ຟັງລາຍງານ:
ເບິ່ງວີດີໂອລາຍງານພາສາອັງກິດ ທີ່ກົງກັບລາຍງານພາສາລາວ:
ມັນເປັນມື້ເຊົ້າ ທີ່ທ້ອງຟ້າແຈ້ງໃສດີ ຢູ່ໃນເຂດກໍ້າໃຕ້ຂອງຫຸບເຂົາ Grand Canyon .
ບອ່ນນີ້ແຫລະ ແມ່ນຈຸດເລີ້ມຕົ້ນສໍາລັບນາງລິນດາ ໂກລເວີ ກູດຈ໌ (Linda Glover
Gooch). ນາງຄ່ອຍໆປັດຟອຍແຕ້ມຮູບຂອງນາງລົງບົນແຜ່ນຜ້າເທື່ອລະເລັກລະນ້ອຍ
ຮູບພາບກໍເລີ້ມປະກົດຂຶ້ນມາ. ໃນແຕ່ລະມື້ ນັກທ່ອງທ່ຽວຫລາຍໆພັນຄົນຖ່າຍຮູບເອົາ
ຫຸບເຂົາ Grand Canyon ໃນຄວາມຫວັງຢາກຈະເກັບເອົາຄວາມສວຍງາມຂອງທໍາມະ
ຊາດແຫ່ງນີ້ໄວ້.
ນາງລິນດາ ໂກລເວີ ກູດຈ໌ ສາມາດທີ່ຈະຢູ່ເຮືອນແລະແຕ້ມເອົາຈາກຮູບຖ່າຍຂອງຫຸບເຂົາ
Grand Canyon ອັນສວຍງາມໜ້າອັດສະຈັນນີ້ກໍໄດ້. ແຕ່ນາງເວົ້າວ່າ ການມາແຕ້ມເອົາ
ຮູບຕົວຈິງ ກັບການກ່າຍເອົາຈາກຮູບຖ່າຍນັ້ນ ຜົນອອກມາມັນຈະບໍ່ຄືກັນ. ນາງເວົ້າວ່າ:
"ໂອ້ ມັນຕ່າງກັນຫລາຍ ເພາະວ່າຢູ່ນີ້ ເຮົາຢູ່ໃນບັນຍາກາດ. ເຮົາໄດ້ສໍາພັດກັບ
ອາກາດ. ຮູບພາບຫັ້ນ ມັນກໍງາມຢູ່ດອກ ແຕ່ວ່າເຮົາຈະບໍ່ໄດ້ຄວາມຮູ້ສຶກ ບໍ່ໄດ້
ບັນຍາກາດຢູ່ບ່ອນນີ້. ແລະເຮົາກໍໄດ້ສໍາພັດກັບມັນດ້ວຍໂຕເອງນໍາອີກ. ສະນັ້ນ
ມັນພາໃຫ້ເຮົາມີອາລົມ ໃນຂະນະທີ່ເຮົາເຮັດວຽກຢູ່ນັ້ນ."
ນີ້ແຫລະແມ່ນອັນທີ່ພວກສິນລະປິນເອີ້ນກັນວ່າ ການວາດຮູບຢູ່ກາງແຈ້ງ ໃນທ່າມກາງ
ບັນຍາກາດຂອງທໍາມະຊາດ ຊຶ່ງການປ່ຽນແປງຂອງແສງສະຫວ່າງແລະສິ່ງແວດລ້ອມ
ມີຜົນກະທົບຕໍ່ການວາດຮູບ. ທ່ານ ສະກັອດ ເຄຣແນັກ (Scott Kraynak) ເຈົ້າໜ້າທີ່
ພະແນກສວນອຸດທະຍານແຫ່ງຊາດສະຫະລັດ ກ່າວວ່າ:
"ມັນເປັນການແຕ້ມຮູບ ແບບໄວໆໃນທໍາມະຊາດ ເພື່ອຈັບເອົາຊ່ວງເວລາ ທີ່
ສູນຫາຍໄປໄວໆ ໃນທໍາມະຊາດຂອງແສງສີ."
ພະແນກສວນສາທາລະນະແຫ່ງຊາດໄດ້ເຊື້ອເຊີນພວກນັກສິນລະປິນທັງຫລາຍ ໃຫ້ມາ
ແຕ້ມຮູບຫຸບເຂົາ Grand Canyon ເພື່ອນໍາອອກຂາຍໃນພາຍຫລັງ ຊຶ່ງເງິນຈາກການ
ຂາຍຮູບນັ້ນ ແມ່ນເອົາໄປຊ່ວຍເປັນທຶນໃນການກໍ່ສ້າງໂຮງວາງສະແດງຮູບພາບ. ທ່ານ
ເຄຣແນັກເວົ້າວ່າ ມີຫລາຍຄົນທີ່ມາຮູ້ຈັກຫຸບເຂົາ Grand Canyon ໂດຍຜ່ານຮູບແຕ້ມ.
