ໃນວັນອັງຄານມື້ນີ້ ສານແຫ່ງນຶ່ງຂອງກຳປູເຈຍໄດ້ຕັດສິນລົງໂທດຈຳຄຸກຕໍ່ພວກຄັດຄ້ານລັດຖະບານປະມານ 60 ຄົນ, ລວມທັງທະນາຍຄວາມ ທີ່ມີຊື່ສຽງ, ທ່ານນາງເທຍຣີ ແສງ (Theary Seng) ວ່າໄດ້ສົມຮູ້ຮ່ວມຄິດໃນການກະ ທໍລະຍົດຊາດ ໃນການຮັບຟັງຄະດີແບບຮວມໝູ່ທີ່ຖືກປະນາມໂດຍສະຫະລັດ ແລະ ບັນດາກຸ່ມສິດທິມະນຸດວ່າ ເປັນເຫດຜົນທາງດ້ານການເມືອງ, ອີງຕາມອົງການຂ່າວຣອຍເຕີ້ສ໌ (Reuters).
ທ່ານນາງເທຍຣີ ແສງ, ທະນາຍຄວາມ ແລະນັກເຄື່ອນໄຫວດ້ານສິດທິມະນຸດ ຊາວອາເມຣິກັນເຊື້ອສາຍກຳປູເຈຍ ແມ່ນນຶ່ງໃນຈຳນວນຫຼາຍກວ່າ 100 ຄົນທີ່ພົວພັນກັບພັກກູ້ຊາດກຳປູເຈຍ (CNRP) ທີ່ຖືກຍຸບແລ້ວ ແລະຖືກກ່າວຫາວ່າທຳການທໍລະຍົດ ແລະຍຸແຍ່ໃຫ້ເກີດຄວາມວຸ້ນວາຍ.
ສານໃນນະຄອນຫຼວງພະນົມເປັນໄດ້ຕັດສິນລົງໂທດທ່ານນາງເທຍຣີ ແສງ ໃຫ້ ຖືກຈຳຄຸກ 6 ປີ ແລະສັ່ງໃຫ້ຈັບທ່ານນາງ, ອີງຕາມທະນາຍຄວາມຂອງທ່ານນາງ ເວົ້າກັບນັກຂ່າວ.
“ອັນນີ້ເປັນເລື້ອງທີ່ຍອມຮັບບໍ່ໄດ້ ແລະຂ້າພະເຈົ້າຈະໄປພົບກັບທ່ານນາງຢູ່ໃນຄຸກ ເພື່ອປຶກສາຫາລືກ່ຽວກັບການຂໍອຸທອນ," ນັ້ນຄືຄຳເວົ້າຂອງທະນາຍຄວາມຈວງ ຈວງກີ (Chuong Choungy) ທ່ານກ່າວຢູ່ນອກສານ, ໂດຍໃຫ້ ຂໍ້ສັງເກດວ່າ ທ່ານນາງແມ່ນນຶ່ງ ໃນຈຳເລີຍປະມານ 60 ຄົນທີ່ຖືກຕັດສິນໃຫ້ຖືກຈໍາຄຸກເປັນເວລາລະຫວ່າງຫ້າຫາແປດປີ.
ທ່ານນາງເທຍຣີ ແສງໄດ້ໄປຮອດສານໂດຍທີ່ນຸ່ງຊຸດເປັນຄືຮູບປັ້ນຂອງເທພີ ອິດສະຫລະພາບໂດຍມີໂສ້ທີ່ເປັນສັນຍາລັກໃສ່ອ້ອມຕົວທ່ານນາງ, ແລະເວົ້າວ່າທ່ານນາງຄາດວ່າຈະຖືກພົບວ່າມີຄວາມຜິດ.
ຫຼັງຈາກຄໍາຕັດສິນ, ທ່ານນາງກໍໄດ້ຖືກມັດແຂນເອົາເຂົ້າໄປໃນລົດບັນທຸກຂອງຕຳຫຼວດຊຶ່ງພາໃຫ້ເກີດການປະທະກັນລະຫວ່າງເຈົ້າຫນ້າທີ່ແລະຜູ້ສະໜັບສະໜູນທ່ານນາງ.
