ກໍາປູເຈຍຍອມຮັບວ່າ ບໍ່ໄດ້ເອົາໃຈໃສ່ພຽງພໍ ໃນການຄວບຄຸມຝຸງຊົນ

ບັນດາ​ເຈົ້າ​ໜ້າ​ທີ່​ກໍາປູ​ເຈຍ​ຍອມຮັບ​ຜິດ​ວ່າ ພວກ​ຕົນ​ບໍ່​ໄດ້​ເອົາ​ໃຈ​ໃສ່​ພຽງພໍ​ຕໍ່​ການ​ຄວບ​ຄຸມ​ຝູງ​ຊົນ​ໃນ​ລະຫວ່າງ​ບຸນຊ່ວງ​ເຮືອ​ທີ່​ຍຸດຕິ​ລົງ​ດ້ວຍ​ໂສກ​ນາຕະ​ກໍາ ​ເວລາ​ປະຊາຊົນ​ຫລາຍ​ຮ້ອຍ​ຄົນແຫຍ້​ແລະຢຽບ​ກັນ​ຕາຍ​ໃນ​ຂົວແຄບໆ​ແຫ່ງ​ນຶ່ງ.

ທ່ານ​ຂຽວ​ ກັນຫາຣິດ ​ໂຄສົກ​ລັດຖະບານ​ກ່າວ​ໃນ​ວັນ​ພຸດ​ມື້​ນີ້​ວ່າ ພວກເຈົ້າ​ໜ້າ​ທີ່​ໄດ້​ພິຈາລະນາ​ເຖິງ​ເລື້ອງ​ການ​ສ່ຽງ​ໄພ​ອື່ນໆ ​ແຕ່​ບໍ່ໄດ້ຄາດ​ຄະ​ເນ​ວ່າ ອາດ​ຈະ​ເກີດການ​ແຕກ​ຕື່ນ​ໃນ​ຝູງ​ຊົນ​ຈໍານວນ​ຫລາຍ​ກວ່າ 1 ລ້ານ​ ຄົນທີ່​ໄປ​ຮ່ວມ​ມ່ວນ​ຊື່ນໃນ​ງານ​ບຸນນັ້ນ.

ພະສົງ 500 ອົງໄດ້ໄປປະກອບພິທີທາງສາສະໜາ ສູດມະຕິກາ ໃຫ້ບຸນແກ່ພວກເສຍຊີວິດ ຢູ່ນະຄອນ ຫລວງພະນົມເປັນ ຕອນບ່າຍວັນທີ 23 ພະຈິກ.

ພວກ​ທີ່​ເຫັນ​ເຫດການ​ກ່າວ​ຕໍ່ວີ​ໂອ​
ເອ ພະ​ແນ​ກພາສາ​ຂະ​ເໝນວ່າ
ການ​ແຕກ​ຕື່ນ​ໄດ້​ເລີ້ມ​ຂຶ້ນ ເວລາ
ຂົວ​ລອຍ​ທີ່​ແຄບໆນັ້ນ ເລີ້ມໄກວ​ໄປ​ໄກວ​ມາ ຊຶ່ງ​ພາໃຫ້​ຜູ້​ຄົນ​ໃນ​ຂົວ​ບາງ​ຄົນເຊື່ອ​ວ່າ ມັນຈະ​
ພັງ​ທະລາ​ຍລົງ. ອົງການ​ຂ່າວ AP ອ້າງ​ຄໍາ​ເວົ້າ​ຂອງສະຖານີໂທລະພາບ Bayon TV ທີ່
ລັດ​ເປັນ​ເຈົ້າ​ຂອງວ່າ ຄນະ​ເຈົ້າ​ໜ້າ​ທີ່​ສືບສວນສອບ​ສວນ​ລະດັບ​ສູງ​ຂອງ​ລັດຖະບານ​ໄດ້​ລົງ
ຄວາມ​ເຫັນໃນການ​ພົບ​ເຫັນ​ຫລັກ​ຖານ​ຂັ້ນ​ຕົ້ນວ່າ ນັ້ນ​ເປັນ​ຕົ້ນ​ເຫດ​ຂອງ​ການແຕກ​ຕື່ນ​ຢຽບ ກັນ​ຕາຍ​.

ລາຍ​ງານຂ່າວ​ຂັ້ນ​ຕົ້ນ​ຫລາຍ​ກະ​ແສ​ເວົ້າ​ວ່າ ມີ 378 ຄົນ​ເສຍ​ຊີວິດ​ໃນ​ໂສກ​ນາຕະ​ກໍາ​ໃນ​ວັນ
ຈັນ​ຜ່ານ​ມາ​ນັ້ນ ​ແລະ​ອີກຫລາຍ​ຮ້ອຍ​ຄົນ​ໄດ້​ຮັບ​ບາດ​ເຈັບ ແຕ່​ບັນດາ​ເຈົ້າ​ໜ້າ​ທີກ່າວ​ໃນ​ວັນ
ພຸດ​ມື້​ນີ້​ວ່າ ຈໍານວນ​ຜູ້​ເສຍ​ຊີວິດ​ມີ 350 ຄົນ​ ​ໂດຍ​ບໍ່​ມີ​ການ​ຊີ້​ແຈງ​ກ່ຽວ​ກັບໂຕ​ເລກ​ທີ່​ຂັດ​ແຍ້​ງ ກັນ​ນີ້.

ນາຍົກລັດຖະມຸນຕີຮຸນ​ເຊ​ນ ບັນ​ລະ​ຍາຍ​ການ​ແຕກ​ຕື່ນ​ຢຽບ​ກັນ​ຕາຍ​ນີ້ວ່າ​ເປັນ​ໂສກ​ນາຕະ​ກໍາ
ຄັ້ງໃຫຍ່​ທີ່ສຸດ​ຂອງ​ປະ​ເທດ ນັບ​ແຕ່​ພວກ​ຄອມ​ມີ​ວນິສຕ໌​ຂະ​ເໝນ​ແດງ​ໄດ້​ປົກຄອງ​ປະ​ເທດ​
ດ້ວຍ​ການ​ສ້າງ​ຄວາມ​ຢ້ານ​ກົວ​ຂູ່ຂວັນ​ປະຊາຊົນ​ນັ້ນ. ມີ​ການ​ກໍານົດ​ເອົາ​ວັນ​ພະຫັດ​ມື້​ອື່ນເປັນ​
ວັນ​ໄວ້ອາ​ໄລ​ແຫ່ງ​ຊາດ​ ນໍາ​ພວກ​ທີ່​ໄດ້​ຮັບ​ເຄາະ​ຮ້າຍ​ຄັ້ງ​ນີ້.