ລິ້ງ ສຳຫລັບເຂົ້າຫາ

ວັນອັງຄານ, ໑໙ ມີນາ ໒໐໒໔

ນາຍົກລັດຖະມົນຕີຈີນ ຮຽກຮ້ອງໃຫ້ໃຊ້ຈ່າຍເງິນ ພາຍໃນປະເທດ ຫລາຍຂຶ້ນ


ທ່ານເຫວິ້ນເຈຍບາວ ນາຍົກລັດຖະມົນຕີຈີນ.
ວັນທີ 5 ມີນາ 2012.
ທ່ານເຫວິ້ນເຈຍບາວ ນາຍົກລັດຖະມົນຕີຈີນ. ວັນທີ 5 ມີນາ 2012.


















ນາຍົກລັດຖະມົນຕີຈີນໄດ້ຮຽກຮ້ອງ​ໃນ​ວັນ​ຈັນມື້​ນີ້​ ໃຫ້​ສົ່ງ​ເສີມ​ການ​ບໍລິ​ໂພກພາຍ​ໃນ​ປະ​ເທດ​ໃຫ້​ຫລາຍ​ຂຶຶ້ນ ​ເພື່ອ​ຮັກສາໃຫ້ເສດຖະກິດມີ​ການຂະຫຍາຍ​ໂຕ​ຕໍ່​ໄປ.

ໃນ​ຄໍາ​ປາ​ໄສ​ໄຂ​ກອງ​ປະຊຸມ​ສະພາ​ປະຊາຊົນ​ແຫ່ງ​ຊາດ ນາຍົກລັດຖະມົນຕີ​ ເຫ​ວິ້ນ ​ເຈຍ​
ບາ​ວ ​ໃຫ້​ຄໍາ​ໜັ້ນສັນຍາ​ທີ່​ຈະ​ເພີ່ມ​ຄ່າ​ໃຊ້​ຈ່າຍ​ໃນການ ​ບໍລິການ​ດ້ານ​ການ​ຮັກສາ​ສຸຂະ
ພາບ​ແລະສັງຄົມ ​ແລະ​ເພີ່ມ​ຄ່າຈ້າງ​ເງິນເດືອນ​ໃຫ້​ສູງ​ຂຶ້ນ ​ສໍາລັບ​ພວກ​ຜູ້​ຄົນ​ທີ່​ມີ​ລາຍ​ໄດ້
ພໍ​ປານ​ກາງແລະ​ລາຍໄດ້​ຕໍ່າ ຕະຫຼອດ​ທັງ​ຂະຫຍາ​ຍສິນ​ເຊື່ອສໍາລັບ​ຜູ້​ບໍລິ​ໂພ​ກ ພ້ອມ
ທັງ​ສິ່ງ​ອື່ນໆ​ ເພື່ອ​ຊ່ອຍ​ໃຫ້ປະຊາຊົນ​ໃຊ້​ຈ່າຍ​ເງິນ​ຫລາຍ​ຂຶ້ນ.

ທ່ານ​ເຫ​ວິ້ນ​ເຈຍ​ບາ​ວກ່າວ​ຕື່ມ​ວ່າ ເຖິງ​ແມ່ນ​ໄດ້​ມີ​ການທໍາ​ຄວາມ​ພະຍາຍາມ​ເຫຼົ່າ​ນີ້​ກໍ​ຕາມ ລັດຖະບານກໍ​ໄດ້ຫລຸດ​ເປົ້າ​ໝາຍການ​ເຕີບ​ໂຕຂອງເສດຖະກິດ​ ລົງ​ມາສູ່ອັດຕາ 7.5​ເປີ​ເຊັນ ສໍາລັບ​ປີ​ນີ້ ຊຶ່ງ​ແມ່ນຫລຸດ​ລົງ​ຢ່າງ​ຫລວງ ຫລາຍຈາກ​ອັດຕາ​ການ​ເຕີບ​ໂຕ 9.2 ​ເປີ​ເຊັນ​ໃນ​ປີ 2011 ​ແລະ 10.4 ເປີເຊັນ​ໃນ​ປີຜ່ານມາ​ນີ້ ຊຶ່ງທ່ານ​ເຫ​ວິ້ນ​ເຈຍ​ບາ​ວກ່າວວ່າ ​ເປົ້າ​ໝາຍ​ໃໝ່​ນີ້ ແມ່ນສະທ້ອນ​ເຖິງ​ຄວາມ​ມຸ່ງ​ໝັ້ນ​ຂອງ​ລັດຖະບານ​ທີ່​ຈະທໍາ​ຄວາມກ້າວໜ້າ ​ໃນ​ຂະ
ນະ​ດຽວ​ກັນກໍ​ຮັກສາ​ໄວ້​ຊຶ່ງ​ສະຖຽນ​ລະ​ພາບ​ຂອງ​ເສດຖະກິດ​ນັ້ນ.

