ສົບຂອງນັກວິເຄາະ ແລະນັກເຄື່ອນໄຫວການເມືອງກຳປູເຈຍ ທ່ານ Kem Ley ຈະມີການແຫ່ໃນໄລຍະທາງຫຼາຍສິບກິໂລແມັດຜ່ານໃຈກາງນະຄອນຫຼວງພະນົມເປັນ ໃນວັນອາ ທິດ ຈະມາເຖິງນີ້ ຊຶ່ງພວກຈັດແຈງຄາດວ່າ ຈະດືງດູດເອົາບັນດາຜູ້ສະໜັບສະໜູນເປັນຈຳນວນຫລວງຫລາຍ.
ທ່ານ Ley ຊຶ່ງເປັນທີ່ນັບຖືຢ່າງກວ້າງຂວາງຂອງປະຊາຊົນນັ້ນ ໄດ້ຖືກລອບສັງ ຫານໃນຂະນະນັ່ງດື່ມກາເຟໃນຕອນເຊົ້າ ຢູ່ທີ່ປ້ຳນ້ຳມັນແຫ່ງນຶ່ງໃນນະຄອນຫຼວງໃນວັນອາທິດທີ່ຜ່ານມາ ທີ່ເຮັດໃຫ້ປະຊາຊົນເປັນຈຳນວນຫຼວງຫຼາຍພາກັນອອກມາສະແດງຄວາມໂສກເສົ້າ ຜິດຫວັງ ແລະໂກດແຄ້ນຢູ່ໃນທົ່ວກຳປູເຈຍ.
ທ້າວ Oeut Ang ອາຍຸ 38 ປີ ໄດ້ຖືກກ່າວຫາໃນວັນພຸດທີ່ຜ່່ານມານີ້ວ່າ ພົວ ພັນກັບການຄາດຕະກຳດັ່ງກ່າວ.
ທ່ານ Ley ໄດ້ເປັນຜູ້ກ້າເວົ້າກ້າວ່າທີ່ມີອິດທິພົນ ຊຶ່ງໄດ້ເຂົ້າໄປເຖິງຫລາຍລ້ານຄົນຜ່ານ ທາງວິທະຍຸ ໃນການວິເຄາະການເມືອງ ທີ່ມີຂຶ້ນເປັນປະຈຳຂອງທ່ານ. ທ່ານເປັນຜູ້ກໍ່ຕັ້ງ ພັກຮາກຫຍ້າປະຊາທິປະໄຕທີ່ທ່ານໄດ້ປະຕິເສດບໍ່ຍອມຮັບເອົາ ຕຳແໜ່ງທີ່ເປັນທາງ ການ ຫລັງຈາກໄດ້ກໍ່ຕັ້ງຂຶ້ນມາແລ້ວ.
ຫລັງຈາກໄດ້ມີການປະເຊີນໜ້າ ດ້ວຍຄວາມເຄັ່ງຕຶງກັບຕຳຫລວດແລ້ວ ພວກສະໜັບສະ ໜູນຫລາຍພັນຄົນພາກັນແຫ່ສົບຂອງທ່ານຜ່ານໃຈກາງເມືອງໄປຫາວັດ Chas ບ່ອນ ພວກໄວ້ທຸກຫລາຍພັນຄົນໄດ້ໄປເຕົ້າໂຮມກັນໃນແຕ່ລະມື້ແລະ ສົບຂອງທ່ານໄດ້ຖືກແຊ່ແຂງມື້ຄືນນີ້ ເພື່ອປ້ອງກັນບໍ່ໃຫ້ເໜົ່າເປື່ອຍ.
ທ່ານ Tim Malay ຫົວໜ້າຕາໜ່າງຊາວໜຸ່ມກຳປູເຈຍ ແລະຜູ້ຈັດແຈງການແຫ່ ກ່າວໃນມື້ຄືນນີ້ວ່າ "ພວກເຮົາມີພິທີໃຫຍ່ ເພື່ອແຫ່ສົມ ດຣ. Kem Ley ໄປຫາວັດ Chas. ຈາກວັດ Chas ກໍຈະໄປບ້ານຂອງທ່ານ ແລະພວກເຮົາຈະໄປທີ່ນັ້ນເວລາ 7:00 ໂມງເຊົ້າ.