ສານອາຍານາໆຊາດໃນກໍາປູເຈຍກ່າວວ່າ ສານຈະເລີ້ມດໍາເນີນຄະດີພວກອະດີດຜູ້ນໍາຂັ້ນສູງສຸດຂອງຂະເໜນແດງທີ່ຍັງມີຊີວິດຢູ່ນັ້ນ ໃນທ້າຍເດືອນມິຖຸນາ ຄືເດືອນໜ້ານີ້.
ສານດັ່ງກ່າວປະກາດໃຫ້ຮູ້ຢູ່ໃນwebsite ຂອງຕົນໃນວັນຈັນມື້ນີ້ວ່າ ການຮັບຟັງຄະດີຂັ້ນຕົ້ນຈະໄຂຂຶ້ນໃນວັນທີ 27 ເດືອນມິຖຸນາ ແລະຈະດໍາເນີນໄປເປັນເວລາເຖິງ 4 ມື້. ຄາດວ່າ ການຮັບຟັງຄະດີຂັ້ນຕົ້ນນີ້ຈະເວົ້າເລື້ອງເຕັກນິກຕ່າງໆ ຮວມທັງລາຍຊື່ພະຍານແລະນັກຊ່ຽວຊານ.
ທາງສານຍັງໄດ້ແຈ້ງໃຫ້ຝ່າຍຕ່າງໆທີ່ພົວພັນໃນຄະດີດັ່ງກ່າວ ກຽມໂຕ ເພື່ອໃຫ້ໄປມີໜ້າຢູ່ສານໄດ້ ສໍາລັບການດໍາເນີນຄະດີຄັ້ງຕໍ່ໆໄປໃນເດືອນສິງຫາ.
ພວກຈໍາເລີຍ 4 ຄົນໃນຄະດີດັ່ງກ່າວແມ່ນຮວມທັງນວນເຈຍ ຊຶ່ງເປັນຜູ້ນໍາຂັ້ນສູງສຸດອັນດັບສອງ ຖັດຈາກໂພນປົດທີ່ໄດ້ເສຍຊີວິດໄປແລ້ວ ໃນລະຫວ່າງການປົກຄອງທີ່ໂຫດຮ້າຍທາລຸນຂອງພວກຂະເໝນແດງນັບແຕ່ປີ 1975 ຫາ 1979 ນັ້ນ. ຜູ້ອື່ນໆທີ່ຖືກກ່າວຫາກໍແມ່ນ ອຽງສາຣີ ອະດີດລັດຖະມົນຕີການຕ່າງປະເທດ ພ້ອມດ້ວຍພັນລະຍາ ແລະ ອຽງ ທີຣິດ ອະດີດລັດຖະມົນຕີກິດຈະການສັງຄົມ ແລະຂຽວສໍາພັນ ອະດີດປະມຸກປະເທດ.
ບຸກຄົນທັງ4 ຖືກກ່າວຫາຖານເປັນອາຊຍາກອນສົງຄາມ ກໍ່ອາຊະກໍາ ຕ້ານມະນຸດຊາດແລະຂ້າລ້າງເຊື້ອຊາດເຜົ່າພັນ ຕະຫລອດທັງອາຊະຍາກໍາອື່ນໆທີ່ພົວພັນກັນພາຍໃຕ້ກົດໝາຍຂອງກໍາປູເຈຍ. ພວກບຸກຄົນເຫລົ່ານີ້ ຢູ່ໃນໄວແຕ່ 79 ຫາ 85 ປີ ແລະໄດ້ຢູ່ໃຕ້ການຄວບ ຄຸມໂຕຂອງສານນາໆຊາດ ມາຕັ້ງແຕ່ປີ 2007.