ທ່ານ​ເຫ​ວິ້ນຍອມຮັບ​ວ່າ ລັດຖະບານ​ຕ້ອງ​ດໍາ​ເນີນ​ງານໃຫ້ດີກ​ວ່າ​ນີ້​ໃນຫລາຍໆ​ພາກສ່ວນ ຮວມທັງ​ການ​ປົກ​ປ້ອງ​ສິດທິ​ໃນ​ດ້ານ​ຊັບ​ສິນ ຄວບ​ຄຸມ​ລາຄາ​ສິນຄ້າ ​ແລະ​ຄວາມ​ປອດ​ໄພ​ໃນ​ບ່ອນ​ເຮັດ​ວຽກ​ເຮັດ​ການ.

ທ່ານເຫ​ວິ້ນກ່າວ​ວ່າ “ຍັງ​ມີ​ຄວາມ​ຂາດ​ຕົກ​ບົກ​ພ່ອງ​ແລະຂາດເຂີນ​ຫລາຍ​ຢ່າງ​ຢູ່​ໃນ​ວຽກ​ງານ​ຂອງລັດຖະບານ. ພວກ​ເປົ້າ​ໝາຍ​ຕ່າງໆ​ສໍາລັບ​ການ​ປະຢັດ​ພະລັງງານ ຜ່ອນຄາຍ​ການ​ສົ່ງ​ຄວັນ​ເສຍ​ຂຶ້ນ​ສູ່​ບັນຍາກາດ​ແລະ​ການ​ຄວບ​ຄຸມ​ລາຄາ​ສິນຄ້າ ​ແມ່ນ​ຍັງ​ບໍ່​ທັນ​ໄດ້​ບັນລຸ​ຜົນເທື່ອ​ໃນ​ເວລາ​ນີ້. ບັນຫາ​ຕ່າງໆກ່ຽວ​ກັບ​ຍຶດ​ເອົາ​ທີ່​ດິນ ການ​ທໍາລາຍ​ບ້າ​ນ​ເຮືອນ ຄວາມ​ປອດ​ໄພ​ໃນ​ບ່ອນ​ເຮັດ​ວຽກ​ເຮັດ​ການ ຄວາມ​ປອດ​ໄພ​ໃນ​ດ້ານ​ອາຫານ​ແລະ​ຢຸກຢາປົວ​ພະຍາດ ​ແລະ​ການ​ປັນ​ສ່ວນ​ດ້ານ​ລາຍ​ໄດ້ ຍັງ​ຢູ່​ໃນ​ຂັ້ນ​ຮ້າຍ​ແຮງຫລາຍ ​ແລະ​ປະຊາຊົນ​ກໍ​ຍັງ​ມີ​ຄວາມ​ເປັນ​ຫ່ວງ​ຫລາຍກ່ຽວ​ກັບ​ບັນຫາ​ພວກ​ນີ້.”

ນອກ​ນັ້ນ ນາຍົກລັດຖະມົນຕີ​ເຫວິ້ນ ຍັງ​ກ່າວ​ຕື່ມ​ວ່າ ກຸງ​ປັກ​ກິ່ງ​ຈະຮັກສາ​ອັດຕາ​ການ​ແລກປ່ຽນ​ເງິນຕາ​ຂອງ​ຕົນ​ໃຫ້​ທຸ່ນ​ທ່ຽງ ​ແລະ​ຈັດ​ຕັ້ງປະຕິບັດນະ​ໂຍບາຍ​ເພື່ອ​ປົກ​ປ້ອງ​ການ​ສ່ຽງ​ໄພ​ດ້ານ​ການ​ເງິນ​ຢ່າງ​ເປັນ​ລະ​ບົບນັ້ນ​.

XS
SM
MD
LG