ນັກຊ່ຽວຊານດ້ານການແພດໄດ້ບອກກັບສານອາຍານາໆຊາດທີ່ດໍາເນີນຄະດີ ພວກຂະເໝນ
ແດງໃນວັນຈັນວັນນີ້ວ່າ ນາງ Ieng Thirith ນຶ່ງໃນຈໍາເລີຍສີ່ຄົນນັ້ນແມ່ນມີອາການຫຼົງໆ
ລືມໆແລະອາດເປັນໂຣກຄວາມຈໍາເຊື່ອມ ກໍໄດ້.
ລາຍງານຈາກນາຍແພດ John Campbell ທີ່ເປັນຊ່ຽວຊານດ້ານຜູ້ສູງອາຍຸສະເພາະ
ແມ່ນໝາຍຄວາມວ່າ ນາງ Ieng Thirith ອະດີດລັດຖະມົນຕີກະຊວງກິດສັງຄົມ ອາດຈະ
ບໍ່ຢູ່ໃນສະພາບທີ່ຈະໃຫ້ການຕໍ່ສານໄດ້ ໃນການພິຈາລະນາຄະດີຜູ້ກ່ຽວ ຍ້ອນບົດບາດ
ຂອງນາງໃນອໍານາດປົກຄອງຂອງພວກຂະເໝນແດງ ທີ່ໄດ້ເຂ່ນຂ້າດັບສູນເຜົ່າພັນ ແລະ
ເອົາຊີວິດຜູ້ຄົນໄປເຖິງ 2 ລ້ານຄົນ ໃນທ້າຍຊຸມປີ 1970 ນັ້ນ.
ບັດນີ້ ຢ່າງນ້ອຍທີ່ສຸດ ນາງ Ieng Thirith ອາຍຸ 79 ປີ ແມ່ນຈະຕ້ອງໄດ້ຮັບການກວດ
ທາງການເເພດເພີ່ມຕື່ມ ຊຶ່ງກໍຄົງຈະສົ່ງຜົນໃຫ້ມີການເລື່ອນການເລີ່ມຕົ້ນຮັບຟັງຄໍາໃຫ້
ການ ໃນການດໍາເນີນຄະດີຄັ້ງປະວັດສາດນີ້ອອກໄປຈົນຮອດປີໜ້າພຸ້ນ ກໍເປັນໄດ້.
ສານອາຍາສາກົນ ໄດ້ເລີ່ມຮັບຟັງຄໍາໃຫ້ການໃນເບື້ອງຕົ້ນ ໃນຄະດີຟ້ອງຮ້ອງຕໍ່ ທັງສີ່
ຜູ້ນໍາຂັ້ນສູງຂອງກຸ່ມຂະເໝນແດງເມື່ອນຶ່ງເດືອນກ່ອນນີ້. ແຕ່ວ່າຂໍ້ສະເໜີ ຈາກທາງ
ຝ່າຍຈໍາເລີຍ ແລະບັນຫາຕ່າງໆທາງເທັກນິກ ໄດ້ເຮັດໃຫ້ການເລີ່ມດໍາເນີນຄະດີໃນ
ພາກໂຕຈິງນັ້ນ ຊັກຊ້າໄປ.