ລິ້ງ ສຳຫລັບເຂົ້າຫາ

ພະສົງກໍາປູເຈຍ ເດີນຂະບວນ ປະທ້ວງ ການລັກຂະໂມຍ ສະ​ລິ​ລີ​ກະທາດ ຂອງ​ພະພຸດທະ​ເຈົ້າ


ເງົາຂອງຄູບາ ເທິງພາບຂອງພະພຸດທະເຈົ້າ ໃນຂະນະທໍາການ ປະທ້ວງ ຢູ່ສວນປະຊາທິປະໄຕ ໃນນະຄອນຫຼວງພະນົມເປັນ.
ພວກ​ປະ​ທ້ວງ​ ແລະພະສົງ ຫຼາຍຮ້ອຍຄົນ ​ໄດ້ພາກັນໂຮມຊຸມນຸມ
ຢູ່ໃກ້ໆກັບພະລາດຊະວັງ ໃນກຸງພະນົມເປັນ ໃນວັນອັງຄານ
ວານນີ້ ​ຮຽກຮ້ອງ​ໃຫ້​ມີ​ການ​ສືບສວນ ອັນ​ທີ່​ພວກ​ເຂົາ​ເຈົ້າ​ກ່າວ
​ຫາວ່າ ​ເປັນການລັກຂະໂມຍ ສະ​ລິ​ລີ​ກະທາດ ຫລື​ອະ​ໄວ​ຍະ​ວະ
​ທີ່ຫາຍາກ ຂອງ​ພະພຸດທະ​ເຈົ້າ​ນັ້ນ.

ທາງການກໍາປູ​ເຈຍກ່າວວ່າ ໂຖຄໍາ ທີ່ກ່າວກັນວ່າ ບັນຈຸພະ
ເກສາ ທັນຕະ ແລະອັດຖະ ຂອງພະພຸດທະເຈົ້າ ໄດ້ຖືກລັກໄປ
ຈາກຫໍ​ເກັບ​ບູຊາແຫ່ງ​ນຶ່ງ ໃນອາທິດແລ້ວນີ້ ໃກ້ໆກັບ ເມືອງຫຼວງ.

ມາ​ຮອດ​ປັດຈຸບັນ ​ໄດ້​ມີ​ການ​ຈັບ​ກຸມພວກຕ້ອງສົງໄສທັງ 5 ຄົນ
ແຕ່ພວກປະທ້ວງກ່າວ ໃນວັນອັງຄານວານນີ້ວ່າ ພວກເຈົ້າໜ້າທີ່​ໄດ້​ຊັກຊ້າ ໃນການດໍາ
ເນີນການກ່ຽວ​ກັບຄະດີນີ້ ຫຼືຕາມຫາໂຖທີ່ຫາຍໄປນັ້ນ.

ພວກປະທ້ວງ ແລະພະສົງ ໄດ້ພາກັນເດີນຂະບວນປະທ້ວງ ທ່າມກາງຝົນທີ່ຕົກລົງມາ
​ແລະຖືປ້າຍຄໍາຂັວນຕ່າງໆ​ ປະນາມການສໍ້ລາດບັງຫຼວງ ແລະການລັກຂະໂທຍໂຖດັ່ງ
ກ່າວນີ້. ມີປ້າຍນຶ່ງຂຽນຂໍ້ຄວາມວ່າ “ການສູນເສຍສະ​ລິ​ລີ​ກະທາດຂອງພະພຸດທະເຈົ້າ
ກໍຄືການສູນເສຍມູນ​ມໍລະດົກ​ແຫ່ງ​ຊາດຂອງກໍາປູເຈຍ.”

ການປະທ້ວງຍຸດຕິລົງຢ່າງສັນຕິ ຫຼັງຈາກທີ່​ເຈົ້າ​ໜ້າ​ທີ່​ຂອງ​ຄະນະພະສົງ ໃຫ້ຄໍາໝັ້ນ
ສັນຍາວ່າ ຈະກົດ​ດັນ​ໃຫ້ລັດຖະບານ ດໍາ​ເນີນ​ການສືບສວນຄະດີນີ້ ​ໃຫ້​ໄວ​ຂຶ້ນ.

ກໍາປູເຈຍ​ໄດ້​ຮັບ ສະ​ລິລີ​ກະທາດເຫຼົ່ານັ້ນຂອງພະພຸດທະເຈົ້າ ຈາກສີລັງກາ ​ໃນປີ 1957.
XS
SM
MD
LG