ຜູ້ນໍາຜະເດັດການຂອງກໍາປູເຈຍ ໄດ້ອອກຄໍາສັ່ງໃຫ້ປິດ ອົງການຂ່າວທ້ອງຖິ່ນອິດສະຫຼະ ທີ່ຍັງເຫຼືອບໍ່ເທົ່າໃດອົງການຂ່າວຂອງປະເທດ ໃນວັນອາທິດວານນີ້ ລຸນຫຼັງມີບັນຫາ ຍ້ອນການລາຍງານຂ່າວກ່ຽວກັບລູກຊາຍຂອງລາວ, ອີງຕາມລາຍງານຂອງອົງການຂ່າວຝຣັ່ງ AFP.
ຜູ້ນໍາທີ່ກໍາອໍານາດຍາວນານທີ່ສຸດໃນໂລກ ນາຍົກລັກຖະມົນຕີ ຮຸນເຊນ ກໍາລັງເພີ້ມການປາບປາມບັນດາຝ່າຍຄ້ານຕ່າງໆ ໃນຂະນະທີ່ທ່ານກໍາລັງກະກຽມສໍາລັບການເລືອກຕັ້ງໃນທ້າຍປີນີ້.
ໜັງສືພິມທາງອອນລາຍທີ່ມີຊື່ວ່າ ສຽງປະຊາທິປະໄຕ ຫຼື VOD ໄດ້ພິມເຜີຍແຜ່ຂ່າວເປັນພາສາກໍາປູເຈຍ ແລະພາສາອັງກິດ, ເຊິ່ງມັກຈະປະນາມທ່ານຮຸນເຊນ ແລະລັດຖະບານຂອງທ່ານຢ່າງຮຸນແຮງເລື້ອຍໆ.
ນາຍົກລັດຖະມົນຕີ ຮຸນເຊນ ກ່າວໃນຕອນແລງວັນອາທິດວານນີ້ວ່າ ໜັງສືພິມອອນລາຍສຽງປະຊາທິປະໄຕ ຈະຕ້ອງຖືກຖອນໃບອະນຸຍາດ ໃນການດໍາເນີນງານ ແລະຈະຕ້ອງຍຸຕິການອອກອາກາດທຸກຢ່າງໃນຕອນ 10 ໂມງເຊົ້າຂອງມື້ວັນຈັນນີ້.
ການເຄື່ອນໄຫວດັ່ງກ່າວມີຂຶ້ນລຸນຫຼັງມີລາຍງານຈາກໜັງສືພິມອອນລາຍ VOD ສະບັບທີອອກໃນວັນທີ 9 ກຸມພານີ້ວ່າ ລູກຊາຍກົກຂອງ ທ່ານຮຸນເຊນ, ພົນໂທຮຸນ ມະເນດ ໄດ້ອະນຸມັດເງິນຊ່ວຍເຫຼືອ ໃຫ້ແກ່ປະເທດເທີກີ ເຊິ່ງໄດ້ຮັບຜົນກະ ທົບຈາກແຜ່ນດິນໄຫວທີ່ຮ້າຍແຮງທີ່ສຸດ ໃນຊ່ວງຕົ້ນເດືອນນີ້.
ພົນໂທ ຮຸນ ມະເນດ ໄດ້ປະຕິເສດຕໍ່ຂໍ້ກ່າວຫາດັ່ງກ່າວ.
ທ່ານຮຸນເຊນ, ຜູ້ທີ່ໃຫ້ການສະໜັບສະໜຸນ ພົນໂທຮຸນ ມະເນດ ທີ່ຈະສືບທອດຕຳແໜ່ງຂອງທ່ານໃນອະນາຄົດ, ຖະແຫຼງວ່າ ທ່ານໄດ້ເຊັນອະນຸມັດ ເງິນຊ່ວຍ ເຫຼືອທາງດ້ານການຕ່າງປະເທດ ຈໍານວນ 100,000 ໂດລາດັ່ງກ່າວ.
