ສານສູງສຸດສະຫະປະຊາຊາດໄດ້ອອກຄໍາສັ່ງ ໃຫ້ກໍາປູເຈຍແລະໄທຖອນທະຫານແລະ
ຕໍາຫລວດຂອງຕົນທັງໝົດ ອອກຈາກເຂດທີ່ຕົນຫາກໍປະກາດໃຫ້ເປັນເຂດປອດທະຫານ
ຢູ່ອ້ອມແອ້ມວັດເກົ່າແກ່ຂອງກໍາປູເຈຍແຫ່ງນຶ່ງ ທີ່ຕັ້ງຢູ່ເລາະຕາມຊາຍແດນຂອງສອງປະ
ເທດນັ້ນໂດຍທັນທີ.
ນອກນີ້ ສານຍຸຕິທໍານາໆຊາດທີ່ກຸງ Hague ຍັງໄດ້ຕັດສິນໃນວັນຈັນມື້ນີ້ວ່າ ທັງສອງ
ປະເທດຄວນຈະອະນຸຍາດໃຫ້ພວກນັກສັງເກດການຈາກກຸ່ມອາຊຽນເຂົ້າໄປໃນຂົງເຂດ
ເພື່ອຕິດຕາມເບິ່ງການປະຕິບັດສັນຍາຢຸດຍິງກັນ.
ຄະດີດັ່ງກ່າວແມ່ນໄດ້ນໍາສະເໜີຕໍ່ສານໂດຍກໍາປູເຈຍ ທີ່ຢາກໃຫ້ສານອອກຄໍາສັ່ງໃຫ້ໄທ
ຖອນທະຫານທັງໝົດອອກຈາກຂົງເຂດດັ່ງກ່າວ ແຕ່ສານນາໆຊາດໄດ້ເຄື່ອນໄຫວໄປໄກ
ກວ່ານັ້ນ ໂດຍໄດ້ປະກາດໃຫ້ບໍລິເວນດັ່ງກ່າວ ເປັນເຂດປອດທະຫານຊົ່ວຄາວ ແລະ
ກ່າວວ່າ ທັງສອງປະເທດຄວນຈະຖອນທະຫານຂອງຕົນທັງໝົດອອກຈາກຂົງເຂດນັ້ນ.
ທັງສອງຝ່າຍໄດ້ສະເໜີຂໍ້ໂຕ້ແຍ້ງຂອງຕົນ ຕໍ່ບັນດາຜູ້ພິພາກສາ 15 ທ່ານຂອງສານທີ່
ກຸງ Hague ໃນທ້າຍເດືອນພຶດສະພາຜ່ານມາ.
