ມີການລະເບີດຂຶ້ນຢູ່ໃນເຂດການຄ້າແຫ່ງນຶ່ງ ທີ່ຕັ້ງຢູ່ທາງພາກເໜືອຂອງຊີເຣຍ ໃນວັນອາທິດວານນີ້ ເຊິ່ງຄຸ້ມຄອງໂດຍກອງກຳລັງສະໜັບສະໜຸນເທີກີ, ສົ່ງຜົນເຮັດໃຫ້ມີຜູ້ເສຍຊີວິດ 8 ຄົນ ແລະມີຜູ້ໄດ້ຮັບບາດເຈັບອີກຫຼາຍກວ່າ 20 ຄົນ.
ນັກຂ່າວຂອງອົງການຂ່າວ AFP ກ່າວວ່າ ເຫດການລະເບີດຢູ່ເມືອງ ອາຊາສ (Azaz), ແຂວງ ອາເລັບໂປ (Aleppo) ເຊິ່ງເກີດຂຶ້ນພຽງບໍ່ດົນຫລັງຈາກເວລາທ່ຽງຄືນ ຂະນະທີ່ຝູງຊົນພາກັນໄປຊື້ເຄື່ອງໃນຊ່ວງເວລາຖືສິນອົດ ລະຫວ່າງບຸນຣາມາດານຂອງຊາວມຸສລິມ.
ກຸ່ມຕິດຕາມກວດກາດ້ານສິດທິມະນຸດຂອງຊີເຣຍກ່າວວ່າ “ມີຜູ້ເສຍຊີວິດ 8 ຄົນ ແລະມີຜູ້ບາດເຈັບອີກ 23 ຄົນ” ໃນເວລາທີ່ “ລົດວາງລະເບີດໄດ້ແຕກຂຶ້ນຢູ່ກາງຕະຫຼາດທີ່ມີຊື່ສຽງດັ່ງກ່າວ.”
ກຸ່ມສັງເກດການທີ່ມີສຳນັກງານຢູ່ໃນອັງກິດ, ເຊິ່ງມີເຄືອຂ່າຍທີ່ເປັນແຫຼ່ງຂ່າວຢູ່ພາຍໃນຊີເຣຍກ່າວວ່າ ເຫດການລະເບີດນັ້ນ ໄດ້ສ້າງ “ຄວາມເສຍຫາຍຢ່າງຫຼວງຫຼາຍ” ແລະເຮັດໃຫ້ເກີດໄຟໄໝ້.
ການວາງລະເບີດ ແລະເຫດການດ້ານຄວາມໝັ້ນຄົງອື່ນໆ ແມ່ນມີຢູ່ທົ່ວໄປໃນບໍລິເວນຕ່າງໆທີ່ດໍາເນີນການໂດຍກອງກຳລັງສະໜັບສະໜຸນເທີກີ ຢູ່ໃນພາກເໜືອຂອງຊີເຣຍ, ບ່ອນທີ່ມີການຍາດແຍ່ງອໍານາດກັນ ແລະເກີດຄວາມສ່ຽງໃນການໂຈມຕີລະຫວ່າງກຸ່ມປະກອບອາວຸດ ແລະກຸ່ມລັດອິສລາມ ຈິຮາດ (jihadis) ສົ່ງຜົນເຮັດໃຫ້ສະຖານະການດ້ານຄວາມໝັ້ນຄົງມີເຄັ່ງຕຶງເພີ້ມຂຶ້ນ ລຸນຫຼັງສະຖານະການສົງຄາມທີ່ແກ່ຍາວມາເປັນເວລາຫຼາຍປີ.
ນັກຂ່າວ AFP ພົບເຫັນການດໍາເນີນງານຂອງບັນດາເຈົ້າໜ້າທີ່ກູ້ໄພສຸກເສີນຢູ່ໃນບ່ອນເກີດເຫດ ແລະຍັງມີຊາກຂອງລົດທີ່ຖືກທຳລາຍອີກດ້ວຍ.
ທ້າວຄາເລັດ ອາລ-ນາວມະ (Khaled al-Nowmeh), ອາຍຸ 36 ປີ ຜູ້ທີ່ມີຮ້ານຂາຍຢາໃນເມືອງອາຊາສ ກ່າວວ່າ ລາວ ພ້ອມດ້ວຍພັນລະຍາ ແລະລູກໆຂອງລາວ ໄດ້ພາກັນໄປຕະຫຼາດເພື່ອຊື້ເຄື່ອງນຸ່ງຫົ່ມ ໃນເວລາທີ່ລະເບີດໄດ້ແຕກຂຶ້ນ.
ຟໍຣັມສະແດງຄວາມຄິດເຫັນ