"ຂ້ອຍຄິດວ່າ ບໍ່ຄ່ອຍມີຫລາຍຄົນປານໃດທີ່ຫລິ່ງເຫັນຄວາມສໍາຄັນຂອງສິນລະປະ ຢູ່ໃນສວນສາທາລະນະແຫ່ງຊາດ. ສິນລະປະໄດ້ຊ່ວຍໃຫ້ຜູ້ຄົນຮູ້ຈັກສະຖານທີ່
ແຫ່ງນີ້ວ່າ ມັນເປັນແບບໃດໃນເມື່ອກ່ອນ ໃນສະໄໝບຸກເບີກພາກຕາເວັນຕົກຂອງ
ປະເທດ ກ່ອນທີ່ຈະມີໂທລະພາບແລະອິນເຕີແນັດ. ສິນລະປະແມ່ນເລື່ອງໃຫຍ່ໃນ
ຂົງເຂດເຫລົ່ານີ້ ທີ່ບໍ່ໄດ້ຍົກຂຶ້ນມາເວົ້າກັນ. ສິນລະປະໄດ້ເປັນປະເດັນສໍາຄັນໃນ
ການເຮັດໃຫ້ສວນສາທາລະນະແຫ່ງຊາດ ມີຊື່ສຽງໂດ່ງດັງ."
ຜົນງານຂອງນາງລິນດາ ໂກລເວີ
ກູດຈ໌ ແມ່ນສາມາດຊອກເບິ່ງ
ຊອກຊົມໄດ້ໃນສະຖານທີ່ຕ່າງໆ
ເຊ່ນບ່ອນວາງສະແດງຮູບພາບ
ຢູ່ເມືອງ Scottsdale ລັດແອຣິ
ໂຊນາ. ຮູບທີ່ລາວແຕ້ມແມ່ນນໍາ
ເອົາພາບທໍາມະຊາດອັນໜ້າອັດ
ສະຈັນຂອງຫຸບເຂົາເລິກໆແລະ
ພູພຽງທີ່ແຫ້ງແລ້ງ ມາມອບໃຫ້
ແກ່ນັກສະສົມພາບທີ່ຢາກໄດ້
ຄວາມງົດງາມບາງຢ່າງ ກັບຄືນ
ໄປບ້ານໄປເຮືອນນໍາ.
"ຂ້ອຍຢາກໄດ້ແສງນັ້ນ ຢູ່ຈຸດ
ນັ້ນນ່ະ ເພາະວ່າມັນຈະຢູ່ຫັ້ນ
ພຽງແຕ່ອີກນຶ່ງຊົ່ວໂມງເທົ່ານັ້ນ ບາງທີ ຫລືອາດຈະບໍ່ຮອດຊໍ້າ. ມັນແຈ້ງຫລາຍແທ້ໆ."
ນາງ ກູດຈ໌ ໄດ້ໃຊ້ເວລາໝົດມື້ ຢູ່ຫຸບເຂົາ Grand Canyon ເພື່ອແຕ້ມຮູບນ້ອຍໆແຜ່ນ
ນີ້ຂອງນາງ. ແຕ່ນາງເວົ້າວ່າ ບໍ່ມີບ່ອນໃດທີ່ນາງຢາກຈະໄປຢູ່ ຫລາຍກວ່າບ່ອນນີ້.
ນາງອະທິບາຍວ່າ:
"ບໍ່ມີຄໍາເວົ້າອັນໃດ ທີ່ຈະພັນລະນາພາບບ່ອນນີ້ໄດ້. ມັນເປັນບ່ອນທີ່ງົດງາມແທ້ໆ.
ມັນທ້າທາຍ ເພາະວ່າມັນປ່ຽນໄປປ່ຽນມາຢູ່ເລື້ອຍໆ. ອາກາດບໍ່ເຄີຍຢູ່ນິ້ງແບບເກົ່າ
ຈັກເທື່ອ. ມັນໃຫ້ພາບທິວທັດແກ່ເຮົາໃນຫລາຍໆແບບ. ທ່ານສາມາດທີ່ຈະມາແຕ້ມ
ຮູບຢູ່ບ່ອນນີ້ ໄດ້ຕະຫລອດຊີວິດຂອງທ່ານ ແລະກໍຈະເຫັນພາບໃໝ່ໆ ປາກົດຂຶ້ນ
ມາເລື້ອຍໆ."
ໃນທີ່ສຸດ ໃນຕອນບ່າຍແກ່ໆຂອງມື້ນັ້ນ ຮູບແຕ້ມຂອງນາງລິນດາ ໂກລເວີ ກູດຈ໌ ທີ່
ວາດເອົາຄວາມງົດງາມຂອງພາກສ່ວນນີ້ຂອງຫຸບເຂົາ Grand Canyon ກໍສໍາເລັດລົງ
ແລະພ້ອມທີ່ຈະນໍາໄປວາງສະແດງ. ແຕ່ແນວໃດກໍຕາມ ທັດສະນີຍະພາບທີ່ປ່ຽນແປງ
ໄປເລື້ອຍໆຂອງຫຸບເຂົາເລິກແຫ່ງນີ້ ເຮັດໃຫ້ນາງຢາກກັບຄືນໄປທີ່ນັ້ນອີກ ແລະແຕ້ມ
ຮູບຕື່ມອີກມື້ນຶ່ງ.
