ໂບດ Emanuel AME ເຊິ່ງເປັນໂບດຂອງຊາວອາເມຣິກັນ
ເຊື້ອສາຍ ອາຟຣິກາ ຢູ່ໃນເມືອງ Charleston ລັດ South
Carolina ທາງພາກຕາເວັນອອກສຽງໃຕ້ຂອງສະຫະລັດ
ບ່ອນທີ່ຄົນຜິວດຳ ເກົ້າຄົນ ຢູ່ໃນກຸ່ມສຶກສາພະຄຳພີ Bible
ໄດ້ຖືກສັງຫານໂດຍ ມືປືນຄົນຜິວຂາວ ເມື່ອອາທິດແລ້ວນີ້
ແມ່ນມີກຳນົດທີ່ຈະໄຂຄືນ ໃນວັນອາທິດມື້ນີ້ ສຳຫຼັບປະກອບ
ພິທີທາງສາສະໜາຕາມປົກກະຕິ ແລະ ເປີດໂຮງຮຽນວັນອາທິດ
ສຳຫລັບເດັກນ້ອຍ.
ທ່ານ Harold Washington ສະມາຊິກຄົນໜຶຶ່ງຂອງໂບດ
ກ່າວໃນວັນເສົາວານນີ້ວ່າ ລາວຄາດວ່າ ພິທີທາງສາສະໜາ
ຂອງວັນອາທິດມື້ນີ້ ຈະເຕັມໄປດ້ວຍຄວາມຮູ້ສຶກໂສກເສົ້າສະເທືອນໃຈ. ລາວເວົ້າວ່າ “ຂ້າພະເຈົ້າຄິດວ່າ ມັນຈະເປັນຊ່ວງເວລາທີ່ສະທ້ານໃຈ ເຊິ່ງຈະມີການຮ້ອງໄຫ້ກັນຫຼາຍ ແລະ ໂອບກອດກັນ.”
ໂບດ Emanuel AME ຂອງເມືອງ Charleston ເປີດຄືນແລ້ວ
ຜູ້ກ່ຽວກ່າວອີກວ່າ ລາວຄາດວ່າ ຈະເຫັນຜູ້ມາໃໝ່ຫຼາຍຄົນຄືກັນ. ທ່ານ Washington
ເວົ້າວ່າ “ພວກ ເຮົາຈະມີຜູ້ຄົນມາແວ່ ທີ່ພວກເຮົາບໍ່ເຄີຍເຫັນມາກ່ອນ ແລະຄົງຈະບໍ່
ເຫັນອີກເລີຍ ແລະ ມັນກໍບໍ່ເປັນຫຍັງ. ມັນແມ່ນ ໂບດຂອງພະຜູ້ເປັນເຈົ້າ ສະນັ້ນ
ເຮົາບໍ່ຄວນທີ່ຈະປະຕິເສດຜູ້ໃດເລີຍ.”
ການເຕົ້າໂຮມຊຸມນຸມ ໄດ້ຖືກຈັດຂຶ້ນໃນວັນເສົາວານນີ້ ຢູ່ທີ່ເມືອງ Charleston ແລະທົ່ວ
ສະຫະລັດ ເຊິ່ງປະຊາຊົນໄດ້ມາຮວມກັນ ລະລຶກເຖິງ ແລະສະແດງຄວາມເຄົາລົບຕໍ່ບັນດາ
ຜູ້ເຄາະຮ້າຍ ຈາກການໂຈມຕີໂບດ ເມື່ອຕອນຄ່ຳວັນພຸດ ທີ່ຜ່ານມານັ້ນ.
