ເຈົ້າໜ້າທີ່ກ່າວວ່າ ກຳລັງຮັກສາຄວາມໝັ້ນຄົງ ໃນປະເທດ
Chad ໄດ້ຊ່ວຍເຫຼືອຊາວໄນຈີເຣຍ ທີ່ຖືກພວກຫົວຮຸນແຮງ
ໂບໂກ ຮາຣາມ ຊຶ່ງເປັນກຸ່ມອິສລາມກໍ່ການຮ້າຍໄນຈີເຣຍ
ລັກພາຕົວໄປເມື່ອບໍ່ດົນມານີ້.
ພວກຄົນເຫຼົ່ານັ້ນ ຖືກພວກຫົວຮຸນແຮງດັ່ງກ່າວ ຈັບໄປເມື່ອ
ວັນອາທິດແລ້ວນີ້ ໃນການບຸກໂຈມຕີເມືອງນຶ່ງ ໃກ້ກັບຊາຍ
ແດນຕິດກັບປະເທດ Chad ນັ້ນ.
ພວກກໍ່ການຮ້າຍ ພ້ອມດ້ວຍຊາວໄນຈີເຣຍ ທີ່ຖືກລັກພາຕົວ
ໄປ ຈຳນວນ 100 ຄົນ ໄດ້ຖືກກອງທະຫານ Chad ຢຸດໄວ້
ຢູ່ຊາຍແດນ.
ບໍ່ເປັນທີ່ແຈ້ງຂາວໃນທັນທີນີ້ເທື່ອ ວ່າ ພວກທະຫານ Chad ເຮັດຢ່າງໃດກັບພວກໂບໂກ ຮາຣາມ ຫຼືວ່າ ພວກຊາວໄນຈີເຣີຍ ທີ່ຖືກຊ່ວຍມາໄດ້ນັ້ນ ໄດ້ສົ່ງກັບຄືນເມືອບ້ານແລ້ວບໍ່?
ພວກໂບໂກ ຮາຣາມ ຢາກຈັດຕັ້ງລັດອິສລາມຂຶ້ນຢູ່ໄນຈີເຣຍ ທີ່ພົນລະ ເມືອງ ຫຼາຍກວ່າ 170 ລ້ານຄົນ ແບ່ງເປັນສອງສ່ວນເກືອບເທົ່າໆກັນລະຫວ່າງ ຊາວມຸສລິມສ່ວນໃຫຍ່ຢູ່ໃນພາກເໜືອ ແລະຊາວຄຣິສຕຽນ ສ່ວນຫຼາຍຢູ່ພາກໃຕ້.
ກຸ່ມດັ່ງກ່າວ ໄດ້ຖືກກ່າວຫາວ່າ ລັກພາຕົວຫຼາຍຮ້ອຍຄົນຢູ່ໃນພາກຕາເວັນອອກສຽງເໜືອ ເພື່ອນຳມາໃຊ້ເປັນ ທະຫານເກນ ເປັນເມຍ ແລະ ຂ້າທາດ.
ການລັກພາຕົວພວກເດັກນັກຮຽນຍິງ ຈາກເມືອງ Chibok ທີ່ຢູ່ຫ່າງໄກສອກຫຼີກ ຂອງ
ພວກໂບໂກ ຮາຣາມ ເມື່ອວັນທີ 14 ເດືອນເມສາປີນີ້ ໄດ້ດຶງດູດຄວາມສົນໃຈຈາກນາໆ
ຊາດ ໄປຍັງບັນຫາຂໍ້ຂັດແຍ້ງດັ່ງກ່າວ ນັ້ນ ຢ່າງບໍ່ເຄີຍມີມາກ່ອນ ແລະມີການສະເໜີໃຫ້
ຄວາມຊ່ວຍເຫຼືອ ຈາກບັນດາມະຫາອຳນາດຕາເວັນຕົກ ອີກດ້ວຍ.
