ທ່ານ Chavez Hugo ປະທານາທິບໍດີ ເວເນຊູເອລາ ໄດ້ເດີນທາງໄປເຖິງຄິວບາ ເມື່ອ ຕອນບ່າຍວັນເສົາວານນີ້ ເພື່ອເລິ່ມບໍາບັດດ້ວຍຢາເຄມີ ຫລືຄີໂມເທຣາປີ ຫລັງຈາກໄດ້ ຜ່າຕັດເອົາເນື້ອງອກມະເຮັງອອກເມື່ອເດືອນຜ່ານມາ.
ກ່ອນຈະຂຶ້ນຍົນຢູ່ນະຄອນຫລວງກາຣາກັສ ທ່ານ Chavez ກ່າວວ່າທ່ານຈະອອກໄປນອກ ປະເທດເປັນເວລາສອງສາມວັນ ແຕ່ໄລຍະເວລາທີ່ ທ່ານຈະຢູ່ໃນຄິວບານັ້ນ ຍັງບໍ່ຮູ້ກັນເທື່ອ.
ກ່ອນໜ້ານັ້ນໃນມື້ດຽວກັນ ປະທານາທິບໍດີ Chavez ໄດ້ໂອນອໍານາດບາງຢ່າງຂອງທ່ານ
ໃຫ້ແກ່ຮອງປະທານາທິບໍດີ Elias Jaua ແລະລັດຖະມົນຕີກະຊວງການເງິນ Jorge
Giordani ຫລັງຈາກສະພາແຫ່ງຊາດ ອະນຸມັດການເດີນທາງຂອງທ່ານ. ທ່ານ Chavez
ໄດ້ຂັດຂືນຕໍ່ຄໍາຮຽກຮ້ອງຂອງຝ່າຍຄ້ານ ທີ່ຂໍໃຫ້ມອບອໍານາດປະທານາທິບໍດີຊົ່ວຄາວໃຫ້
ແກ່ຮອງປະທານາທິບໍດີ ໃນລະຫວ່າງທີ່ທ່ານບໍ່ຢູ່ນັ້ນ.
ທ່ານ Chavez ໄດ້ຮັບການຜ່າຕັດຢູ່ຄິວບາ ເມື່ອວັນທີ່ 4 ເດືອນກໍລະກົດ ນີ້ເພື່ອເອົາເນື້ອ ງອກອອກ ມື້ນຶ່ງກ່ອນເວເນຊູເອລາສະເຫລີມສະຫລອງວັນຄົບຮອບ 200 ປີ ຂອງການໄດ້ ຮັບເອກະລາດຈາກສະເປນ.
ຜູ້ນໍາເວເນຊູເອລາ ບໍ່ໄດ້ບອກໃຫ້ຮູ້ວ່າທ່ານເປັນມະເຮັງຊະນິດໃດ ແລະກໍຍັງມີຄໍາຖາມຢູ່ຕໍ່ມາວ່າ ອາການເຈັບປ່ວຍຂອງທ່ານຮ້າຍແຮງຫລາຍສໍ່າໃດ ກ່ອນການຜ່າຕັດເອົາເນື້ອງອກ ອອກນັ້ນ ທ່ານ Chavez ກໍໄດ້ຮັບການຜ່າຕັດຢູ່ຄິວບາ ສໍາລັບອັນທີ່ພວກເຈົ້າໜ້າທີ່ກ່າວ ວ່າ ເອົາຝີອອກຈາກກະດູກງ່າມກົ້ນນັ້ນ.
ປະທານາທິບໍດີ Chavez ໄວ 56 ປີ ທີ່ໄດ້ປົກຄອງປະເທດໃນຂົງເຂດອາເມຣິກາໃຕ້ແຫ່ງນີ້ ມາຕັ້ງແຕ່ປີ 1999 ໄດ້ບອກຊາວເວເນຊູເອລາວ່າ ທ່ານຍັງມີຄວາມຕັ້ງໃຈ ທີ່ຈະເປັນຜູ້ຄວບ ຄຸມປະເທດຢູ່ຕໍ່ໄປ.
