນການເປີດ ງານມະຫະກຳ ສິນຄ້າໂລກ ຫລືເວິລດ໌ເອກສ໌ໂປ ທີ່ນະຄອນຊຽງໄຮ້ ຊຶ່ງຄາດວ່າ ຈະດຶງດູດເອົາ ພວກນັກທ່ອງທ່ຽວ ຫຼາຍລ້ານຄົນ ໄປເບິ່ງໄປຊົມນັ້ນ. ສື່ມວນຊົນ ຂອງທາງການຈີນ ໄດ້ພິມເຜີຍແຜ່ ຖະແຫລງການ ສະບັບນຶ່ງ ຂອງສະພາປົກຄອງລັດ ທີ່ກ່າວວ່າ ລັດຖະບານ ໄດ້ຮູ້ແຈ້ງແລ້ວວ່າ ການຫ້າມ ເດີນທາງເຂົ້າປະເທດ ທີ່ວ່ານີ້ ມີຜົນໃນຂອບເຂດຈຳກັດ ໃນການປ້ອງກັນ ແລະຄວບຄຸມພະຍາດ. ສະພາປົກຄອງລັດ ກໍຄືລັດຖະບານຈີນ ກ່າວຕື່ມວ່າ ນອກນັ້ນ ການຫ້າມທີ່ວ່ານີ້ ຍັງໄດ້ສ້າງ ຄວາມບໍ່ສະດວກ ໃຫ້ແກ່ຈີນ ໃນການເປັນເຈົ້າພາບ ຈັດງານນາໆຊາດຕ່າງໆ. ສື່ມວນຊົນຈີນ ເວົ້າວ່າ ນອກນັ້ນແລ້ວ ລັດຖະບານ ຍັງໄດ້ຍົກເລີກ ຂໍ້ຫ້າມ ເຂົ້າປະເທດ ສຳລັບຊາວຕ່າງປະເທດ ທີ່ຕິດພະຍາດ ຕິດຕໍ່ທາງເພດສຳພັນຕ່າງໆ ແລະໂຣກຂີ້ເຮື້ອນນັ້ນນຳ. ທ່ານ BAN KI MOON ເລຂາທິການໃຫຍ່ ອົງການສະຫະປະຊາຊາດ ໄດ້ກ່າວຊົມເຊີຍ ທ່ານ HU JINTAO ປະທານປະເທດຈີນ ທີ່ໄດ້ຕັດສິນໃຈ ຍົກເລີກຂໍ້ຫ້າມເຫລົ່ານັ້ນ ແລະຮຽກຮ້ອງໃຫ້ ປະເທດອື່ນໆ ຖືເອົາການ ດຳເນີນບາດກ້າວ ໃນທຳນອງດຽວກັນ ເປັນເລື່ອງທີ່ຮີບດ່ວນ. ໂຄງການຮ່ວມ ຕໍ່ຕ້ານເຊື້ອ HIV ແລະໂຣກເອດສ໌ ຂອງອົງການ ສະຫະປະຊາຊາດ ກ່າວວ່າ ປັດຈຸບັນ ຍັງມີ 51 ປະເທດ ແລະດິນແດນ ທີ່ຫ້າມບໍ່ໃຫ້ ພວກຕິດເຊື້ອ HIV ແລະເປັນເອດສ໌ ເດີນທາງເຂົ້າປະເທດ. ສ່ວນສະຫະລັດ ໄດ້ຍົກເລີກ ຂໍ້ຫ້າມນີ້ ໃນເດືອນມັງກອນ ຜ່ານມາ.
ວັນພະຫັດ, ໒໖ ທັນວາ ໒໐໒໔
