ວີດິໂອ ທີ່ຕຳຫຼວດສາຍໃຫ້ເບິ່ງຢູ່ໃນນະຄອນ Charlotte ລັດ North Carolina ໃນວັນ ເສົາວານນີ້ສະແດງໃຫ້ເຫັນວ່າ ໄດ້ມີການປະເຊີນໜ້າກັນຂັ້ນເອົາເປັນເອົາຕາຍ ລະຫວ່າງ ຕຳຫຼວດກັບ ທ້າວ
Keith Lamont Scott ໄວ 43 ປີ ຊາວຜິວດຳ ຊຶ່ງຖືກຍິງຕາຍໃນວັນອັງຄານສັບປະດາ ແລ້ວນີ້ ຊຶ່ງໄດ້ກະຕຸ້ນໃຫ້ມີການກໍ່ຈະລາຈົນຂຶ້ນຢູ່ໃນເມືອງທີ່ໃຫຽ່ທີ່ສຸດຂອງລັດ North Carolina.
ວີດິໂອຈາກທັງສອງກ້ອງ ຄືກ້ອງປະຈຳໂຕແລະກ້ອງຈາກລົດຕຳຫຼວດ ທີ່ປະເຊີນໜ້າກັບ ທ້າວ Scott ນັ້ນ ໄດ້ຖືກເຜີຍແພ່ໃນວັນເສົາວານນີ້ ລຸນຫຼັງການຮຽກຮ້ອງຂອງພວກປະ ທ້ວງໃຫ້ເຜີຍແບຮູບພາບດັ່ງກ່າວຕໍ່ປວງຊົນ.
ຮູບວີດິໂອອັນທີນຶ່ງສະແດງໃຫ້ເຫັນວ່າ ທ້າວ Scott ກຳລັງອອກຈາກລົດຂອງລາວ ແລ້ວ ຫັນໄປທາງຊ້າຍ ຢືນຢູ່ບ່ອນຈອດລົດປະມານ 3 ວິນາທີ ກ່ອນຕຳຫຼວດຈະຍິງລາວແລ້ວ ເຫັນວ່າລົ້ມລົງກັບພື້ນ.
ຮູບວີດິໂອອັນທີສອງ ບໍ່ໄດ້ສະແດງໃຫ້ເຫັນຮູບທ້າວ Scott ກ່ອນລາວຈະລົ້ມລົງພື້ນ. ສຽງ ຂອງວີດິໂອອັນນີ້ ໄດ້ຖືກຕັດອອກໃນຕອນຕົ້ນໆ ປະມານ 23 ວິນາທີ.
ມື້ທີ 5 ຂອງການປະທ້ວງຕ້ານການຍິງຄົນດັ່ງກ່າວສ່ວນໃຫຍ່ແມ່ນເປັນໄປຢ່າງສະຫງົບ ລຸນຫຼັງການເຜີຍແພ່ຮູບພາບວີດິໂອແລ້ວ.
ຄຳຖາມອັນສຳຄັນກ່ຽວກັບການຍິງຂອງຕຳຫຼວດນີ້ກໍຄືວ່າ ທ້າວ Scott ມີປືນບໍ່ ເວລາຕຳ ຫຼວດສັ່ງໃຫ້ລາວອອກມາຈາກລົດຂອງລາວຫັ້ນ. ຄຳຖາມນັ້ນຍັງບໍ່ທັນໄດ້ຮັບຄຳຕອບ ແມ່ນກະທັ່ງເວລາເຜີຍແພ່ຮູບພາບວີດິໂອດັ່ງກ່າວກໍຕາມ ແຕ່ສະແດງໃຫ້ເຫັນວ່າ ທ້າວ Scottອອກຈາກລົດຂອງລາວມາ ແລ້ວຖອຍຫຼັງຊ້າໆອອກໄປ ເວລາຕຳຫຼວດສັ່ງໃຫ້ລາວ ວາງອາວຸດນັ້ນ.
